ماھل ءِ زور بیگواھی ءُ ماں بلوچستان ءَ مردمی اگبالانی لپاشگ ءِ بگیری ءَ بی این ایم ءِ ماں نیدرلینڈز ءَ زھرشانی

ایمسٹرڈیم: چہ بی این ایم نیدرلینڈزتک ءِ نیمگ ءَ ماں بلوچستان ءَ مردمی اگبالانی لگتمالی ءُ جنین ءُ چکانی زوربیگواھی ءِ بگیری ءَ نیدرلینڈز ءِ شھر ایمسٹرڈیم ءِ ڈیم اسکوائر ءَ زھرشانی کنگ بیتگ۔زھرشانی ءَ گل ءِ باسکاں بھر زرتگ۔بازاراں پنتاک شنگ کنگ بیتگ ءُ بازیں جاھاں ھمے تاک لیچینگ بیتگ۔

گوں زھرشانی کنوکاں گپ جنان بی این ایم ھالینڈ تک ءِ باسک جمال ءَ گْوشتگ دودمانی جھان ءَ ماں بلوچستان ءَ مردمی اگبالانی بگیری، مردین ، جنین ءُ چکانی زور بیگواھی ءِ بگیری ءَ توار چست کنگ لوٹ ایت۔یورپی سنت ءِ نندوک چہ وتی جھگیراں جست بہ کن اَنت کہ آ کجام بنیاد ءَ ناشرکاریں ڈیھے ءَ کمک کنگ ءَ اَنت۔اے وھد ءَ بلوچستان ءَ مردین، جنین ءُ چک ھم روچ پاکستانی زوراکی ءِ نشانگ کنگ بہ اَنت۔ما چہ یورپی سنت ءُ چہ مردمی اگبالانی تْرامگیجاں لوٹ کن ایں کہ آ بلوچستان ءَ بلوچ چکچینی ءِ نیمگ ءَ دلگوش بہ کن اَنت۔

بی این ایم ھالینڈ ءِ باسک اسلام مراد ءَ تْران کنان ءَ گْوشتگ پاکستانی لشکر ءَ پیش ءَ مردین زور بیگواھی ءِ نشانگ کرتگ اَنت بلے نی لھتے سال بیت جنین ءُ چکاں ھم زور بیگواہ کنگ ءَ اِنت۔بلوچستان ءِ ھند ھوشاپ ءَ بلوچ جنین آدم نورجان دورگیں بھتاماں دزگیر کنگ بیتگ اَت۔پاکستانی لشکر گوں دلجمی ءَ کرتگیں شورے ءِ رد ءَ بلوچ جنیناں نشانگ کنگ ءَ اِنت، 3 پروری ءَ بلوچستان ءِ بنجاھی شھر شال ءَ رشیدہ زھری گوں چکاں زور بیگواہ کنگ بوت ءُ داں 13 دن روچاں پاکستانی آزار جاھاں بند بیتگ۔نی پاکستانی لشکر ءَ چہ شال ءَ ماھل گوں وتی چکاں زور بیگواہ کرتگ، ماھل کہ دنیگت پاکستانی آزار جاھاں آزار سکگ ءَ اِنت۔مردمی اگبالانی پانکجن بلوچستان ءَ مردمی اگبالانی لپاشگ ءِ سر ءَ پاکستان ءَ جست بہ کن اَنت ءُ چہ ایشی ءَ پیش کہ دیر بہ بیت ترندیں گامگیج بہ زیر اَنت۔

گوں زھرشانی کنوکاں تْران کنان ءَ بی این ایم ءِ باسک نبیل ءَ گْوشتگ ما مروچی اد ءَ اوشتاتگ ایں داں جھان ماں بلوچستان ءَ بلوچ ءِ چکچینی ءِ بگیری ءَ توار چست بہ کنت۔75 سال اِنت کہ بلوچستان ءَ پاکستانی لشکر ءِ چکچینی برجاہ اِنت۔ھزارانی کچ ءَ مردین، جنین ءُ چک زور بیگواہ کنگ بیتگ۔اے وھدی بلوچستان ءَ زور بیگواہ کرتگیں مردمانی کھول مروچی ھم زھرشانی کنگ ءَ اَنت۔ ما لوٹ ایں کہ میان استمانی تک ءَ بلوچستان ءِ سر ءَ مردمی اگبالانی بگیری ءِ سر ءَ دلگوش گْور کنگ ءُ جست کنگ بہ بیت۔بلوچستان ءَ پاکستانی لشکر ءِ نیمگ ءَ شھرمنندانی درسیں اگبالانی لپاشگ ھم روچیگیں کارے جوڑ بیتگ۔ھزاراں بلوچ پاکستانی لشکر ءِ آزار جاھاں بند اِنت کہ آ اود ءَ آیاں سکیں در مردمی آزار دیگ بیت۔زندان ءَ بازیں مردم چہ لٹ ءُ آزاراں شھید ھم بیتگ۔ھزاراں ’’ کش ءُ چگل دئے ‘‘ ءِ شوندات ءِ آماچ بیتگ۔

آئی ءَ گْوشتگ ما چہ درسیں ھمگرنچیں تْرامگیج ءُ دودمانی جھان ءَ لوٹ کن ایں کہ آ پہ بلوچستان ءِ مردماں توار چست بہ کن اَنت۔ مارا چہ چکچینی ءَ بہ پھریز اَنت ءُ مارا پہ مئے آجوئی ءِ پدگرگ ءَ مئے کمک بہ کن اَنت۔