بلوچ راجی زْرمبشت ( بی این ایم ) ءِ جارکش ءَ گْوشتگ گل ءِ کلانھیں باسک قاضی ھاشم چہ شول کشیں نادْراھی ءَ پد بیران بیتگ ، آئی ءِ ھمگرنچی ، لیکھی بندوکی ءُ پہ گل ءَ شپ ءُ روچ کار کنگ ءِ برپشت ءَ گل آئی ءِ کرد ءُ کاراں ساڑا ایت۔ آ گل ءِ مڈی اَت ، دژمن ءِ زوراکیاں پد ھم آ چہ گل ءِ مراگشاں پدکنز نہ بیتگ۔
جارکش ءَ گْوشتگ قاضی ھاشم ماں جاھو ءَ چہ بی این ایم ءِ بنداتی سنگتاں یکے اَت ، آ استاد علی جان ءُ ڈاکٹر منان جان ءِ نزیکیں ھمراھے اَت ، آئی ءَ اے دمگ ءَ پہ گل ءِ پرکار کنگ ءَ بنکی کرد پیلو کرتگ۔
آئی ءَ گْوشتگ قاضی ھاشم 25 اگست 2009 ءَ شھید الطاف بلیدھی ءِ سری سالروچ ءِ دم ءُ درگت ءَ جاھو ءِ بازار ’ باغ ‘ ءَ استاد علی جان ، ناکو خیربخش ءُ شھمیر حاصل قاضی ءِ ھمراہ مراگش ءِ چن ءُ لانچ ءَ اَت کہ پاکستانی لشکر ءِ چیرکاں آیانی سر ءَ ارش کرت ، اے ارش ءَ قاضی سکا ٹپی بوت ءُ آئی ءِ دستے پرشت ، آیانی میتگ کوھڑو ءَ وھدے پاکستانی لشکر ءَ ٹپ ماں ٹپ ارش کرت ءُ گڈی ءَ سرجمیں میتگ انگر کرت ءُ آ اود ءَ وتی بنجل جوڑ کرت ، گڑا قاضی گوں وتی کھول ءَ لڈ اِت ءُ روکپتی بلوچستان ءَ شت ، آ اود ءَ مزنیں کھولے ناگیگیں جاورانی تہ ءَ داشت بلے آئی ءِ گوں گل ءَ ھمگرنچی ءُ ھمراھی ءِ تہ ءَ ھچ کمی نے اتک۔
جارکش ءَ گْوشتگ 2013 ءَ گل ءِ ھما وھدیگیں سر کارگشاد ڈاکٹر منان ءُ انیگیں سر کارگشاد دل مراد ءَ قاضی ھاشم ءِ سرشونی ءَ سورگر ءِ کوھی ھلکانی تر ءُ تاب کرت ءُ کوھی ھلک ءُ ھنداں نندوکیں بلوچاں گل ءِ مراگش ءُ بلوچ راجی آجوئی ءِ کلوہ سر کرت چہ ایشی ءَ پد سورگر راجی گھگیری ءِ سنگرے جوڑ بوت۔
