بلوچ راجی زْرمبشت ( بی این ایم ) ءِ جارکش ءَ چہ پاکستان ءِ نیمگ ءَ چہ چل سالی جنگ ءَ سانمند بیتگیں ڈیھ اوگانستان ءِ باھوٹیاں زور درکنگ ءُ آیاں ترسینگ ءِ ویل گوں تْرندی ءَ ایر جتگ ءُ گْوشتگ شول کشیں جنگاں سانمند بیتگیں اوگانستان ءِ مردم بازیں ڈیھاں باھوٹی زند ءِ گْوازینگ ءَ لاچار اَنت۔بلے گْوستگیں لھتے ماہ بیت کہ پاکستان ءِ نیمگ ءَ اوگان باھوٹیاں پہ زور درکنگ ءَ پاس دیگ بیتگ ءُ آیاں وڑ وڑ ءَ ترسینگ بیگ ءَ اِنت ، آیانی مڈی برگ بیگ ءَ اَنت ءُ آیانی زمین دستیگ کنگ بیگ ءَ اَنت۔ اے ناں ایوک ءَ راجانی سنت ءِ میان استمانی کنونشن ءِ بگیری اِنت بلکیں اوگان باھوٹیانی سر ءَ ھم زوراکی ءِ درانگازی ءَ کنت۔
آئی ءَ گْوشتگ باھوٹی کجام دمگ ءُ ڈیھ ءِ بہ بہ اَنت ، میان استمانی تک ءَ آیانی اگبال گیش اتگ اَنت۔ درسیں راھبندی باھوٹیاں جھان ءَ ھچ ڈیھ پہ زور در کرت نہ کنت۔پاکستان ءَ میان استمانی راھبندانی لپاشگ ھم روچیگیں کارے۔ آیانی ھمک گام میان استمانی راھبندانی بگیر اِنت۔
جارکش ءَ گْوشتگ پاکستان ءَ مدام اوگان سرڈگار پہ وتی جنگی سیتاں کارمرد کرتگ۔ سویت سنت ءَ بہ گر داں امریکا ءَ ، پاکستان ءَ اوگانانی ھون ءِ سودا جتگ ءُ کربانی ڈالر گیپتگ۔اوگان باھوٹیانی نام ءَ چہ میان استمانی کمکی تْرامگیجاں پاکستان ءَ زر گیپتگ ، اے زر پہ باھوٹیانی گھبود ءَ ھرچ کنگ ءِ جاہ ءَ گوچلی ، بلوچ ، پشتون ءُ سندی راج ءِ بگیری ءَ کارمرد بیتگ اَنت۔
جارکش ءَ گْوشتگ راستی ایش اِنت اوگان باھوٹی پاکستان ءَ نہ نشتگ اَنت بلکیں بلوچ ، پشتون ءُ سندی راجانی سرڈگار ءَ نشتگ اَنت۔ پاکستان ایوک ءَ جنگی سیت وارے ءِ بستار ءَ باھوٹ جلیں راج ءُ اوگان باھوٹیاں پلگ ءُ ورگ ءَ اِنت۔
آئی ءَ گْوشتگ انیگیں روچاں اوگان باھوٹیاں زور درکنگ ، آیانی میان استمانی تک ءَ گیش اتگیں اگبالانی بگیری ءِ دْرچ اِنت۔ پاکستان ءَ لوٹ اتگ کہ انیگیں اوگان سرکار ءِ سر ءَ پہ وتی سیتانی پیلو کنگ ءَ زور بہ دنت ، بلے وھدے کہ بے سوب بیتگ گڑا نی وتی زھر ءَ اوگان باھوٹیانی سر ءَ کشگ ءَ اِنت۔اوگاناں مدام ڈنی واکانی بگیری ءَ جنگ کرتگ۔
جارکش ءَ گْوشتگ پاکستان ءِ مدامی کار اِنت کہ وھدے کہ وتی تھی جیڑھانی بے سوبایاں وتی ھمساھگ ءُ زیردستیں راجاں میاربار کنت۔ مروچی وتی چیردستیں دمگانی بدایمنیں جاوراں اوگان باھوٹیانی سر ءَ لڈگ ءَ اِنت ، آیاں وتکش ارش، دزی ءُ زور سنگ گری ءِ میار بار گْوشگ ءُ پہ بے چارگیں باھوٹیاں زمین ءَ تنگ کنگ ءَ اِنت۔
جارکش ءَ گڈسر ءَ گْوشتگ باھوٹیانی زند سکا گوں آزار ءَ گْوزگ ءَ اِنت بلوچ راج چہ اے درد ءَ شری ءَ سوگہ اِنت۔ بلوچ راجی زْرمبشت ( بی این ایم ) پاکستان ءِ اے گامگیجاں ایر جنت بلکیں زوراکی ءُ جیڑھانی اے دم ءُ درگتاں گوں اوگانستان ءِ مردماں وتی دلپدردی ءُ ھمدردی ءَ درشان کنت۔