بلوچ راجی زْرمبشت ( بی این ایم ) ءِ جارکش ءَ ڈاکٹر منان ءُ آئی ءِ ھمراھانی ھشتمی شھمیری روچ ءِ دم ءُ درگت ءَ درسیں ھنکین ، تک ءُ سیلانی سروکاں گْوشتگ کہ آ یاتگاری نیاد ءُ مراگش برجم بہ کن اَنت ءُ چاگردی رسانکدر ءَ ھیش ٹیگ#MartyrsOfMastung ءَ کارمرد بہ کن اَنت۔ چہ اے کاراں آ پہ وتی نامی ئیں راھشون ءُ ھمراھاں ستک درشان بہ کن اَنت۔ ڈاکٹرمنان ، بابو نوروز ، اشرپ ، ھنیپ ءُ ساجد 30 جنوری 2016 ءَ پاکستانی لشکر ءَ ماں مستونگ ءَ بی این ایم ءِ کلانھیں باسک اشرپ ءِ مھمانجاہ ءَ سھب ءِ ٹک ءَ پتر اتگ ءُ رگبار جتگ ءُ شھید کرتگ اَنت۔ڈاکٹر منان بی این ایم ءُ بلوچ زْرمبشت ءِ تْرامینگ ءُ جتائیں گلانی تہ ءِ بھر ءُ بانگی ءُ وت ماں وت ناسیلیانی آسر کنائیں مستونگ ءُ کس ءُ کر ءِ سواد ءَ بیتگ۔
جارکش ءَ گْوشتگ اے سری رند نہ بیتگ کہ بی این ایم ءِ راھشونی ءَ دیمونی داتگ بلکیں بی این ایم ءِ گْوستانک چہ دیمونیاں پر اِنت۔ اے دیمونیانی تہ ءَ گل ءِ سروک واجہ گلام مھمد ءَ بہ گر داں باسکاں وتی سر نْدر کرتگ ءُ گْوستانک نبشتہ کرتگ۔ چیئرمین گلام مھمد ءِ شھمیری ءَ پد بازیں بنجاھی راھشوناں وتی ھون نْدر کرتگ ءُ جھد زندگ داشتگ۔ ھمے پیم ڈاکٹر دین مھمد ، گپور ءُ رمزان ءِ پجیگ ءَ سالانی سال اِنت پاکستانی لشکر ءِ چیریں زنداگاں آزار سگگ ءَ اَنت۔
جارکش ءَ گْوشتگ واجہ گلام مھمد ءِ شھیمری ءَ پد مھترھند ھمے وش گمانی ءِ آماچ اَت کہ چیئرمین گلام مھمد ءِ شھمیری ءَ پد گل آسر بیت بلے ڈاکٹر منان ءُ ھمراھاں مھترھندی زوراکیانی دیم داشتگ ءُ سانمندیں رنگے ءَ بی این ایم برجاہ داشتگ ءُ تْرام اتگ۔ ڈاکٹر منان بلوچستان ءِ کنڈ کنڈ ءَ شتگ ءُ ، پہ بی این ایم مراگش ءُ بلوچ راجی زْرمبشت ءِ بارہ ءَ سرپدی دیگ ءَ شپ ءُ روچ کار ئِے کرتگ۔ ھمیشی ءِ سان ءُ برورداں ما مروچی گندگ ءَ ایں۔
آئی ءَ گْوشتگ مستونگ ءِ شھمیرانی تہ ءَ بابو نوروز انچیں ورنائیں نبشتہ کر ءُ دانشمندے اَت کہ بی این ایم ءِ پتر ءِ پجیگ ءَ گوں وتی ند ءَ ھم بلوچ راجی جیڑہ ءِ سھرا کنگ ءُ راج سوگہ کنگ ءَ اَنت۔ کسانسالی ءَ شھمیر بیتگیں ساجد ، بی این ایم ءِ کلانھیں باسک اشرپ ءُ ھنیپ بلوچ ءَ ھم وتی سیاسی پند ءَ پہ بلوچ زْرمبشت ءَ وتی سھرائیں کردے گون کرتگ ۔ وتی گڈی دم ءُ ھون ءِ گڈی تْرمپ ھم پہ بلوچ زْرمبشت ءِ رشت ءُ ردوم ءَ دیمون کرتگ اَنت ، آیانی دیمونی پہ ما راھشون اَنت۔