شال : بلوچ راجی زْرمبشت ( بی این ایم) ءِ جارکش ءَ کیچ ءَ کشگ بیتگیں ورنائیں نودربر ءُ استاد ابدل روپ برکت ءِ کوش ءَ درشانے ءَ گْوشتگ ابدل روپ مزھبی پوشاک ءِ تہ ءَ پاکستانی لشکر ءِ کاسگ چٹ ءُ نام گیپتیں مپتی شھمبر ءَ کشتگ، بلے اے کارپد ءِ بن پاکستانی مھترھند (ریاست) ءُ آئی ءِ لشکر اِنت۔ایشی ءِ سر ءَ چوناھیں نام چپسے بادینگ بہ بیت ، مھترھند بے میار بیت نہ کنت۔
چوشیں ھزاراں کوشانی ایپ آئی ر گْوستانک ءِ آمیدگس ءَ پاکستان ءِ نام ءَ نبیسگ بیگ ءَ اَنت۔ وھدے جست ءُ ملام ءِ باریگ بئیت پاکستان ءَ چہ ایشاں ھر یک کوشے ءِ پسو گرگ بیت۔نام گیپتیں مپتی شھمیر ءِ چہ ایشی ءَ پیش ھم بلوچانی کوش ءَ دست مان اِنت۔ آ زورگر ءِ گْوشگ ءِ سر ءَ بلوچ چاگرد ءَ بھر ءُ بانگ کنگ ءُ کست ءُ کنت ءِ پد ءَ جنگ رودینگ لوٹ ایت۔شھید روپ ءِ کوش ھمے دْرچ ءِ بند ءُ بوگ اِنت۔بلوچ ءَ و ھزارھاں سال اِنت کہ ھمے سرڈگار ءَ نشتگ بلے اد ءَ بھ مزھب ءِ بنیاد ءَ یا ملایانی گْوشگ ءَ کس کشگ نہ بیتگ۔مھترھند ءُ لھتے نام گیپتیں راجدوست ھمے کشندھانی پشت اَنت۔ اے نام گیپتیں راجدوست ،ملاشھمیر ءُ ھمے کردگارانی ھدابندیں دگہ مردم بلوچ راج ءِ دیم ءَ پاشک بیتگ اَنت۔
جارکش ءَ گْوشتگ گْوستانک ءِ رد ءَ بلوچ چاگرد ءِ سیکولر میل ءُ ھیل اَنت۔ اد ءَ مسلمان ، ھندو ، سک ءُ پارسی بلوچ چاگرد ءِ بھر اَنت۔ ھندوستان وھدے بھر بوت سرجمیں انگریزی ھندوستان ءَ مزھب ءِ نام ءِ سر ءَ کشت ءُ کشار بنا بوت ءُ لکاں مردم کشگ ءُ چگل دیگ بوت بلے بلوچستان چہ اے مزھبی تند روی ءَ پھریز اَت پرچا کہ بلوچ راج ءَ وتی گْوستانک ءِ مزھبی رواداری برجاہ داشت ءُ دمگ ءَ روکیں آس نہ اشت کہ آئی ءِ دامن ءَ بہ گیپت۔
آئی ءَ گْوشت پاکستان ءِ جوڑ بیگ ءَ پد وھدے بلوچستان گرگ بوت گڑا بلوچ ءِ دگہ تکانی پجیگ ءَ بلوچ ءِ مزھبی پیشوکاں ھم اے زورگری ءِ بگیری ءَ توار چست ءُ ماں گْوستانک ءَ وت ءَ وژنام کرت۔بلوچستان ءِ سر ءَ زورگری ءِ بگیری ءَ وھدے انیگیں زْرمبشت کہ بالاچ بوت گڑا پاکستان ءَ پہ راجی زْرمبشت ءِ ایرموش ءَ ھرچ وڑیں پندل کرت۔ ایشی ءِ تہ ءَ مزھب ءِ کارمرد ھم گون دیگ بیتگ۔بندات ءَ مزھبی پیر ءُ لیکھانی رد ءَ ھمے زور جنگ بوت کہ زکری ءُ نمازی وت ماں وت بہ مڑ اَنت۔
جارکش ءَ گْوشتگ پاکستانی لشکر ءِ مزھبی پاگ ءُ پڑکھیں رمباں بلوچستان ءِ جتائیں ھند ءَ مزھب ءِ نام ءِ سر ءَ بسیار مردم کشتگ ءُ کْوھنیں مزار ءُ زیارت بن داتگ اَنت۔ بلوچ چاگرد ءَ مزھبی پیر ءُ کینگ تالان کنگ ءِ شوْپچ بےسوب بیتگ بلے لشکر ءَ وتی اے رمب پلہ مرزی برجاہ داشتگ۔ چہ لشکر ءِ نیمگ ءَ اے رد ءُ گل کنگ بیتگ ءُ انیگیں میار ھم ھمیشانی سر ءَ اِنت۔بلوچ چاگرد ءِ درسیں تکاں ایشی ءِ بگیری ءَ توار چست کرتگ ، چہ ایشی ءَ گواچن اِنت پاکستان مزھب ءِ نام ءِ سر ءَ بلوچ راج ءِ پجار، مڑاھداری ءُ سیکولر سنچ ءَ پچ گیپت نہ کنت۔
