چہ بلوچ راجی زْرمبشت ( بی این ایم ) ءِ نیمگ ءَ سال 2024 ءِ سالی گزارش شنگ کنگ بیتگ۔ ایشی ءِ تہ ءَ گل ءِ تھی کار ، سیاسی ، سپارتی ءُ ھیلکاری کارانی کچ ءُ شمار پیش کنگ بیتگ اَنت۔ بی این ایم ءِ رسانک ءُ ربیدگی کارگشاد کازی داد مھمد ریھان ءِ نیمگ ءَ اے بارہ ءَ شنگ کنگ بیتگیں درشانے ءَ گْوشگ بیتگ اے بلوچ راجی زْرمبشت ( بی این ایم ) ءِ سرجمیں سال ءِ کارکردی گزارش نہ اِنت بلکیں اے تیوک ءَ ھما مراگش اَنت کہ رسانکدر ءَ شنگ بیتگ اَنت ءُ چہ بی این ایم ءِ رسانکی تک ءِ نیمگ ءَ نچینگ بیتگ اَنت۔
آئی ءَ گْوشتگ گمانے ھیش اِنت کہ سالے 312 گل ءِ انچیں مراگش بہ اَنت کہ آیاں گل ءِ سرکارگشاد ءُ ھما تک ءِ تْرامگیج پیتبند کن اَنت۔ پمیشکا آ ھم اد ءَ ھوار نہ اَنت۔
کازی ریھان ءَ گْوشتگ بی این ایم ءِ سالی گزارش اے پدر کنت کہ گل ءَ وتی کارانی سر ءَ گیشتر دلگوش داتگ ءُ چاگردی رسانکدر پہ وتی کارکرد ءِ درانگازی ءَ کارمرد کرتگ ناں کہ سجھی کار ایوک ءَ چاگردی رسانکدر ءَ کرتگ اَنت ۔
گزارش ءِ رد ءَ چہ بی این ایم ءِ نیمگ ءَ سال 2024 ءَ جتائیں دم ءُ درگتاں 19 زھرشانی کنگ بیتگ۔اے زھرشانی ھم سنتیں مھترھند امریکا ، ھم سنتیں سرڈگار برتانیا ، جرمنی ، نیدرلینڈز ءُ زرباری کوریا ءِ جتائیں شھراں بیتگ اَنت۔5 بر ءَ درانڈیھ ءَ مردمانی تہ ءَ آگاھی ودی کنگ ءِ مھیم بیتگ، اے مھیمانی تہ ءَ بلوچستان ءِ جاورانی سر ءَ جتائیں ڈیھانی مردماں سرپدی دیگ بیتگ۔ چہ گل ءِ نیمگ ءَ دو کانپرنس بیتگ کہ آیانی تہ ءَ بلوچستان ءِ جاورانی سر ءَ زانتکار ءُ دگہ راجانی جھگیر ءُ سیاستداناں بھر زرتگ۔برتانیا ءِ پارلیمان ءَ میان ستمانی تک ءِ گپ ءُ تْرانی نیادے برجم دارگ بیت کہ آئی ءِ تہ ءَ بی این ایم ءِ جھگیر ءَ بلوچستان ءِ جیڑہ ءِ سر ءَ گپ جتگ ءُ بلوچ راجی آجوئی ءِ لوٹ سھرا کرتگ۔
’’ بی این ایم ءِ جتائیں بولکاں ما سرجمیں جھان ءَ 11 میان راجی مراگشاں بھر زرتگ۔ جتائیں دم ءُ درگتاں 23 یاتگاری مراگش برجم دارگ بیتگ کہ سال ءِ جتائیں ماہ ءُ روچاں بیتگ اَنت۔ ایشانی تہ ءَ بلوچ راھشونانی سالروچ ، زور بیگواھیانی جھانی روچ ، 27 مارچ بلوچستان ءِ زورگری ءِ روچ ، 11 اگست بلوچستان ءِ چہ برتانیا ءِ چیردستی ءَ آجوئی ءِ روچ ، 28 مئی ءَ بلوچستان ءِ پاکستان ءِ سر ءَ ایٹمی ارشانی روچ ءُ 13 نومبر بلوچ شھمیرانی روچ ءِ مراگش ھوار بیتگ اَنت۔ جنیوا ءَ بی این ایم ءِ سرکماش ءَ پریس کانپرنس کرتگ ، آ پریس کانپرنس ءِ تہ ءَ بلوچستان ءِ آجوئی ءِ زْرمبشت ءُ پاکستانی چیردستی ءَ بلوچستان ءِ جاور ءِ سر ءَ اھوالکار سرپدی داتگ اَنت۔ بلوچستان ءِ بارہ ءَ جنیوا ءَ اکسانی نمائشے بیتگ کہ آئی ءِ تہ ءَ بلوچستان ءِ اکس گرانی اکس پیش کنگ بیتگ اَنت۔ بی این ایم ءِ وانگ ءُ زانگی تک ءِ پارست ءَ بنجاھی تک ءَ 8 مراگش بیتگ۔ 7 گل ءِ مراگش بیتگ کہ آیانی تہ ءَ اگدہ دارانی نیاد ، بنجاھی پتر ءِ نیاد ، ھنکین ءُ تک ءِ گچینکاری ھوار اَنت۔ ‘‘
گزارش ءَ بی این ا یم ءِ سپارتی سرگرمیانی بارہ ءَ ھم گْوشگ بیتگ کہ آئی ءِ رد ءَ میان استمانی تک ءَ دو نمدی دیم دیگ بیتگ۔ نمدی یے چہ گل ءِ سرکماش ءِ نیمگ ءَ جھان ءِ جتائیں ڈیھانی سروکاں دیم دیگ بیتگ ءُ دومی نمدی چہ بی این ایم نیدرلینڈز ءِ نیمگ ءَ ڈچ سرکار دیگ بیتگ۔ ھر دوئیں نمدیاں بلوچستان ءَ مردمی اگبالانی ناگیگیں جاورانی نیمگ ءَ دلگوش پرینگ بیتگ ءُ چہ جھان ءِ ھاکماں اے لوٹ کنگ بیتگ کہ آ میان استمانی تک ءَ پاکستان ءَ جست بہ کن اَنت پرچا کہ آئی ءَ بلوچستان دستیگ کرتگ ءُ بلوچانی سر ءَ زوراکی کنگ ءَ اِنت۔ 16 گزارش شنگ بیتگ کہ آیانی تہ ءَ گیشتر بی این ایم ءِ مردمی اگبالانی ادارہ پانک ءِ ماھی گزارش بیتگ اَنت۔ بی این ایم ءِ چاگردی گھبودی تک ءَ ھم جتائیں جیڑھانی سر ءَ گزارش شنگ کرتگ۔
رسانکدر ءَ ھم چہ بی این ایم ءِ نیمگ ءَ گچینی دلگوش دیگ بیتگ ، یکیں وھد ءَ نو زباناں گل ءِ درشان شنگ بہ اَنت ، گزارشانی پجیگ ءَ تامر ءِ شنگ کنگ ءِ سر ءَ ھم دلگوش دیگ بیتگ۔
رسانکی کارگشاد ءِ رد ءَ چوناھیا درسی رسانک ءِ تہ ءَ گل ءِ سرگرمیانی 150 تامر شنگ کنگ بیتگ بلے سئے گچینی تامر ھم جتائیں بنگپاں شنگ کنگ بیتگ۔ گْوستگیں سال ءَ چہ زْرمبش پبلی کیشنز ءِ نیمگ ءَ 5 کتاب شنگ کنگ بیتگ۔ بی این ایم ءِ وانگ ءُ زانگی تک ءِ زمہ وار مستریں کمک سرکماش ڈاکٹر جلال اِنت پمیشکا گیشتر کتاب چہ آئی ءِ چارگزاری ءَ شنگ بیتگ اَنت۔ گل ءِ جارینک تاکبند زْرمبش دو گشت ءَ شنگ بیتگ کہ مستریں کمک سرکارگشاد کمال ءَ نچینتگ ءُ شنگ کرتگ۔ 3 جارتاک شنگ کنگ بیتگ، یک ویبینارے بیتگ ، 5 پوسٹر شنگ کنگ بیتگ۔ گل ءِ دیدانک ءِ درانگازی ءَ 25 درشان ھندی ءُ جھانی رسانک ءَ دیم دیگ بیتگ کہ گل ءِ سرکماش ، سرکارگشاد ءُ جارکش ءِ نیمگ ءَ شنگ بیتگ۔ چاگردی رسانک ءَ 7 بر ءَ جتائیں بنگپاں ھیش ٹیگ کمپئن بیتگ۔
