بلوچستان ءَ زور بیگواھیانی دْرچ گْوستانک ءِ بدتریں کچ ءَ سر اِنت۔بی این ایم ءِ مردمی اگبالانی تْرامگیج پانک ءِ گزارش ءِ رد ءَ ، برجاھیں ماہ ءِ پنچ روچاں 48 کس زور بیگواہ کنگ بیتگ، چہ ایشاں 35 کس پاکستانی لشکر ءَ چہ کلات ءَ دزگیر کنگ ءَ پد زور بیگواہ کرتگ ، چہ دگہ دمگاں 5 زور بیگواھیں مردم دزگیریں جاھاں کشتگ۔
اے گپ بلوچ راجی زْرمبشت ( بی این ایم ) ءِ جارکش ءَ وتی درشانے ءَ گْوشتگ۔آئی ءَ بلوچستان ءَ مردمی اگبالانی ناگیگیں جاورانی سر ءَ بے تاھیری درشانتگ ءُ گْوشتگ درشانے ءِ تہ ءَ سرجمیں زور بیگواھیانی بارہ ءَ گْوشگ نہ بیت۔ما چہ مردمی اگبالانی میان استمانی پانکجناں دزبندی کن ایں کہ آ بی این ایم ءِ مردمی اگبالانی تْرامگیج پانک (https://x.com/paank_bnm) ءِ شنگ کرتگیں گزارشاں بہ چار اَنت ، کہ بلوچستان ءَ ھم روچ مردمی اگبالانی لگتمالی ءِ سر ءَ چہ راست ءُ تچکیں بن شوناں گزارش دنت۔اے گزارش اے گپ ءِ درانگازی کن اَنت کہ بلوچستان سکا مردمی ویل ءِ آماچ اِنت ءُ بلوچ راج چکچینی ءِ دیمپان اِنت۔
جارکش ءَ گْوشتگ بلوچستان ءَ ھزاراں مردم زور بیگواھی ءِ آماچ اِنت چہ ایشی ءَ سرجمیں بلوچ چاگرد آزار ءِ تہ ءَ اِنت۔بلوچ راج اے زوراکیانی بگیری ءَ یکشل ءَ زھرشانی کنگ ءَ اِنت بلے مھترھندی زوراکی کم بیگ ءِ جاہ ءَ چد ءُ گیش بیتگ۔وھدے جنین ءُ چک پہ وتی مردمانی دراکنائینگ ءَ پرایمنیں زھرشانی کن اَنت ، گڑا آ لٹ دیگ بہ اَنت ، آیاں آوار جن اَنت ءُ ترسین اِنت داں چہ وتی زھرشانی ءَ دست کش بہ بہ اَنت۔
آئی ءَ گْوشتگ ما اے زوراکیانی بگیری ءَ ترک ءُ نک نہ بہ ایں۔ مھترھند بلوچ راج ءِ آجوئی ءِ جھد ءِ پد ءَ بلوچستان ءِ سر ءَ چہ وتی دزرس ءَ زبھر اِنت پمیشکا بے سوبیانی چیر دیگ ءَ مردمانی سر ءَ زوراکیاں گیش کنگ ءَ اِنت داں ترس ءِ پارست ءَ بلوچ راج ءَ ایرجیگ کرت بہ کنت۔ما ڈاہ دئے ایں کہ چہ بلوچ ءِ ایرجیگ کنگ ءِ اے کوشست ءَ گیشتر ھونریچی بیت۔
بی این ایم ءِ جارکش ءَ گیشینتگ کہ بلوچ راج چہ وتی آجوئی ءِ لوٹ ءَ گامے پدکنز نہ بیت۔داتگیں دیمونیاں لوٹ ھمیش اِنت کہ سرجمیں راج گوں ھم سنتی ءَ وتی آجوئی ءِ جھد ءَ ھمگرنچیں رنگے ءَ دیم ءَ بہ بارت۔داں بلوچ راج زیردست اِنت ، زور بیگواھی ءُ درآمیدگسی کوشانی دْرچ نہ اوشت ایت۔
جارکش ءَ پہ بی این ایم ءِ باسکاں گْوشتگ کہ آ بلوچستان ءَ گوں زوربیگواھیں مردمانی کھولاں یکجھتی درشان بہ کن اَنت ، آیانی ھاٹیگ ءُ اوپار ءَ توانمند بہ کن اَنت ءُ بلوچ چاگرد ءَ گوں یک مشتی ءَ بہ دار اَنت۔بی این ایم ءِ درانڈیھ ءَ نشتگیں باسک بلوچ راج ءِ توار جوڑ بہ بہ اَنت ءُ میان راجی گیھار ( ضمیر ) ءَ بے ژامبلین اَنت ءُ پہ آجوئیں بلوچستان ءَ پلہ مرزی ءَ گیش بہ کن اَنت۔
جارکش ءَ گڈسر ءَ درائینتگ برجاھیں ماہ ءَ 27 مارچ ءَ بلوچستان ءِ سر ءَ پاکستان ءِ زورگری ءِ بگیری ءَ بی این ایم جتائیں مراگشانی پارست ءَ زور بیگواھی ءُ در آمیدگسی کوشاں سھرا کنت۔ بنجاھی مراگش ماں جنیوا ءَ بیت ، آ اود ءَ سانمندیں تکشامے ءِ پارست ءَ میان راجی تْرامگیج بلوچستان ءَ بیوکیں زوراکیانی بارہ ءَ سھی کنگ بہ اَنت۔
