شال: بلوچ راجی زْرمبشت( بی این ایم) ءِ جارکش ءَ گْوشتگ پولیس ءِ نام ءِ ناشرکاری ءِ گر ءُ داری تک (سی ٹی ڈی) ءَ گوں لٹ ءُ کٹ ءَ چہ ماھل ءَ دروگیں درشان گیپتگ۔چہ آزار ءَ گرگ بیتگیں درشان آئی ءِ سر ءَ ماں زندان ءَ ترندیں زھنی ءُ بالادی آزار ءَ گواچن کنت۔
آئی ءَ گْوشتگ ماھل گوں سیاسی ءُ زْرمبشتی کھولے ءَ سیادی دار ایت۔ماھل ءِ دسکیچ بی بی گل ’مردمانی اگبالانی پتر بلوچستان‘ ءِ سرکماش اِنت ، آئی ءِ ماں زور بیگواھیں مردمانی درا کنائینگ ءِ زرمبشت ءَ سھرائیں کردے ھست۔ھمے پیم پری گل ھم زور بیگواھیں مردمانی درا کنائیںگ ءَ برجم بیتگیں زھرشانی ءُ ننداکاں ھوار بیتگ۔دروگیں کیساں آیانی جنوزامیں نشار دزگیر کنگ ءُ آیانی کھول ءِ سر ءَ زور دیگ بیگ ءَ اِنت کہ آ بلوچستان ءِ تہ ءَ مردمانی اگبالانی بگیریانی سر ءَ بے توار بہ بہ اَ نت۔پاکستانی لشکر ءِ لوٹ ءَ سی ٹی ڈی ءَ بی بی گل ءُ پری گل گوں جنگی گلے ءَ ھمگرنچ کرتگ اَنت داں ایچ آر سی بی ءِ کرد ءُ کار سانمند بہ بہ اَنت ءُ مردمی اگبالانی بارہ ءَ بی بی گل ءُ ایچ آر سی بی ءِ کوشستانی دیم گرگ بہ بیت۔
جارکش ءَ گْوشتگ اے سری رند نہ اِنت کہ پاکستانی لشکر جنیناں نشانگ کنگ ءَ اِنت۔ چہ ایشی ءَ پیش ھم بلوچ سیاسی کارکنانی چک، جنین ءُ ھما مردم نشانگ کنگ بیتگ کہ وت ھچ گل ءَ ھوار نہ بیتگ اَنت۔مچی ڈنڈ ءِ اے شوندات ءِ پارست ءَ پاکستان ماں بلوچستان ءَ راجی زْرمبشت ءِ سان ءَ دارگ لوٹ ایت داں بلوچ بہ ترس اَنت ءُ چہ آجوئی ءِ زْرمبشت ءَ دست ءَ بہ کش اَنت۔
آئی ءَ گْوشتگ ماھل پاکستانی لشکر ءَ چہ لوگ ءَ چست کنگ ءَ پد درمردمی آزار داتگ ءُ پد ءَ سی ٹی ڈی ءِ پارست ءَ آئی ءِ دزگیری من اتگ۔دزگیری ءِ منگ ءَ پد سی ٹی ڈی ءَ ٹاپار جتگ کہ ماھل دیمونیں ارش کنوکے کہ گوں وتکشیں جیکٹ ءَ چہ لوگ ءَ ڈن دزگیر کنگ بیتگ۔وھدے کہ سی ٹی ڈی ءِ انیگیں درشان ءُ چہ لٹ ءُ آزار گرگ بیتگیں ماھل ءِ درشان ءَ نوکیں داستانے آرگ بیتگ۔ایشی ءِ رد ءَ ماھل پہ گپت وتکش ارش کنوکے نہ اِنت بلکیں آسراتی دیوکے کہ ھمے جیکٹ ءَ دگرے ءَ دیگی اَت۔چہ ایشی ءَ ترس ھمیش اِنت کہ دیمتر ءَ ھم دروگیں کیسانی بنیاد ءَ دگہ لھتے مردم دزگیر کنگ بیت۔ انچوش کہ پریس کانپرنس ءَ ’’ پری گل ‘‘ ءِ نام ھوار کنگ بیتگ کہ پہ ماھل ءِ یلہ کنائینگ ءَ بیتگیں زھرشانیاں دیم دیم ءَ بیتگ۔
بی این ایم ءِ جارکش ءَ گْوشتگ پاکستانی آمیدگسانی سر ءَ باز رند ءَ آیانی وتی گْوستگیں سروزیراں ھم ناباوری درشان کنان ءَ آ پت دار (جانبدار) لیک اتگ اَنت وھدے کہ گپ بلوچ راج ءِ بیت گڑا پاکستان ءِ درسیں تْرامگیج یکدست اَنت۔پاکستانی آمیدگس پاکستانی لشکر ءِ چیردست اَنت۔ پمیشکا دروگیں کیسے ءَ ماھل ءِ آمیدگس ءِ دیم ءَ پیش کنگ ءِ جاہ ءَ یکشل ءَ ریمانڈ گرگ بیتگ ءُ آمیدگس ءَ ھچ نہ گْوشتگ۔پیشی ءِ وھد ءَ چہ آزاراں ماھل بے ھوش بیتگ بلے آمیدگس ءِ آمیدکارانی مردمگری وش واب اَت۔چوناھیں میاربارے بہ بیت ماں زندان ءَ چہ آئی ءَ گوں آزار ءَ گرگ بیتگیں درشان ءِ ھچ رنگیں راھبندی بستار نیست ءُ ناں کہ دزگیریں مردمانی میار منگی درشان ءِ رسانکدر ءَ شنگ کنگ مزدانک (انصاف) ءِ لوٹاں پیلو کنت۔اے ایوک ءَ ھما زور ءِ سان ءِ کم کنگ ءِ کوشست اِنت کہ بلوچ راج ءِ نیمگ ءَ زھرشانی ءُ نندانکانی پد ءَ ودی بیتگ۔ دومی نیمگ ءَ اے آوارجنی ءَ راھبندی رنگے دیگ ءِ کوشست اِنت داں جھان رد بہ کپ ایت۔پاکستانی لشکر ماھل ءَ وتی جند ءِ آمیدگساں پیش کنگ ءَ چک ءُ پد اِنت بلے آئی ءِ میڈیا ٹرائل کنگ بیگ ءَ اِنت ، ایشی ءِ سر ءَ مردمی اگبالانی تْرامگیجاں زیت دلگوش کنگ لوٹ ایت۔پاکستان ءِ باندات ءَ مردمی اگبال ءِ تْرامگیجانی سردکاری ءَ پاکستانی لشکر ءَ ماں بلوچستان ءَ بے جست ءُ پرس ءَ ھرچ رنگیں میار کنگ ءِ واک داتگ کہ چہ ایشی ءَ مئے بے تاھیری گیش بیگ ءَ اِنت۔
