شال: بلوچ راجی زْرمبشت ( بی این ایم) ءِ جارکش ءَ وتی درشانے ءَ گل ءِ کلانھیں راھشون ءُ سیاسی زندانی ڈاکٹر دین مھمد ءِ زور بیگواھی ءِ چاردہ سال سرجم بیگ ءَ جتائیں مراگشانی جار پرینتگ۔
آئی ءَ گْوشتگ گل ءِ چیئرمین ءَ گل ءِ درسیں ھنکین ءُ تکاں پرمان داتگ کہ آ اے روچ ءَ ماں بلوچستان ءَ زور بیگواھیانی جیڑہ ءِ دیم ءَ آرگ ءَ وتی کرد ءَ پیلو بہ کن اَنت۔
بی این ایم ءِ بنجاھی راھشون ڈاکٹر دین مھمد 28 جون 2009 ءَ پاکستانی چیریں واکاں چہ ھورناچ ، کزدار ءَ چہ آئی ءِ نادْراھجاہ ءَ آوار جنگ ءَ پد زور بیگواہ کرتگ۔درسیں ھنکین ءُ تکاں پرمان دیگ بیتگ کہ آ ڈاکٹر دین مھمد ءِ چارد سالی زوربیگواھی ءِ سھرا کنگ ءَ زھرشانی ءُ یاتگیری مراگش برجم بہ دار اَنت ءُ آئی ءِ شول کشیں جھد ءُ زندان بیگ ءِ بارہ ءَ بلوچ راج ءُ جھان ءَ سھی بہ کن اَنت۔
آئی ءَ گْوشتگ کہ ڈاکٹردین مھمد یک آجوئی لوٹوکیں راھشون ، بھادریں مردم، وتی ڈبو ءَ سوگہ ءُ نیزگار دوستیں ڈاکٹرے اَت۔آ ھما وھد ءَ چہ نادْراھجاہ ءَ آوار جنگ بیتگ اَت کہ وتی کار ءِ سر ءَ اَت۔ آئی ءَ آوارجنی ءِ بگیری ءَ سکا گھگیری کرتگ بلے آ آزار دیگ ءُ ٹپی کنگ ءَ پد دزگیر کنگ بوت۔اے ویل ءِ چمدیستگیں مردم ھست اَنت کہ آیاں پولیس ءُ آمیدگس ءَ وتی درشان ھم نبشتہ کنائینتگ اَنت۔
جارکش ءَ گْوشتگ کہ ڈاکٹر دین مھمد ءِ زھگ سمی ءُ مھلب دین ءَ چاردہ سال اِنت کہ پہ وتی پت ءِ درا کنائینگ ءَ زھرشانی کنگ ءَ اَنت۔ آیاں پہ وتی پت ءِ یلہ کنائینگ ءَ 2013 ءَ چہ شال ءَ گر داں کراچی ءُ داں کراچی ءَ گر اسلام آباد ءَ دوھزار ءُ پنچسد کیلومیٹر پادانی روانک داتگ۔آ آمیدگس ، زور بیگواھیں مردمانی پتر ءُ داں پاکستان ءِمزن وزیر ءَ دوچار کپتگ اَنت ءُ چہ آیانی دلجمی رسگ ءَ پد ھم آیاں وتی پت ءِ بارہ ءَ ھچ ھال دیگ نہ بیتگ۔
آئی ءَ گْوشتگ کہ بی این ایم ءِ باسک دگہ مراگشاں ابید ھمے روچ ءَ چاگردی رسانکدر ءَ SaveDrDeenMohdBaloch# ھیش ٹیگ ءَ کارمرد کن اَنت ءُ آنلائن باوست ھلائین اَنت۔درستیں آزادیں پسند ءُ مردم دوستاں دزبندی کنگ بیت کہ آ اے باوست ءَ بھر بہ زیر اَنت۔