ایمسٹرڈیم : زور بیگواھیانی جھانی روچ ءَ ماں ایمسٹرڈیم ءَ بلوچ راجی زْرمبشت (بی این ایم) نیدرلینڈز تک ءِ نیمگ ءَ زھرشانی کنگ بیتگ۔اے زھرشانی ءَ مزنیں کچے ءَ سیاسی کارکن،جنین ءُ چکاں بھر زرتگ، زھرشانی کنوکاں پہ زور بیگواھی ءِ سانمنداں وتی بے تاھیری درشان کرتگ۔
زھرشانی ءَ گْوشتانک دیوکاں، کہ آیانی تہ ءَ آلیا، اسا بجار، بکشی ءُ اسلام مراد ھوار اَت اَنت ، وتی گْوشتانکاں ھما ھزاراں بلوچانی جاور سھرا کرت کہ پاکستانی لشکراں زور بیگواھی ءِ نشانگ کرتگ اَنت۔وتی گْوشتانکاں، آیاں پہ وت دیم دزگیریانی دردناکیں داستان درشان کرتگ اَنت ، زوربیگواھیں مردمانی تہ ءَ ھرچ سند ءِ مردم ، جنین ءُ چک ھم گون اِنت کہ آ ابید بھتام ءَ پاکستانی آزار جاھاں بند کنگ بیتگ اَنت۔
گْوشتانک دیوکاں اے گپ ءِ سر ءَ زور داتگ کہ زور بیگواھی ناں ایوک ءَ ھما مردماں کہ زور بیگواہ اَنت بلکیں آیانی کھول ءُ آیانی آیوکیں پدریچاں ھم بھ پر نہ بیوکیں تاوان دئے اَنت۔شول کشیں زندان ءُ کلپیں میڑانی پد ءَ باز زور بیگواھیں مردم بیران بیتگ۔ گْوشتانک دیوکاں زور دات کہ اے دْرچ بند بہ بیت۔
زھرشانی ءِچہ درساں پر ارزشتیں کلوہ اَت کہ کھول ءُ آیانی کساں مردمی اگبالانی میان استمانی راھبندانی پد ءَ وتی زور بیگواھیں مردمانی بارہ ءَ زانگ ءِ اگبال ھست ۔بلوچ سیاسی کارکنان چہ میان استمان ءَ لوٹ کرتگ کہ آ زور بیگواھیانی دارگ، بھتامانی پٹ ءُ پول کنگ ءُ ھما مردم کہ آ زوربیگواھیانی زمہ وار اَنت آیاں آمیدگس ءِ دیم ءَ پیش کنگ ءَ پاکستان ءِ سر ءَ زور بہ دنت۔
زھرشانی ءِ میان ءَ پہ زوربیگواھیانی بارہ ءَ آگاھی دیگ ءَ پنتاک ھم بھر کنگ بیتگ۔