بلوچ راجی زْرمبشت ( بی این ایم ) ءِ جارکش ءَ وتی درشان ءَ گْوشتگ بلوچ راج بلوچستان ءِ گوں پاکستان ءَ زوریں ھوار گیجگ ءَ نہ من ایت۔بیست ءُ ھپت مارچ بلوچستان ءِ سر ءَ پاکستانی زورگری ءِ روچ اِنت، اے روچ سیاھیں روچ ءِ بستار ءَ دارگ بیت۔ بی این ایم ءِ ھنکین ءُ تک زورگری ءِ بگیری ءَ زھرشانی کن اَنت۔
بی این ایم ءِ زھرشانیانی دْرچ چہ جرمنی ءَ بندات بیت ، آ اود ءَ 23 مارچ ءَ ماں برلن ءِ برانڈنبرگ ڈک ءَ ھندی ادار ءُ پاسانی رد ءَ ادار یک ءَ زھرشانی بیت۔
24 مارچ ءَ نیدرلینڈز ءَ ڈیم اسکوائر ، ایمسٹرڈم ءَ ھندی ادار ءُ پاسانی رد ءَ یک ءَ گر داں دو ادار ءَ زھرشانی کنگ بیت ءُ ھمود ءِ شھرمنندانی بلوچستان ءِ بارہ ءَ سرپد کنگ ءَ روانک ئِے ھم کشگ بیت۔
27 مارچ ءَ ماں برتانیا ءَ پکیڈلی گارڈن مانچسٹر ءَ زھرشانی کنگ بیت۔ زھرشانی کنوک ھندی ادار ءُ پاسانی رد ءَ چہ دو ءَ گر چار ءَ زھرشانی ءِ جاہ ءَ ساڑی بہ اَنت۔
بی این ایم شھید راشد مشکے ۔ آواران ھنکین ءِ نیمگ ءَ 27 مارچ ءَ پہ باسکانی ھیلکاری ءُ اے روچ ءِ بارہ ءَ سرپدی ودی کنگ ءَ گل ءِ تک ءَ مراگش برجم دارگ بیت، کہ آئی ءِ تہ ءَ باسک آنلائن ھم بھر زرت کن اَنت۔ اے مراگش بلوچستان ءِ ادار ءُ پاسانی رد ءَ بیگاہ ءِ ھپت ءَ بیت۔
بی این ایم ءِ جارکش ءَ گْوشتگ بلوچستان ءِ سر ءَ پاکستان ءِ زورگری ءِ بلوچستان ءِ بالاد ءِ سر ءَ آزگیں ٹپے ءِ وڑ ءَ اِنت۔اے روچ ءَ بلوچ راج بھ نہ شموش ایت۔ داں کہ بلوچستان آجو نہ بیتگ اے روچ چیردستی ءِ یات کنگ ءُ گوں گھگیری ءَ ھمگرنچ بیگ ءَ ’ سیاھیں روچ ‘ ءِ بستار ءَ دارگ بیت۔
آئی ءَ گْوشتگ زورگری ءَ پد بلوچ گھگیری ءِ آسر کنائینگ ءَ گْوستگیں 76 سالاں بلوچ راج ءِ سر ءَ زوراکی کنگ ءُ آ چہ درسیں مردمی اگبالاں زبھر کنگ بیتگ۔ پاکستان ءِ بلوچستان ءِ سر ءَ زورگری بلوچستان ءِ درسیں جیڑھانی ھما ھنڈال اِنت کہ ابید ایشی ءِ گڈگ ءَ بلوچ راج ءِ وشھالی ءُ بلوچستان ءِ دیمروئی بوت نہ کنت۔ بی این ایم گوں ھمے دیدانک ءَ بیست ءُ ھپت مارچ ءَ سرجمیں جھان ءَ باوست کنت ءُ اے کلوہ دیگ بیت کہ بلوچ راج پاکستان ءِ چیردستی ءُ بلوچستان ءِ گوں پاکستان ءَ زوریں ھوار ترینگ ءَ بھ نہ من ایت۔