بلوچ راجی زْرمبشت ( بی این ایم ) ءِ جارکش ءَ وتی درشان ءَ گْوشتگ بلوچستان ءِ مڈیانی سر ءَ چم سک کنوکیں ڈنی شرکتاں ما شیوار کن ایں کہ آ ماں بلوچستان ءَ سرمایہ کاری ءِ بارہ ءَ مہ جیڑ اَنت ، بلوچستان گوں پاکستان ءَ پہ وتی آجوئی ءَ جنگ ءَ اِنت ءُ اے شرکت ماں اسلام آباد ءَ گوں درامدیں مردماں نندگ ءُ مسام کنگ ءَ اَنت ، ایشاں ءُ گوں ایشاں بیتگیں مساماں بلوچ بھ نہ من ایت۔
آئی ءَ گْوشتگ پاکستان مائنرلز انوسٹمنٹ فورم 2025 ءِ رد ءَ 8 ءُ 9 اپریل 2025 ءَ اسلام آباد ءَ دو روچی کانفرنسے بیتگ ھمیشی ءِ تہ ءَ بلوچستان ءِ زمین چیری مڈیانی سر ءَ گپ بیتگ۔ چہ ایشی ءَ پد کینیڈا ءِ کمپنی بیرک گولڈ کارپوریشن ءَ اے گپ راست لیک اتگ کہ ریکوڈک جوائنٹ وینچر شیئر ھولڈراں ھمے کار ءِ نوک تریں فزیبلٹی اسٹڈی کنگ من اتگ۔ بیرک گولڈ ءِ رد ءَ ھمے شور ءِ پد ءَ ھمے سال ءِ میان ءَ مزنیں بند ءُ ساچی کارانی نیمگ ءَ جزگ بیت ءُ سری پیداوار ءِ گمان داں 2028 ءِ گڈی ءَ اِنت۔
جارکش ءَ گْوشتگ کہ بیرک گولڈ ءِ کارمند دمپارہ گْوشگ بیتگ اَنت کہ آ بلوچستان ءَ سرمایہ کاری مہ کن اَنت ، چہ کینیڈا ءِ سرکار ءَ ھم دزبندی کن ایں کہ آ ھمے نام گپتگیں شرکت ءِ کارمندانی نوک آبادی روشت ءِ سر ءَ دلگوش گْور بہ کنت کہ آ شر زانت بلوچستان ءَ چی بیگ ءَ اِنت بلے پد ءَ ھم پہ سرمایہ کاری ءَ ھج ئِے کرتگ، اے روشت پدر کنت کہ آئی ءَ زر لوٹ ایت ، گوں مردمانی زندمان ءَ کار ئِے نیست۔ اد ءَ سرمایہ کاری ءِ من ھمیش اِنت کہ چد ءُ گیش کشت ءُ کوش بہ بیت۔پانکجنی ءِ ھما مانزمانی ءَ کہ پاکستان ءِ سرلشکر دیگ ءَ اِنت ، آئی ءِ من ھمیش اِنت کہ سیاسی توار نگٹ کنگی اَنت ، داں پاکستان چہ وتی میان استمانی بھائیوارانی کمک ءَ بلوچ ءِ مڈیاں آسانی ءَ رپت ءُ برت بہ کنت۔
آئی ءَ گْْوشتگ لجی گپے کہ پاکستان ءِ سروزیر ءَ اے کانفرنس ءِ تہ ءَ جار جتگ کہ ’’ آ سرمایہ کاراں وتی واھند من ایت ‘‘ اے چیردستیں سسا پنجاپ ءِ سروکاں مبارک بہ بیت بلے بلوچ راج وتی مڈیانی سر ءَ دگرانی واکداری ءَ نہ من ایت ناں کہ کسے ءَ پہ چار کلدار ءَ وتی واھند من ایت۔
آئی ءَ گْوشتگ کانفرنس ءَ امریکا ، چائنا ، سعودی عربیہ ءُ ووڈز میکنزی کمپنی ءِ جھگیراں بھر زرتگ کہ آ بلوچستان ءِ 6 ٹریلین ڈالر ءِ زمین چیری میڈیانی لٹ ءُ پل ءَ ھدوک اَنت۔پاکستانی مھترھند جھان ءَ چہ بلوچستان ءِ جیڑھانی دزمانجانی ءَ دارگ لوٹ ایت ءُ پہ ایشی ءَ بلوچستان ءِ جند ءِ مڈیانی لب ءَ دیگ ءَ اِنت۔اد ءَ پاکستانی لشکر بلوچ راج ءِ چکچینی کنگ ءَ اِنت ، سیاسی آجوئی پچ گرگ بیتگ اَنت ، اے ڈیھانی سرمایہ کاری مردمی جیڑہ ءِ تہ ءَ گیشی ءِ بنیاد بیت__ما دزبندی کن ایں کہ اے دارگ بہ بیت۔
بلوچ راجی زْرمبشت ( بی این ایم ) ءِ جارکش ءَ چد ءُ دیمتر ءَ گْوشتگ پاکستانی مھترھند بلوچستان ءِ پجیگ ءَ ماں پختونخوا ءَ ھم جھان ءِ مزنیں شرکتاں بھائیوار کنگ ءُ آ اود ءِ مڈیاں ابید چہ پختون راج ءِ واھگ ءَ بھا کنگ ءَ باڑا اِنت۔’ خیبرپختوانخوا ءِ پیش نھادی مائنز اینڈ منرلز بل 2025 ‘ پختون راج ءَ چہ آیانی مڈیانی واکداری ءَ زبھر کنگ ءِ کوشست اِنت ، ایشی ءَ ما ایر جن ایں۔ما پشتون راج ءِ دیدانک ءِ پلہ مرز ایں کہ اے مڈیانی سر ءَ آیانی تیوکیں ھندبندی ءِ اگبال منگ بہ بیت ، اے ھدابندی کہ گوں دگہ کس ءَ بھر ءُ بانگ کنگی نہ اِنت ، بزاں پشتون وتی مڈیانی ھدابند تیوک ءَ وت اِنت۔ ھمے پیم سند ءِ شھکور ءَ 6 نوکیں کینال جوڑ کنگ ءُ لشکر ءِ کشت ءُ کشاری ڈگارانی سیراپ کنگ ءِ شور اِنت ، چہ ایشی ءَ سند ءِ کشاورد ءِ جیڑہ گیشتر بہ اَنت کہ پیش ءَ آپ ءِ کمی ءِ آماچ اَنت۔ما اے شور ءِ بگیری ءَ ھم سندی راج ءِ دیدانک ءِ پلہ مرز ایں۔
آئی ءَ گْوشتگ ھمے وھد اِنت کہ چیردستیں راج وتی مڈیانی لٹ ءُ پل ءِ بگیری ءَ گوں ھم سنتیں توانے ءَ گھگیری بہ کن اَنت ، مئے جنگ یک اِنت ءُ مارا ھرچ سنگر ءَ ھم سنت بیگ ءُ جنگی کنگی اِنت۔ اگاں ما وتی اے یکجاھیں جنگ ءَ چہ یک دومی ءَ بے سما ءُ دیر بہ بہ ایں گڑا چہ ایشی ءَ زورگریں پاکستان ءَ سیت بیت کہ چیردستیں راجاں بھر کنت ءُ آیانی زمین ءُ ابرمی مڈیانی سر ءَ زورگر مان ایت ، چیردستیں راجانی مڈیاں چل ءِ نھاد ءَ پہ وتی سیت ءَ کارمرد کنت ، انچوش کہ چہ پاکستان ءِ جوڑ بیگ ءِ سری روچ ءَ کنان ءُ پیداک اَنت۔
جارکش ءَ گْوشتگ اے رد ءَ ما تچکے ءَ گْوش ایں کہ جھان ءَ چوناھیں ھم توانے بہ بیت ما پہ بلوچ ءِ سیتانی پھریزگ ءَ آئی ءِ دیم ءَ گھگیری کن ایں۔
