سائیں جی ایم سید ءِ سوج ، سسا ءُ لیکہ پہ ما راھشون اَنت۔ڈاکٹر نسیم

بلوچ راجی زْرمبشت (بی این ایم) ءِ سرکماش ڈاکٹر نسیم ءَ نامی ئیں راجدوستیں سندی راھشون سائیں جی ایم ایم سید ءِ 119 می بیتکی روچ ءِ درگت ءَ گْوشتگ آ ناں ایوک ءَ پہ سندیاں بلکیں پہ دمگ ءِ دگہ ایردستیں راجاں ھم پرمنگھیں راھشونے۔آئی ءَ گوں وتی زانشت ءُ سیاسی دیدانک ءَ سندی راج ءُ راجدوستی مادنیں راھے ءَ پرینتگ۔شک نیست کہ اے سائیں ءِ درس ءُ درونتانی برورد اِنت کہ انی سندی راج چہ راجدوستی باھند ءُ آجوئی ءِ مارشت ءَ سرچکار اِنت۔پمیشکا آ سندھیانی من اتگ ءُ بے کچوئیں راھشونے ءُ بلوچ ءِ پجیگ ءِ دمگ ءِ درسیں راج آئی ءَ گوں پرمنگھیں نگاھاں چار اَنت۔

آئی ءَ گْوشتگ سندی دود، سندیانی سیکولر ءُ سوپی راہ ءُ ربیدگانی سر ءَ زند گْوازینگ ءَ آیاں راجے ءِ بستار ءَ زندگ دارگ ءَ بنکی کردے پیلو کرتگ۔پاکستان ءِ چیردستیں دگہ راجانی وڑ ءَ سندیانی ھزارھاں سال ءِ گْوستانک، دود ءُ ربیدگانی تہ ءَ پاکستان ءَ مزھبی تْرند روئی ھوار کنگ کوشست کرتگ داں آیانی ربیدگ لوڑ بلوڑ کنگ ءُ آ چہ وتی پجار بے سما کنگ بہ بہ اَنت۔الم زیردستی راجانی پجار، دود ءُ ربیدگانی پھزگ گوں ایشی ءَ بندوک اِنت کہ آ زورگر ءُ واکدار ءِ بگیری ءَ چوں گھگیری کنت۔ چہ زورگر ءِ بگیری ءَ گھیری کن ایں نی ما راجے ءِ بستار ءَ زندگ بوت کن ایں۔

ڈاکٹر نسیم بلوچ ءَ گْوشتگ سائیں جی ایم سید رنگیں زانتکاریں راھشونانی سوج ، سسا ءُ لیکہ پہ ما راھشون اَنت۔آئی ءَ ھما نوکیں راہ ءُ رند ءَ کہ سندی راجدوستی پرینتگ ، ھمیشانی سر ءَ کاربند بیگ ءَ سندودیش آزاد بوت کنت۔ما درابرمی مھترھندی ءِ چیردست اِنت، آ اود ءَ راجمستری، مردمی منگہ ءُ اگبال نگواہ اَنت۔ھم سنتیں راجانی من اتگیں اگبال آجوئی ءِ جھد کنوکاں زندان، آزار ، زور بیگواھی ، دزگیریں کوش ءُ دگہ ھمے پیمیں زوراکیانی دیمپانی اِنت۔اے دیمونیانی برورد ءُ لوٹ راجی آجوئی اِنت۔ مارا وتی اے دژمن ءِ بگیری ءَ پجیگ ءَ جھد کنگ لوٹ ایت۔

آئی ءَ گْوشتگ برتانیا ءُ روکپتی تواناں نام ء مزھبی لیکہ ءِ سر ءَ پہ وتی سیتاں پاکستان رنگیں ناابرمی مھترھندے جوڑ کرت بلے بلوچ ، سندی ءُ پشتون ھزاراں سال ءِ گْوستانک ءُ دود ءُ ربیدگ ءِ واھند اَنت۔ پاکستان مارا زیردست کنگ ءُ مئے راجی مانشت ءُ پجار ءَ گار کنگ ءِ دمب ءَ اِنت۔

بی این ایم ءِ سرکماش ءَ گْوشت کہ ما سائیں جی ایم سید ءِ 119می بیتکی روچ ءَ پہ آئی ءَ ستک گْوند ایں ءُ اے مسام ءَ سرسبزین ایں کہ ما چیردستیں وتی یکیں دژمن ءِ بگیری ءَ یکجا ایں۔مروچی چین ءُ پاکستان گزرانکی راھداری ءِ نام ءَ چین ھم بلوچستان ءُ سندو دیش ءَ مئے مڈیانی لٹ ءُ پل ءُ چکچینی ءَ ھوار بیتگ۔مارا راجانی بستار ءَ بازیں ڈاھانی دیمپانی اِنت۔َ مارا ھمک پڑ ءَ گوں راجدوستی باھنداں تْرام ءُ پرتوان بیگ ءُ ایشانی دیم دارگی اِنت۔