بلوچ راجی زْرمبشت (بی این ایم) ءِ سرکماش ڈاکٹر نسیم ءَ بارکان ءَ بیتگیں دردناکیں ویل ءِ بارو ءَ گْوشتگ کہ مھترھند ءُ مھترھند ءِ چریکاں بلوچ ءِ چکچینی ءُ زوراکیانی تہ ءَ تیزی آؤرتگ۔ بارکان ءَ دمگ ءِ ایم پی اے ءُ کاسگ چٹیں وزیر ابدرھمان کیتران ءَ ماتے گوں شش زھگاں ھوار وتی جند ءِ بندیگجاہ ءَ بند کرتگ، کہ ایشانی تہ ءَ کسانیں جنکے ھم ھوار بیتگ۔ اے داں چار سال ءَ جانی، سسائی ءُ جنسی زوراکی ءِ نشانگ کنگ ءَ پد کشتگ اَنت ءُ ایشانی جون سئے شمبے ءِ روچ ءَ چہ ابدرھمان کیتران ءِ ماڑی ءِ نزیک ءَ دزکپتگ اَنت۔ اے رستری ءِ پسو دیگ ءَ مردماں اے رستر میلیں ءِ مردم ءِ بگیری ءَ گھگیری کنگ لوٹ ایت۔ مھترھند ءُ مھترھند ءِ چریکانی بگیری ءَ گھگیری کنگ پہ ما درساں ھژدری اِنت۔ بلوچ چاگرد ءِ تہ ءَ چوشیں کردانی ھچ جاہ نیست۔ پاکستانی ریاست ءَ زورگپتیں بلوچستان ءَ راجدوستیں سیاست ءِ سر ءَ پابندی جتگ ءُ مئے سرڈگار پارلیمانی گلانی دست ءَ داتگ داں آ بلوچ دودمان ءَ آسانی ءَ بہ لپاش اَنت ءُ ھلاس بہ کن اَنت۔
ڈاکٹر نسیم ءَ گْوشتگ کہ زھگانی پِت ھان مھمد گزینی مری ءَ باز رند ءَ ماں چاگردی رسانکدر ءَ چہ وتگڑیں ریاست، ریاست ءِ تْرامگیج ءُ چہ وتگڑیں ٹکی سروکاں کمک ءِ دزبندی کرتگ بلے چوش کہ آ بلوچے پمیشکا کس ءَ آئی ءِ گپ گوش نہ داشتگ۔ درسیں ٹکی مردم زیک ھم بےتوار بیتگ اَنت ءُ مروچی آیانی کُشگ ءَ پد ھم بےتوار اَنت پرچا کہ آیانی ءُ ابدرھمان ءِ واجہ یکین اِنت۔
’’اے زھگانی ابدرھمان ءِ جند ءِ زندان ءَ ساڑی بیگ ءِ بارو ءَ وت پاکستان ءِ سینیٹ ءَ سینیٹر کامران مرتزا ءَ نشاندھی کرتگ اَت کہ ھان مھمد ءِ جنین ءُ زھگ وزیر ءِ جند ءِ زندان ءَ بند اَنت۔ اے باروا کس ءَ دلگوش نہ دات پرچا کہ بلوچستان ءِ درسیں ایم پی اے جی ایچ کیو ءِ چیردستی ءَ نامینگ بہ اَنت۔ ءُ وزیر بیگ ءِ پد ءَ آیاں بلوچانی سر ءَ زوراکی ءُ چکچینی ءِ زمہ واری دیگ بیت۔ اے وھد ءَ وتگڑیں پارلیمان ءِ درسیں باسک پاکستانی لشکر ءِ گْوشگ ءِ پد ءَ بلوچستان ءَ مردمانی کم منگہ کنگ، کشت ءُ کوش، راجدوستیں سیاست ءِ آسرینگ، آجوئی دوستانی چاریگی کنگ ءُ مزھبی ناشرکاری ءِ تالان کنگ ءَ گون اَنت۔ چوشیں ویلانی سر ءَ آیانی بےتواری وت مئے دیدانک ءَ راست کنت۔‘‘
آئی ءَ گْوشتگ کہ ابدرھمان کیتران ءَ گوں ھان مھمد مری ءِ کسانیں جنک ءَ جنسی زوراکی کرتگ ءُ سئے شمبے ءِ روچ ءَ ھلار کرتگ ءُ پہ نترسی کشتگ، اے ھم ھمے گپ ءِ مناک اِنت کہ وتگڑیں وزیر وتی واجہ ءِ پرمان ءِ رد ءَ ھمے کار ءَ کنگ ءَ اِنت۔ دومی نیمگ ءَ اے ویل ماھل ءِ آوار جنگ ءِ نیمگ ءَ مردمانی نادلگوش کنگ ءِ جھدے۔ بارکان ءِ ویل سک دردناک ءُ مزنیں میارے۔ پاکستانی تْرامگیجاں پیش ءَ واھگ دار اَنت کہ بلوچاں بے کٹین اَنت۔ نوں وھد ھمیش اِنت کہ جھانی تْرامگیج بلوچستان ءَ دزمانجنی بہ کن اَنت ءُ بلوچ ءِ چکچینی ءِ گِر ءُ دار کنگ ءَ وتی کِرد ءَ پیلو بہ کن اَنت۔‘‘
ڈاکٹرنسیم ءَ گْوشتگ کہ مھترھند ءِ ادارھانی چیردستی ءَ وتگڑیں وزیر ابدرھمان کیتران ءَ ھان مھمد مری ءِ لوگبانک گراناز، آئی ءِ جنک پرزانہ، بیست ءُ دو سالی بچ مھمد نواز، پانزہ سالی بچ ابدل کادر ءُ آیانی کسانیں جنکے گوں دردناکی ءَ کشتگ ءُ جون چگل داتگ اَنت۔گراناز ءَ وتی زند ءَ ابدرھمان ءِ سر ءَ بھتام جتگ اَت ءُ اے گپ راست بیتگ اَت کہ اے کھول ابدرھمان ءِ زندان ءَ بندگی (غلامی) زندگی یے گْوازینگ ءَ لاچار اَنت۔ پاشک بیگ ءَ ابید ھم ابدرھمان کیتران ءَ چہ مھترھند ءِ راھبنداں نہ ترس اِت ءُ ایشانی کشگ ءَ چک ءُ پد نہ بوت پرچا کہ آئی ءَ زانتگ اَت کہ مھترھند ءِ تْرامگیج آئی ءَ پھریز اَنت۔
بی این ایم ءِ سرکماش ءَ گْوشتگ کہ بارکان ءُ اے وڑیں ویلاں پد اگاں انگت کسے ھمے سرپد بیت کہ آ پاکستانی بند ءُ بست ءِ تہ ءَ بلوچ ءِ اگبال ءُ ننگ ءَ پھریز ایت گڑا سک رَد اِنت۔ پارلیمانی گلانی باسکاں اے گپ زانگ ءُ بلوچ آجوئی جُھد ءَ ھواری گلانی پلہ مرزی کنگ لوٹ ایت داں باند ءَ آ وت ءَ تاھیر دات بہ کن اَنت ءُ پہ آؤکیں پدریچ ءَ جوانے درورے ایر کرت بہ کن اَنت۔اگاں ناں گڑا گْوستانک ءَ آ ابدرھمان کیتران ءِ وڑیں کردانی میار باریاں بائیوار لیکگ بہ اَنت۔
