بلوچ شھمیرانی روچ ءَ بلوچ راجی زْرمبشت ( بی این ایم ) ءِ باسک پہ بلوچ شھمیرانی ستک شانی ءَ جھان ءِ جتائیں کنڈاں وڑ وڑیں مراگش برجم دار اَنت۔درانڈیھ ءَ بی این ایم ءِ تک ءُ ماں ڈیھ ءَ چہ ھنکینانی نیمگ ءَ برجم بیوکیں اے مراگشاں بلوچ آجوئی ءِ زْرمبشت ءِ بنگپ ءُ ماں بلوچستان ءَ مردمی اگبالانی جاور سھرا کنگ بہ اَنت۔ وھدے کہ ’ بلوچ شھمیرانی‘ تندجاہ ءُ چاگردی رسانکدر ءِ تاکاں دامگی باوستے ھلائینگ بیت۔چہ بی این ایم ءِ نیمگ ءَ بلوچ شھمیرانی تندجاہ، ایکس ، پیس بک ، انسٹاگرام ءُ ٹیلی گرام تاکاں چہ یک نومبر ءَ گر داں 13 نومبر ءَ ھم روچ نکان شگان کنگ بیت۔
بی این ایم ءِ جارکش ءَ گْوشتگ پاکستان ءَ پہ بلوچ راجی زْرمبشت ءِ ایرموشگ ءُ بلوچ راج ءَ چہ آجوئی ءَ زبھر کنگ ءَ ھزارانی کچ ءَ بلوچ کشتگ۔ اے روچ مارا ھما شھمیرانی دیمونیانی یات ءَ دنت کہ آیاں پہ بلوچ راج ءِ آجوئی ءَ وتی سر نْدر کرتگ اَنت۔
آئی ءَ گْوشتگ 13 نومبر ءِ روچ ناں ایوک ءَ آ شھمیرانی دیمونیاں پدر کنت کہ آیاں پہ ’ڈیھ بلوچستان‘ ءِ آجوئی ءَ برتانیا ءِ ارشانی دیمپانی کرتگ بلکیں اے گْوستانک ءِ مزرو (مُز رُو ۔ سمت) ءَ ھم تچک کنت۔13 نومبر 1839 ءَ انگریزاں آجوئیں ڈیھ بلوچستان ءِ سر ءَ ارش کرت ءُ بلوچستان ءِ بادشاہ ’ لال شھید مھراب ھان ‘ گوں ھمراھاں شھید کرت۔ھمے روچ ءَ بلوچ ءِ زیردستی بندات بوت ، چہ ایشی ءَ پد زوراکیں انگریزاں بلوچستان گیپت ءُ بھر ءُ بانگ کرت۔اگاں 13 نومبر ءِ ویل مہ کپتیں مروچی بلوچستان ءِ گْوستانک اے نہ اَت۔ چہ ایشی ءَ پیش بلوچستان دیمروئی کنوکیں ڈیھے اَت کہ آئی ءِ تْرام ءُ سرکاری کار کم کم ءَ نوکیں زمانگ ءِ رنگ ءَ رجگ ءَ اَت اَنت۔
بی این ایم ءِ جارکش ءَ گْوشتگ ھچ راج ءَ دگہ راجے زیردست کرت نہ کنت۔ راجانی میان ءَ سیادی یک دومی ءِ مانشت ، برابری ءُ یک دومی ءِ آجوئی ءِ منگہ دیگ ءِ بنیاد ءَ جوڑ بہ اَنت۔ نوک آبادی توان ایوک ءَ مھترھندی زور ءِ پارست ءَ راجاں زیردست نہ کنت بلکیں اے تْرام ( نظام ) بالادست ءُ زیردستیں راجانی میان ءَ سھرائیں کشکے رند ایت۔ انچوش کہ زوراکیں انگریزانی باریگ ءَ انگریزاں ھندی مردم ءُ آیانی ربیدگ چہ وتیگاں کمتر لیک اتگ اَنت ھمے پیم مروچی ھم اے تْرام زیردستیں راجاں سیمی رم ءِ شھری سرپد بیت۔ مئے زبان ءُ ربیدگ ھم پہ بالادستیں راجاں گھگیر اَنت پمیشکا آ چہ ایشاں کینگ دار اَنت ءُ آیاں گار کنگ یا ژانگولینگ لوٹ اَنت۔
آئی ءَ گْوشتگ پنجاب ءَ گوں بلوچ راج ءَ مھترھند ءُ مردمانی تک ءَ ھما کردگار بیگ ءَ اِنت آ بالادستیں راجانی روان (نفسیات ) ءِ چھرگ اِنت۔بلوچ راج ءِ رستگاری ءِ تیوکیں راہ بلوچ راج ءِ آجوئی اِنت۔ پہ ایشی ءَ دیمونی المی اِنت مارا شھمیرانی رند پداں روگی ءُ پہ راجی آجوئی ءِ سوبمندی ءَ وتی تہ ءَ داشت ودی کنگی اِنت۔
