شال : بلوچ راجی زْرمبشت (بی این ایم) ءِ سرکماش ڈاکٹرنسیم ءَ گْوشتگ کہ11اگست پہ بلوچ راجی گْوستانک ءَ چیدگے ءِ بستار ءَ دار ایت،وھدے کہ بلوچستان چہ زوراکیں برتانیا ءِ دراجکشیں زورگری ءَ آجو بوت۔ 1839 ءَ بگر داں 1947 بلوچ راج ءَ برتانیا ءِ زورگری ءِ بگیری ءَ دراجکش ءُ ھونریچیں جنگ ءَ ابید، سیاسی ءُ راھبندی تک ءَ ھم کوشست کرتگ،بازیں دیمونی یے ءِ دیگ ءَ پد بلوچ راج ءَ 11اگست ءَ چہ برتانیا ءِ زورگری ءَ آجوئی گیپت۔
ڈاکٹرنسیم ءَ گْوشتگ، بہ ھل ئِے کہ برتانیا ءِ زورگری ءِ میان ءَ بلوچستان آجو نہ بیتگ بلے بلوچستان ءُ نیپال ءِ بستار چہ ھندوستانی برتانیا ءِ آدگہ ریاستاں جتا ءُ گھتر بیتگ،پمیشکا ھندوستان ءِ بھر ءُ بانگ ءِ میان ءَ 4 اگست ءَ وائسرائے ھند لارڈ ماؤنٹ بیٹن،مھمدالی جنا ءُ ھان کلات اھمد یار ھان ءَ دھلی ءَ مسامے ءَ دزرند کُرت کہ ایشی ءِ بنیاد ءَ بلوچستان ءِ آجوئی منگ بوت بلے چہ برتانیا ءِ کمک ءَ پاکستان ءِ سروک ءُ کلات ریاست ءِ وکیل مھمد الی جنا ءَ آجوئیں بلوچستان ءِ بگیری ءَ پندل بندات کرت ۔آجوئیں بلوچستان ءِ دوئیں پارلیمانانی گوں پاکستان ءَ ھوار بیگ ءِ رَد کنگ ءَ پد مھمد الی جناہ ءَ ھاران ءُ لسبیلہ ءِ ناراھیں ھواری من اِت کہ آ کلات ریاست ءِ بھر بیتگ اَنت ءُ کلات ریاست ءُ برتانیا ءِ سرکار ءِ میان ءَ بیتگیں مسام ءِ رِد ءَ برتانیا ءِ دراھگ ءَ پد مکران ءُ ھاران ءَ ابید باڑہ ءِ سر ءَ انگریز ءَ دیگ بیتگیں دمگ پد ءَ کلات ریاست ءَ ھوار کنگ بہ اَنت بلے پاکستان ءَ گوں سرجمیں مردمی گْوستانک ءَ ناروائی کرت ءُ بلوچستان ءِ نام گیپتیں استان گوں پاکستان ءَ ھوار کرت اَنت چہ ھمد ءَ بلوچ ءِ ایردستی ءِ بندات بوت۔
آئی ءَ گْوشتگ کہ بلوچستان گْوستانی بنیاد ءَ ھچ بر ھندوستان ءِ بھر نہ بیتگ ءُ ناں کہ برتانیا ءِ زورگری ءِ میان ءَ برتانیا ءَ مارا ھندوستان ءِ بھر بیگ ءَ لاچار کرتگ بلے دین ءِ نام ءَ برتانیا ءَ ھندوستان ءِ بھر ءُ بانگ کنگ ءِ راہ گیشینت اَنت ۔ھما روچاں ھندوستان ءِ ھم درسیں دینی پشیوکاں چہ جمیئت المائے ھند ءِ نیمگ ءَ بھر ءُ بانگ ءِ بگیری کرت ءُ اے پہ مسلماناں وتکشی یے لیک اِت بلے کانگریس ءِ سروکانی لوٹ ءُ برتانیا ءِ پندل سوبمند بوت اَنت، ھندوستان بھر بوت ءُ ایشی ءِ ڈنڈ نو ماہ ءَ پد بلوچستان ءَ رَس اِت، روکپتی زوراکاں پانپانے رس اِت بلے دین ءِ نام ءَ جوڑ بیتگیں پانپان نہ ایوک ءَ بلوچ بلکیں پہ دمگ ءُ سرجمیں جھان ءَ وبایے جوڑ بیتگ۔ مروچی جھان پاکستان ءِ دین ءِ نام ءَ ریٹوئیں لشکر، ایٹمی سلاہ ، ناشرکاری ءِ بنجل ءُ ایشانی دگہ ڈیھاں تالانی ءِ ترس ءَ گْور جتگ۔
