شال: بی این ایم ءِ درسیں تک ، ڈنی کارانی تک، بی این ایم ءِ مردمی اگبالانی تک ءُ رسانکدری تک ءَ پرمان دیگ بیتگ کہ آ وتی اگدہ ءُ زمہ واریانی اندر ءَ بلوچستان ءَ پاکستانی مھترھند ءِ انیگیں زوراکی ءُ زور بیگواھیانی بگیری ءَ تْرام ءُ ھمگرنچیں مراگش برجم بہ دار اَنت ءُ اے زوراکیانی جھان ءِ دیم ءَ سھرا کنگ ءَ زھرشانی کنگ بہ بیت۔
بی این ایم ءِ اے باوست ءَ رسانکدر ءَ آگاھی تالان کنگ بیت،زھرشانی کنگ بیت، جتائیں میان استمانی تْرامگیج نمدی نبیسگ بہ اَنت، درانڈیھ ءَ سپارتی تک ءَ نند ءُ گند کنگ بیت ءُ اے درسیں سرگرمی گوں یک دومی ءَ ھمگرنچ کنگ ءُ رسانکدری تک ءِ کمک ءَ ماں رسانکدر ءَ سھرا کنگ بہ اَنت۔
بی این ایم ءِ جارکش ءَ وتی درشان ءَ گْوشتگ برجاھیں سال ءِ چہ بنداتی ماہ ءَ پاکستانی لشکر ءُ گوں آئی ءَ ھمگرنچیں تْرامگیجاں بلوچستان ءَ برجاھیں زوراکی ءِ تہ ءَ گیشی آؤرتگ۔پاکستان ءِ پارلیمانی گل وھدے چپانکی (اپوزیشن) ءَ بہ اَنت گڑا ماں بلوچستان ءَ مھترھندی زوراکیاں من اَنت بلے ھمے گل وھدے سرکار ءِ بھر بہ اَنت گڑا زور بیگواھی ءُ لشکرکشی ءِ تہ ءَ کمی آیگ ءِ جاہ ءَ گیشی کئیت۔زرداری ءِ مھتری ءَ بہ گر داں شھباز شریپ ءِ سر وزیری ءَ ماں بلوچستان ءَ مھترھندی زوراکیانی دْرچ ءُ تْرندی ءِ تہ ءَ ھچ وڑیں کمی نے اتکگ۔اے ھما گل اَنت کہ بلوچستان ءِ جیڑہ ءَ ڈکٹیٹر پرویز مشرف ءِ کرد ءُ کار لیک اَنت ءُ وت ءَ بے میار کن اَت۔ بلے مشرپ ءِ چہ واکداری ءَ یک کر بیگ ءَ پد ھم بلوچستان ءَ مھترھندی زوراکیانی تہ ءَ کمی نے اتکگ۔پاکستان ءِ درسیں پارلیمانی گل بلوچستان ءِ سر ءَ بیوکیں زوراکیاں ھمدستیں میاربار اَنت۔ھمے پیم بلوچ پارلیمانی گلانی بلوچ دژمنیں کرد ھم ڈالچار کنگ نہ بیت۔مروچی بلوچ راج زانت کہ اد ءَ واکداریں گل زوراکی کنگ ءَ نہ اِنت بلکیں پاکستانی مھترھند کنگ ءَ اِنت کہ ایشی ءِ تہ ءَ درسیں منک (مِ نُ ک : پِلپا ، ستون ) ءُ اے منکاں ھلائینوکیں مردم برابری ءَ ھمدستیں میاربار اَنت۔
جارکش ءَ گْوشتگ 3 فروری ءَ چہ ناشناس کالونی، گیشکوری ٹاؤن، شال ءَ مھمد رھیم زھری، آئی ءِ مات بس ھاتون،آئی ءِ جنین رشیدہ زھری ءُ آئی ءِ دو کسانسالیں چک دوئا زھری ءُ یھیا زھری پاکستانی لشکر ءَ دزگیری ءَ پد زور بیگواہ کرتگ اَنت۔آئی ءِ مات ءُ آئی ءِ دو کسانسالیں چک چار روچ ءَ پد ءُ آئی ءِ جنین 11 روچاں پنھانیں آزارجاھاں زور بیگواہ کنگ ءَ پد یلہ کنگ بیتگ وھدے کہ مھمد رھیم زھری دنیگت زور بیگواہ اِنت۔
آئی ءَ گْوشتگ رھیم زھری ءِ کھول پیش ءَ ھم پاکستانی لشکر ءَ نشانگ کرتگ۔آئی ءِ کھول ءَ رھیم زھری ءَ ابید لیاکت ءُ زکریا ھم زور بیگواہ اَنت۔وھدے کہ تابش وسیم ءُ زھور زھری پاکستانی لشکر ءَ کشتگ اَنت۔ماما شریپ ءِ سر ءَ بیتگیں کوشی ارش ءَ آئی ءَ شش تیر پیوست بیتگ۔
جارکش ءَ گْوشتگ گوں بلوچ راجی آجوئی زرمبش ءَ بندوکیں مردمانی کھولاں پاکستانی لشکر وتی مچانکی سزا ( اجتماعی سزا) ءِ زورگْوش ءُ درمردمی شوندات ءِ رد ءَ نشانگ کنگ ءَ اِنت۔ایشی ءِ رد ءَ ھما مردمانی کھول ھم نشانگ کنگ بیگ ءَ اَنت کہ گوں پاکستانی لشکر ءَ میڑاں شھید بیتگ اَنت یا ھما پرایمنیں سیاسی کارکن کہ زور بیگواہ اَنت یا آ ماں آزار جاھاں کشگ ءُ آیانی کنٹ چگل دیگ بیتگ اَنت۔
’’ شھید سپاھان بلوچ راجی زْرمبشت ( بی این ایم) ءِ باسک اَت۔آئی ءِ چک زمان 10 پروری ءَ پاکستانی لشکر ءَ دزگیر کنگ ءَ پد زور بیگواہ کرتگ۔چہ ایشی ءَ پیش 9 جون 2020 ءَ ھم پاکستانی لشکر ءَ آ دزگیری ءَ پد زور بیگواہ کرتگ ءُ سکا آزار دیگ پد یلہ داتگ اَت۔10 پروری ءَ آ یک رندے پد ءَ زور بیگواہ کنگ بیتگ۔وھدے آئی ءِ کھول ءَ پہ آئی ءِ زور بیگواھی ءِ بگیری ءَ زھرشانی کرت گڑا آیانی لوگ ءِ سر ءَ پاکستانی لشکر ءَ بیڑ برت ءُ آئی ءِ کھول ءِ مردم لٹ دات اَنت۔3 پروری ءَ پاکستانی آمیدگس ءِ پرمان ءَ یلہ بیتگیں ابدل ھپیز زھری زندان ءِ دیم ءَ پاکستانی چیریں واکانی کارمنداں پد ءَ آوار جنگی کرت ءُ چہ آئی ءِ کھول ءِ گھگیری ءَ آیانی سر ءَ تیرگواری کرت۔چہ گھگیری ءَ آئی ءِ آوار جنگ ءِ کوشست بے سوب بیتگ بلے آ ءُ آئی ءِ کھول ءِ دگہ مردمانی زندگی انی ھم ترس ءِ تہ ءَ اَنت۔‘‘
جارکش ءَ گْوشتگ ماں درانڈیھ ءَ بی این ایم ءِ تک، بنجاھی اگدہ دار ، بنجاھی پتر ءِ باسک ءُ کارتکانی (ڈیپارٹمنٹ) زمہ وار بلوچستان ءَ انیگیں ویلانی پژدر ءَ شریں باوستے ھلائین اَنت۔ اے باوست ءَ جھان ءَ منارینگ ءِ کوشست کنگ بیت کہ آ بلوچستان ءِ آجوئی ءِ زْرمبشت ءِ پلہ مرزی بہ کنت پرچا کہ ابید چہ بلوچستان ءِ آجوئی ءَ بلوچ راج چہ مردمی منگہ ءُ مردمی اگبالاں زبھر بیت۔
