شال: بلوچ نیشنل موومنٹ ءِ ترجمان ءَ وتی درشان ءَ گْوشتگ زوراکیانی آماچ ءُ ایردستیں درسیں راجانی تورشت یک وڑ اَنت۔ما پشتونوا ءَ مھترھندی زوراکی ءُ گلگت بلتستان ءَ بومیانی زمیناں گوں زور ءُ زوراکی دستیگ کنگ ءَ ایر جن ایں۔گلگت بلتستان ءُ پشتونوا ءِ مردمانی گھگیریاں تچک کرتگ کہ پاکستان ءَ ھچ راج پنجاپ ءِ بالادستی ءِ منگ ءُ چہ وتی راجی پجار ءَ دستبردار بیگ ءَ ساڑی نہ اِنت۔زیردستیں راجانی زمین ءُ مڈیانی سر ءَ پاکستان ابید چہ زوراکی ءُ زور ءَ یک روچے ھم وتی واکداری ءَ برجاہ داشت نہ کنت۔
’’ مروچی بلوچ، پشتون ، سندی ، کشمیری، گلگت بلتستان ءُ سرائیکی وسیب ءِ ملیوناں مردم چہ پنجاپ ءِ واکداری ءَ شیزار اَنت۔چہ ایشی ءَ پاکستان ءِ برجاہ بیگ ءِ نیمون آسر بیتگ۔ھرچ راج ءَ وتی زمین ءِ سر ءَ ابید ڈک ءُ بند ءَ سرجمیں واک ءُ آجوئی بیگ لوٹ ایت۔چہ زیردستیں زند ءَ دمگ ءِ تہ ءَ نندوکیں راجانی راجی مانشت بیگواھی ءِ کنڈ ءَ سر اِنت۔گلگت بلتستان ءِ مردم ءُ پشتون راج ءَ ماں ھرچ سنگر ءَ وتی گھگیری بنا کنگ لوٹ ایت۔‘‘
پاکستانی لشکر گلگت بلتستان ءَ بومیانی زمیناں دستیگ کنگ ءُ آیانی راجی پجار ءَ ببا دیگ لوٹ ایت ءُ ایشی ءِ بگیری ءَ گھگیری کنوکیں مردمانی توار گوں زوراکی ءَ ایرموش کنگ بیگ ءَ اِنت۔
جارکش
بی ان ایم ءِ جارکش ءَ گْوشتگ زیردستیں راجاں پہ وتی کسان کسانیں آسراتیاں گردویے (گول / دائرہ ) ءِ چاگرد ءَ بے سیتیں جھد کنگ ءِ جاہ ءَ پہ وتی آجوئی ءَ زورگیریں پاکستان ءِ بگیری ءَ گوں ھم سنتی ءَ جھد کنگ لوٹ ایت۔
آئی ءَ گْوشتگ پاکستانی لشکر گلگت بلتستان ءَ بومیانی زمیناں دستیگ کنگ ءُ آیانی راجی پجار ءَ ببا دیگ لوٹ ایت ءُ ایشی ءِ بگیری ءَ گھگیری کنوکیں مردمانی توار گوں زوراکی ءَ ایرموش کنگ بیگ ءَ اِنت۔پاکستان ءَ بلوچانی ھم ماں وتی جند ءِ زمین ءَ کچ ءُ سرانی کم کنگ ءَ گوں انچیں پندلاں بنا کرتگ اَت۔گوادر ءِ پجیگ ءَ بازیں دمگاں مردمانی زمین دستیگ کنگ ءُ دری مردمانی آباد کنگ ءِ شوندات جوڑ کنگ بیتگ۔
جارکش ءَ گْوشتگ زمینانی دستیگ کنگ ءِ بگیری ءَ گلگت بلتستان ءِ مردماں باز روچ اِنت کہ زھرشانی کنگ ءَ اَنت بلے گوشداروک نیست۔پاکستانی مھترھند ءِ پلپا (پِل پَا / ستون) ایوک ءَ پنجاپ ءَ مزدانک (مُز دانک / انصاف) ءُ آسراتی دئے اَنت ءُ دگہ راج گوں چیردستی چماں چارگ بہ اَنت۔چہ ایشی ءَ ھمے راجاں وتی چیردستی ءِ سما بیتگ ءُ آ ایشی ءِ بگیری ءَ جھد کنگ ءَ اَنت۔
نی یک رندے پد ءَ چہ امریکا ءُ دگہ ڈیھاں ڈالر گرگ ءَ پشتون راج ءِ سر ءَ نوکیں جنگے منڈینگ ءِ چن ءُ لانچ بیگ ءَ اِنت۔
جارکش
آئی ءَ گْوشتگ پشتونوا ءَ پاکستانی مھترھند یک رندے پد ءَ لشکرکشی ءَ سر گیپتگ۔گْوست ءَ ھم سلاھبندیں گلانی بگیری ءَ ’کارروائی‘ ءِ نام ءَ مردمانی مڈی تاوان دیگ بیتگ اَنت۔ ھزاراں بے میار کشگ بیتگ ءُ لکا مردمانی لوگ ءُ کار بیران کنگ ءُ آ پہ لڈ ءُ بار ءَ لاچار کنگ بیتگ اَنت۔ نی یک رندے پد ءَ چہ امریکا ءُ دگہ ڈیھاں ڈالر گرگ ءَ پشتون راج ءِ سر ءَ نوکیں جنگے منڈینگ ءِ چن ءُ لانچ بیگ ءَ اِنت۔
جارکش ءَ گْوشتگ پشتون ءُ بلوچ دوئیں ابرمی ھم سنت اَنت دوئیں راجانی سیت گوں یک دومی ءَ بندوک اَنت۔چہ نام ءِ ناشرکاری ءِ بگیری ءِ جنگ ءِ ساناں بلوچستان ھم سانمند بیتگ۔اے جنگ ءِ نیمون ءَ پاکستانی مھترھند راجی جست ءَ چیرترینگ لوٹ ایت کہ چہ ایشی ءِ گیشینگ ءَ ابید دمگ ءَ ایمنی برجاہ بیت نہ کنت۔