جرمنی : چہ بلوچ راجی زْرمبشت ( بی این ایم ) ءِ نیمگ ءَ جرمنی ءِ شھر ھینور ءَ بلوچ شھمیرانی یات ءَ مراگشے برجم دارگ بیتگ۔ اے دم ءُ درگت ءَ بلوچ شھمیرانی اکسانی نمائش ءُ نیاد ءَ بھر زیروکاں چہ پروجیکٹر ءَ بلوچ شھمیرانی بارہ ءَ دستاویزی تامرے پیش دارگ بیتگ۔ مراگش ءَ چہ جرمنی ءِ جتائیں شھراں ، بلوچ ، کرد ءُ دگہ راجانی مردمانی بھر زرتگ۔
چہ سسا تْرانی نیاد ( سیمینار ) ءَ بلوچ راجی زْرمبشت ( بی این ایم ) ءِ سرکماش ڈاکٹر نسیم ، نامی ئیں ندکار ڈاکٹر ھنیپ شریپ ، بی این ایم ءِ بنجاھی پتر ءِ باسک ھاجی نسیر ، بی این ایم جرمنی تک ءِ کماش شرھسن ، کمک کماش سپیا ، بی این ایم جرمنی تک ءِ پیسرگیں کماش ازگر ، امارا ، باربا ، ایفر اوزدوگا ءُ دگراں گپ جتگ۔
اے دم ءُ درگت ءَ گپ جنان بی این ایم ءِ سرکماش ءَ گْوشتگ مھر گڑ ءَ بہ گر داں کلات ءَ بلوچ راج ءِ گھگیری ءُ پہ راجی آجوئی ءَ سرانی نْدر کنگ ءِ دْرچ داں انیگ ءَ برجاہ اِنت۔ 13 نومبر ءِ ارزشت چہ دگراں گیش اِنت پرچا کہ اے روچ مئے ڈیھ بلوچستان ءِ بنجاھی شھر ’ کلات ‘ ءِ سر ءَ برتانیائی ارش ءِ یات ءَ دنت، کہ آ اود ءَ مھراب ھان گوں وتی چار سد ھمراھاں پہ بلوچ گلزمین ءِ پھزگ ءَ شھمیر بوت۔
آئی ءَ گْوشتگ مھراب ھان ءِ شھمیری ءَ پد سرجمیں بلوچستان ءَ برتانیائی زورگری ءِ بگیری ءَ میڑ بنا بوت۔ سراوان ، جھالاوان ، رکشان ، سیبی ، نسیر آباد ، سلیمان کوہ ءُ مکوران ءِ مردماں باھند کرت۔ راست اِنت کہ لھتے سرداراں گوں انگریزاں ھمکاری کرت ، بلے بلوچستان ءِ مردم زورگر ء دیم ءَ میلانک بوت اَنت۔
ڈاکٹر نسیم ءَ گْوشتگ زوراکی ءِ پشتپدی پاکستان ءَ چہ برتانیا ءَ رس اتگ کہ آئی ءَ 27 مارچ 1948 ءَ بلوچستان زور گپت۔اے زورگری ءِ بگیری ءَ آگا ابدل کریم ءَ گھگیری بنا کرت ءُ مروچی بلوچ راج ءِ دیمونیانی برورد ءَ اے توانمندیں زْرمبشتے ءِ رنگ ءَ برجاہ اِنت۔
ی این ایم ءِ سرکماش ءَ دمپار اتگ بلوچ راج ءُ اے زْرمبشت ءِ منزل آجوئی اِنت۔ ما مسام کن ایں کہ داں بلوچستان ءِ آجوئی ءَ گھگیری ءِ اے پشتپدی مڈی ءَ دیم ءَ بر ایں۔ داں مئے گلزمین چہ ھرچ وڑیں زوراکیاں آجو مہ بیت دیمونی ءُ کرد ءِ اے ربیدگ برجاہ بیت۔