بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ گْوشتگ کہ کردگاپ ءَ گْوستگیں شش روچ اِنت زور بیگواھیں مردمانی کھول ءُ دگہ مردم شال تپتان شھدگ ءَ زھرشانی ءَ نشتگ اَنت۔آیانی کس ءُ مردم مھترھندی لشکر ءَ زور بیگواہ کرتگ اَنت ءُ آ پہ مزدانک ءَ ودار ءَ اَنت۔
ڈاکٹر نسیم ءَ گْوشتگ کہ کردگاپ ءِ جاہ منندیں سرپرہ ٹک ءِ باپاری مردم، سرکاری کارمند ءُ نودربراں ھوار دہ مردم جتائیں وھداں چہ بلوچستان ءِ جتائیں ھنداں پاکستانی لشکر ءَ آوار جتگ ءُ بیگواہ کرتگ اَنت۔ آیانی تہ ءَ عبدالمالک سرپرہ ھم ھوار اِنت کہ آ نوشکے ءِ جاہ منند اِنت ءُ کراٹے ءِ بلیک بیلٹے۔ آ 25 اگست 2011 ءَ چہ کراٹے ءِ کلب ءَ آوار جنگ بیتگ۔ ھمے وڑ ءَ غلام فاروق سرپرہ کہ ڈیرہ مراد جمالی ءِ جاہ منند ءُ وتی کھول ءِ والینوک اِنت، 2 جون 2015 ءَ بیگواہ کنگ بیتگ۔ جمیل احمد سرپرہ کہ آ بلوچستان سرکار ءِ گورنر ءِ پی آر او ءِ بستار ءَ کار ءَ بیتگ، 25 جولائی 2015 ءَ شال ءَ گرین ٹاؤن سریاب ءَ چہ گس ءَ پاکستانی لشکر ءِ دست ءَ زور بیگواہ کنگ بیتگ۔ کردگاپ ءِ جاہ منند دگہ یک باپاریں مردمے میرتاج محمد سرپرہ 19 جولائی 2020 ءَ کراچی ءَ بالی پٹ ءَ روگ ءَ اَت کہ چہ راہ ءَ بیگواہ کنگ بوت۔ آئی ءِ بابت ءَ انگت ءَ ھچ وڑیں سرپدی دیگ نہ بیتگ۔ ھمے وڑ ءَ دو برات راشد سرپرہ ءُ ذاکر سرپرہ بیگواہ کنگ بیتگ اَنت۔راشد سرپرہ 18 دسمبر2021 ءُ ذاکر سرپرہ 30 اگست 2021 ءَ پاکستانی لشکر ءَ آوار جتگ اَنت کہ انگت بیگواہ اَنت۔
آئی ءَ گوشتگ کہ سرپرہ کھول ءِ ظہور سرپرہ ءُ سجاد سرپرہ وت ماں وت ناکو زتک اَنت مئی 2021 ءُ جولائی 2021 ءَ چہ شال ءَ زور بیگواہ کنگ بیتگ اَنت۔ آیانی کھول گوستگیں چینچو سال اِنت کہ زھرشانی کنگ ءَ اَنت۔ چہ ایشی ءَ ابید لا شھدربرجاہ ءِ جاوید شمس ءَ 31 اگست 2021 ءَ چہ شال ءَ گس ءَ لشکر ءَ آوار جتگ ءُ داں انو بیگواہ اِنت۔ شاھنواز سرپرہ کردگاپ ءِ جاہ منند اِنت، آ 2024 ءَ چہ کلات ءِ ھند منگچر ءَ زور بیگواہ کنگ بیتگ۔
ڈاکتر نسیم ءَ گْوشتگ کہ بلوچستان ءَ پاکستانی لشکر ءِ دست ءَ دزگیری ءَ پد زوریں بیگواھی ھما ٹپ اِنت کہ ایشی درد یک روچے میان استمان ءِ زرد ءَ توار چست کنگ ءَ لاچار کنت۔ ھما مردم کہ اے درد ءِ آماچ اِنت تیوک ءَ ھما زانت کنت کہ زوریں بیگواھانی مات ءُ پت ءُ سیاد گوں کجام آزاراں گوزگ ءَ اَنت۔ چینچو مات ءُ پت ، کس ءُ مردم چہ سالاں وتی مردمانی راھچاری ءَ بیران بیتگ اَنت۔ بلے آیاں گوں ھمے واھگ ءَ ساہ دات کہ وتی زور بیگواھیں مردماں پد ءَ بہ گند اَنت۔
آئی ءَ گْوشتگ کہ کردگاپ زھرشانی نندانک، بلوچستان ءَ برجاھیں زوراکیانی تیوک ءَ یک جلشکے۔ بیگواھیں مردمانی کھول پہ وتی کس ءُ مردمانی آجوئی ءَ شپ ءُ روچ دگانی سر ءَ نشتگ اَنت۔ مزدانک ءِ لوٹ ءَ کھول سکیں سارتی ءِ سر ءَ نشتگ اَنت بلے مزدانک رسگ وتی جاہ ءَ آیانی توار ءِ دارگ ءِ جھد کنگ بوگ ءَ اِنت۔ اے ناں تیوک ءَ آیاں مان نیارگ ءَ اَنت بلکیں چہ واکدارانی نیمگ ءَ بیھار دیگ ءُ ترسینگ ءِ جھد کنگ بوگ ءَ اِنت۔ ھندی واکداراں سرپد بوگ لوٹ ایت کہ پنجاپی زورگر تچکیں دژمنے، بلے آ وت ھمے سرڈگار ءِ جاہ منند اَنت۔ آیاں جیڑگ لوٹ ایت کہ آ بلوچ لس مردمانی بگیری ءَ زوراکی ءِ تہ ءَ وتی بھر ءَ ھوار کنگ ءُ گْوستانک ءِ تہ ءَ وت ءَ رزوا مہ کن اَنت چی ءَ کہ زوراکیاں ھواریں ھمک میاربار ءَ گڈی ءَ وتی کرتگیں کارانی دیمپانی کنگی اِنت۔
ڈاکٹر نسیم ءَ گْوشتگ بلوچ راجی زْرمبشت ( بی این ایم ) تچکی ءَ ھمے سرپد بیت کہ زوریں بیگواھی ریاستی شونداتانی بھر اِنت ءُ ریاست ھمے زوراکیانی زمہ وار اِنت۔ بلوچ گْوستگیں چینچو دھک اِنت کہ ھمے ریاستی زوراکیانی بگیری ءَ گھگیری کنگ ءَ اَنت ءُ چونیں ھم لوٹ ءُ دزبندی ءِ چمدار نہ اِنت بلکیں اے گْوستانکی راستی یے کہ زوراکیانی روچ ھسابی بہ اَنت بلے گھگیری مدام مان ایت۔