سرکماش بی این ایم ڈاکٹر نسیم ءِ راجانی سنت ءِ ھمگْوریں نیاد ءَ تْران : اگاں سی پیک سوبمند بیت چین بلوچ گلزمین ءَ گیپت

جنیوا : بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ 28 ستمبر ءَ راجانی سنت ءِ نیاد ءِ میان ءَ جاپانی این جی او ’انٹرنیشنل کیرئیر سپورٹ‘ ءِ نیمگ ءَ برجم دارگ بیتگیں ھمگْوریں نیادے ءَ تْران کرتگ۔ اے نیاد ءِ پاگواجہ شون پوجیکی اَت۔ اے نیاد ءَ چین پاکستان گزرانکی راھداری ( سی پیک ) ءِ سر ءَ دلگوش دیگ بیتگ کہ چین ءِ ’ ون بیلٹ اینڈ ون روڈ ‘ ءِ گامگیجانی تالانی ءِ رد ءَ بلین ڈلرانی کارشور اِنت۔ سرکماش ڈاکٹر نسیم ءَ بھر زیروک اے کارشور ءِ بلوچستان ءُ آئی ءِ مردمانی سر ءَ تباہ کنیں سانانی بارہ ءَ سھی کرتگ اَنت۔

ڈاکٹر نسیم ءَ نیاد ءَ لوٹگ ءُ گپ جنگ ءِ موہ دیگ ءَ تْرامکارانی تورو من اتگ ءُ اے رد ءَ گپ جتگ کہ اگاں سی پیک کارشور سوبین بہ بیت چین ’ بلوچ گلزمین ‘ ءَ دستیگ کنت۔

آئی ءَ بلوچ راج ءِ اے باور ھم نیاد ءِ دیم ءَ پدر کرتگ کہ اے کارشور ’ امپریلیسٹ ‘ کوشستے کہ بلوچستان ءِ آبادیاں مٹ کنت۔گوں دودمانداریں جھان ءَ اشتاپیں دزبندی ءَ پد ھم ، بلوچانی لوٹ گوش دارگ نہ بوت ءُ آ گْوست ءِ مزنیں ڈاھے ءِ دیمپانی ءَ تیوک منتگ اَنت۔

سی پیک کارشور ءِ بنپد گوادر بندن اِنت ، اے راھداری چہ بلوچستان ءِ مزنیں دمگے ءَ گْوز ایت۔ ڈاکٹر نیسم بلوچ ءِ رد ءَ ، چینی سرکار بلوچستان ءِ پرارزشتیں ھنداں وتی لشکر ءَ نادینگ ءُ گوادر ءِ راہ ءَ تبریتی ( اسٹرٹیجک ) بنیاد ءَ پرارزشتیں ’ھرمز تنک‘ ءَ وتی دست ءَ آرگ لوٹ ایت۔بلوچ راج وتی پہ مردم ءُ ربیدگانی مانشت ءَ اے کارشور ءِ بگیری ءَ گھگیری کنگ ءَ اِنت۔

ڈاکٹر نسیم ءَ اے ھم نشاندھی کرتگ کہ پاکستانی لشکر گوادر ءِ مردماں چہ شھر ءَ در کنگ ءَ وڑ وڑیں پندل کنگ ءَ اِنت۔ سرکماش ءَ اے گپ ءِ سر ءَ ھم زور داتگ کہ جھان ءَ منگی اِنت کہ بلوچ وتی مانشت ءِ جنگ کنوکیں وپادار ، پرمڑاہ ءُ باورکرزین بائیوارے۔

آئی ءَ گْوشتگ بلوچ پہ وتی جند ءِ سیت ءُ مزد ءَ جنگ ءَ نہ اِنت۔ بلوچ راج ءَ چین ءَ وتی گھگیری توان ءِ پیش دارگ ءَ میان استمان ءِ پلہ مرزی ، پشتونواہ ءُ گلگت بلتستان ءِ مردمانی کمک پکار اِنت۔

ڈاکٹر نسیم ءَ اے گپ ءِ سر ءَ دلتپرکھی درشان کرتگ کہ انیگ ءَ دھلی ءَ جی بیست پلس ءِ سروکی نیاد ءَ ’ ھندوستان ، میان رودرتک ، یورپ راھداری‘ کار شور من اتگ ، آئی ءِ تہ ءَ بلوچستان ءِ نام نیست اَت۔

آئی ءَ گْوشتگ ھما سرڈگار کہ آ اود ءَ راج وت ماں جنگ اَنت سرمایہ کاری میان استمانی راھبندانی بگیر اِنت ، بلے وھدے زور ءُ زر ءِ گپ بہ بیت گڑا میان استمانی راھبنداں گیشتر ڈالچار کن اَنت۔

گڈی ءَ ڈاکٹر نسیم ءَ یک رندے پد ءَ تْرامکارنی تورو من اتگ کہ آیاں پہ بلوچستان ءِ جاورانی سر ءَ گپ جنگ ءَ اے پتر داتگ۔آئی ءَ اے اوست درشانتگ کہ میان استمان اے گپانی نیمگ ءَ دلگوش کنت ءُ بلوچ راج ءِ دیمونیاں من ایت۔