شال: بلوچ راجی زْرمبشت ( بی این ایم ) ءِ کارگشاد دل مراد ءَ پاکستانی لشکر ءِ ماں بلوچستان ءَ کور کمانڈر آسپ گپور ءِ گْوادر ءِ مردمانی داتگیں بیھار ءِ بگیری ءَ گوشتگ کہ آسپ گپور ءِ درشان نوکابادی روشت ءُ سسا ءَ پیش دار ایت۔ آ ھمے سرپد بیت کہ بلوچستان ءَ مردم پاکستان ءِ زیردست اَنت ءُ آ ھمے چماں چارگ لوٹ اَنت۔ اے راستی یے کہ پاکستان ءَ بلوچ سرڈگار ءَ وتی زورگیری برجاہ داشتگ ءُ نوکابادی آزار دئی ءُ چکچینی کنگ ءَ اِنت، بلے بلوچ راج گھگیری ءِ زْرمبشت ءِ تہ ءَ نوکیں رنگے آرگ ءَ اِنت۔ دیمونیانی نوکیں گْوستانکے برجاہ اِنت۔ ایشی ءِ بگیری ءَ بلوچ ءَ جنگ ءَ پروش نہ وارتگ بلکیں جنگ برجاہ اِنت ءُ گھگیری ءِ زْرمبشت ءِ تہ ءَ بلوچ راج جْوانیں دابے ءَ سوبین بیگ ءَ اِنت۔
دل مراد ءَ گوشتگ کہ آسپ گپور ھما اِنت کہ آئی ءَ بلوچ راج ءِ بگیری ءَ برجاھیں چکچینی من اِتگ ءُ گوشتگ اَت "ما نہ لوٹ ایں کہ مردم بیگواہ بہ بہ اَنت بلے جنگ ءُ مھر ءَ ھرچی روا اِنت”۔ آئی ءَ پشتونانی بگیری ءَ کینگ ءِ درانگازی کرتگ۔ گوں آسپ گپور ءِ آیگ ءَ زور بیگواھی ءِ تہ ءَ گیشی اتکگ۔ آسپ گپور ءِ درشان گواچن اِنت کہ بلوچ راجی آجوئی ءِ جنگ جھد ءِ مادنیں کشک اِنت ءُ پاکستان ءِ مھترھند ءِ تْرام ءِ تہ ءَ پرایمنیں جھد ءِ راہ ءُ در نیست اَنت۔
آئی ءَ گوشتگ کہ اے تیوک ءَ آسپ گپور ناں بلکیں تیوگیں مھترھند ءُ آئی ءِ لشکر ءِ سسا ءُ سوگھی اِنت کہ بلوچ راج لپاشگ بہ بیت۔ چہ ھمے گوادر ءَ بلوچ راجی زْرمبشت(بی این ایم) ءِ کماشیں سروک نسیر کمالان، مھبوب واڈیلہ، اھمد داد، ماسٹر ابدل رھمان آرپ، آرپ نور، ساجد بلوچ، سدیک ایدو، لالا ھمید، کامریڈ کیوم، یوسپ نذر ءَ ھوار بازیں ھمبل زور بیگواہ کنگ ءُ آیانی ژانگولیں کنٹ چگل دیگ بیتگ اَنت۔ انوں پر ایمنیں جھد کنوکاں بیھار دیگ بیگ ءَ اِنت کہ کسے ءَ زھرشانی کنگ ءِ جھد کرت آ زندان ءَ بند کنگ بیت۔ ھمے جاوراں ، دگہ پیریں سروکے واجہ ھسین واڈیلہ بندیگ کنگ بیتگ۔ اے وڑیں بیھار ناں تیوک ءَ زور ءِ مستی ءَ ھنوشیں واکدارے وتی زیردست ءَ دات کنت بلے آجوئیں راج ءُ چاگردانی تہ ءَ اے وڑیں بیھار ءِ گت ءُ گمان بیت نہ کنت۔ بلوچ راج ءَ ھمک گام ءَ پیش داشتگ کہ آ پہ پاکستان ءِ زوگیری ءِ بگیری ءَ گوں لب ءُ ملاماں نہ تر ایت بلکیں وتی ھمے گھگیری ءَ برجاہ دار ایت۔
