نبشتہ کار یاسین غنی ءَ بلوچ راجی زْرمبشت ( بی این ایم ) ءِ وانگ ءُ زانگی مراگشے ءَ گپ جنان ءَ گْوشتگ چین گوادر ءُ بلوچستان ءِ زمین چیری مڈیانی لوٹوک اِنت ءُ ھمے پیم روکپتی واک ھم دمگ ءِ مٹ بیوکیں سیاست ءَ چارگ ءَ اَنت۔ بلوچستان ءَ سھر ، رود ، آسن ، کرومائیٹ ، اشکر ، گیس ، سلفر ، تیل ءُ دگہ نایابیں زمین چیری مڈی ھست کہ پہ جھانی گزرانک ءُ ٹکنالوجی ءَ مزنیں ارزشتے دار اَنت۔اے مڈیانی لوٹ ءِ پد ءَ میان راجی واک ءُ سرمایہ کارانی دلگوش بلوچستان ءِ نیمگ ءَ اِنت۔دومی نیمگ ءَ ما بلوچ ءِ بستار وتی مڈیاں چوں پھریز ایں ، اے مئے سر ءَ اِنت بلے مارا دور ءُ باریگ ءِ پیچ ءُ تاب ھم چارگی اَنت ءُ ھمے رد ءَ شور کنگی اِنت۔
اے گپ آئی ءَ بلوچ راجی زْرمبشت ( بی این ایم ) ءِ وانگ ءُ زانگی تک ءِ رد ءَ بیتگیں ’’ زمین چیری مڈی ءُ جھانی جاور ءَ آیانی ارزشت ءُ سیت ‘‘ ءِ بنگپ ءَ زانشتی مراگش ءَ جتگ اَنت۔مراگش ءِ جارچین اعجاز اَت۔
بلوچستان ءِ مڈیانی بارہ ءَ آئی ءَ چد ءُ دیم گْوشتگ بلوچستان جھان ءَ ابرمی مڈیانی رد ءَ سرباریں دمگانی تہ ءَ یکے۔ھمے مڈیاں بلوچستان زورگرانی نشانگ جوڑ کرتگ۔چوش کہ پاکستان ءِ گیس ، مرمر ءِ سنگ ، اشکر ، کرومائیٹ ءُ دگرانی لٹ ءُ پل بہ بیت ، یا چین ءِ سینڈک پروجیکٹ یا گرمیں آپ ءَ وت ءَ سر کنگ۔چی ءَ اے کارانی تہ ءَ ارباں ڈالرانی سرمایہ کاری کرتگ داں آیاں دمگ چہ بلوچستان ءِ مڈیاں وتوازمند بہ بیت۔
یاسین غنی ءَ چد ءُ دیم گْوشتگ ما زان ایں کہ بلوچستان ءِ اے دمگ ، گچینی چہ سینڈک ءَ سھر ءُ رود مزنیں کچے ءَ در کنگ بیت بلے آ اود ءِ جاھمنند ءِ ونڈ ءَ ایوک ءَ اگوازی ( اگواز : ماحولیات ) تباھی ءُ لشکری پانگس منتگ اَنت ، بلوچستان ءِ گیشتریں دمگ لشکری ھنکین جوڑ کنگ بیتگ اَنت۔ پانگساں مردم کم منگہ کنگ بہ اَنت ، زور بیگواھی ءُ در آمیدگسی کوش ھم روچیگیں کار ءُ کردگار اَنت۔ شک ءِ سر ءَ بلوچ ورنا زور بیگواہ کنگ بہ اَنت ، اے درسیں زوراکیانی تہ ءَ چین رنگیں لٹ ءُ پل کنوکیں جھانی واک ءِ مزنیں دستے مان پرچا کہ آ گمان کنت کہ چیردستیں راج گوں جنگ ءُ لگتمالی ءَ چہ وتی دیدانک ءَ یک کر بہ اَنت۔
یاسین غنی ءِ گْوشگ اَت کہ چوناھیا اے راستی سرگْوز نہ بیت، جاھے کہ گھگیری بیت جھان چہ آ اود ءَ سرمایہ کاری کنگ ءَ پھریز کت ءُ اے بلوچانی وش بھتی اِنت کہ بلوچ سرڈگار ءَ شریں پیمے ءَ گھگیری بیگ ءَ اِنت چہ ایشی ءَ سرمایہ کار وتی زراں کاربندگ ءَ ترسگ ءَ اَنت۔ پرچا کہ آیاں اے گپ سما اِنت کہ اے دمگ ءَ گوں زور ءَ گھگیری بیگ ءَ اَنت ءُ آ اود ءَ سرمایہ کاری بیت نہ کنت۔
