تمن گورشانی ءِ مردمانی سر ءَ پہ ھلک ءُ میتگانی یلہ کنگ ءَ زور دیگ ، پہ دمگ ءِ دستیگ کنگ ءَ ریپے۔ ڈاکٹرنسیم

تمن گورشانی ءِ مردماں پاکستانی لشکر ءِ زور ءَ پد ھم پہ موشک چکاس ءَ وتی ھلک ءُ میتگ یلہ نہ داتگ اَنت ، اے شریں گامگیج ءُ ناترسیں شورے۔ اے پہ مدامی دمگ ءِ دستیگ کنگ ءَ مزنیں ریپے بلوچ راج ءَ شیوار بیگ لوٹ ایت۔پاکستان مکارے کہ مدام جھان ءَ ریپین ایت ءُ پہ وتی چیریں مولاں مردمگری ءِ بگیر ءَ کار کنت۔ اے گپ بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ وتی درشانے ءَ شکساتگ اَنت۔

آئی ءَ گْوشتگ پاکستانی لشکر ءَ ماں راجن پور ءِ ھند تمن گورشانی ءَ ماڑی ، موزا گروزان ، دراژ تل ، موزا چمبڑی ، موزا لوٹ لڑ ، شم ، کلچاس ءُ ریکانی گھور ءِ مردماں گْوشتگ کہ آ چہ وتی ھلک ءُ میتگاں در بہ کپ اَنت داں آ اود ءَ زورگر وتی موشکاں بہ چکاس ایت۔ بلوچستان ءِ زور گرگ ءَ پد پاکستانی مھترھند ( ریاست ) اد ءِ مڈیاں پہ وتی لشکر ءِ والینگ ءُ پنجاپ ءِ دیمروئی ءَ ھرچ کنگ ءَ اِنت وھدے کہ بلوچستان پہ ایٹمی سلاھانی جوڑ کنگ ءُ ایٹمی تْراکاں آزمائشجاھے جوڑ کنگ بیتگ۔

ڈاکٹر نسیم ءَ گْوشتگ جھان سرپد اِنت کہ پاکستان مکار ءُ ریپ دئیں مھترھندے کہ ایشی ءَ ماں گْوست ءَ جھان ءِ چماں پر چنڈ اتگ ءُ ’ ڈاکٹر کدیر ھان ‘ ءِ پارست ءَ جھان ءَ ایٹمی سلاھانی تالانی ءِ میار کرتگ۔ بلوچستان ءِ دمگ دیرو گازی ھان ءُ راجن پور ھم پہ بیمناکیں سلاھاں آزمائشجاہ جوڑ کنگ بیتگ اَنت۔ اے دمگ ناپھریزیں رنگے ءَ زمین کوچگ ءُ یورینیم درکنگ ءِ پد ءَ تابکاری سانانی آماچ اِنت ءُ نی پہ بیمناکیں سلاھانی چکاس ءَ اد ءِ نندوکانی سر ءَ زور دیگ ءَ بیگ ءَ اِنت کہ وتی ھلک ءُ میتگاں یلہ بہ کن اَنت داں زورگر اد ءِ گواجناں ( معدنیات ) دستیگ بہ کنت۔

آئی ءَ گْوشتگ بلوچستان ءِ اے دمگاں سارتی ءِ زور گیش بیتگ ءُ پاکستان لوٹ ایت کہ مردم ابید کمک ، پہ نندگ ءَ ابید چہ بان ءُ کاپرانی بست ءُ بند ءُ ابید واترگ ءِ دلجمیں مانزمانی ءَ وتی ھلک ءُ میتگاں یلہ بہ کن اَنت۔ آیانی اے ترس ھم وتی جاہ ءَ راست اِنت کہ اگاں آ وتی ھلک ءُ میتگاں یلہ بہ کن اَنت گڑا پد ءَ آیاں نہ ھل اَنت کہ وتی ھلکاں واتر بہ کن اَنت۔ آیانی مال ءُ مڈی دستیگ کنگ ءُ آ پہ مدامی در پہ دریں زند گْوازینگ ءَ لاچار کنگ بہ اَنت۔ پمیشکا آنگْور ءِ مردم وتی ھند ءُ زمیناں یلہ کنگ ءُ روگ نہ لوٹ اَنت۔

ڈاکٹرنسیم ءَ گْوشتگ دوہزار ھژدہ ءَ ھم پاکستانی لشکر ءَ پواد کوہ ءِ ھم گْوراں موشک چکاس اتگ کہ آیانی چنڈ بارگ پواد ، مرنج، گزبوڑ ، دراگل ماڑی ، کلیری تل ، ساوڑی گھور ءُ جوپ پواد ءِ میتگانی سر ءَ کپتگ اَنت۔ مروچی ھم چہ اے ھنداں بیتگیں چکاساں مردماں تاوان رس ایت۔

آئی ءَ گْوشتگ 6 اکتوبر ءَ دیرو گازی ھان ءَ بھمانگیں تْراکے بیتگ۔ ھندی رسانکدر ءَ ھال داتگ کہ اے تْراک دیرو گازی ھان ءَ ’ ایٹمی کار جاھے ‘ ءِ نزیک ءَ بیتگ۔ چہ ایشی ءَ پد تندجاہ ءُ راھوتی تْرام ( نظام ) ماٹو کنگ بیتگ اَنت۔ رند ءَ پاکستانی رسانک ءَ اے پراسراریں تْراک پاکستانی واکدارنی گْوشگ ءِ رد ءَ چہ پاکستانی بالی توان ءِ جنگی جیٹاں ودی بیوکیں ’ سونک بوم ‘ لیک اتگ۔بلے اے گپ گیشینگ نہ بیتگ کہ آ کجام سکیں ناگیگیں جاور اَت کہ پاکستان ایپ شانزدہ ، ایپ ھپدہ یا جے دہ وڑیں سپر سونک جنگی بالیگے ءَ راھبند لپاشتگ اَنت ءُ شھر ءِ سر ءَ چہ توار ءِ رشت ءَ ھم تیز تر بال کرتگ۔ 6 اکتوبر ءِ تْراک شکی ئیں تْراکے اَت ، اے رد ءَ میان استمانی تْرامگیجاں پٹ ءُ پول کنگ لوٹ ایت۔ پرچا کہ پاکستان ءَ گْوست ءَ ھم ایٹمی سلاھانی جوڑ کنگ ءِ گپ چیر داتگ ءُ چیروکائی ایٹم بم جوڑ کرتگ۔ انی ھم المی ءَ اے دروگ ءِ پشت ءَ انچیں راستی یے چیر دیگ بیگ ءَ اِنت کہ پہ دمگ ءُ جھان ءَ بے تاھیری یے پارست بیت۔

بی این ایم ءِ سرکماش ءَ گْوشتگ دیرو گازی ھان ءُ راجن پور بلوچستان ءِ بھ گستا نہ بیوکیں بھر اَنت۔ بی این ایم ءَ ھوار سرجمیں بلوچ راج گوں آنگْور ءِ مردماں پجیگ اِنت ، آیانی بگیری ءَ چونیں ھم پندلے بہ بیت بلوچ راج تْرک ءُ نک نہ نند ایت۔