بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ ایکس ءَ داتگیں درشانے ءَ گوادر ءَ ٹٹ کنگ ءِ کار گوں ترندی ءَ ایر جتگ ءُ گْوشتگ اے تانسریں کار گوں راجی ھم سنتی ءُ باھند ءَ بنا بیوکیں ترندیں گھگیری ءَ دارگ بیت۔ اے سرپد بیگ لوٹ ایت کہ اے جیڑہ تیوک ءَ لھتے زمیندارانی نہ اِنت بلکیں بلوچ راج ئیگ اِنت مئے اگبالانی سر ءَ اے زوراکی ءِ دیم ءِ دارگ ءَ ھرچ تک ءَ گھگیری گیش کنگی اِنت۔
آئی ءَ گْوشتگ پاکستانی مھترھند بلوچ راج ءَ چہ بلوچ تیاب ءَ در کنگ ءَ گوں وتی میان استمانی بائیواراں ، سک اشتاپی ءَ وتی نوک آبادی شورانی سر ءَ کار ءَ اِنت۔ ایشی ءِ تہ ءَ بلوچستان ءِ پر ارزشتیں تیابدپی شھر گوادر ءِ ’سیپ سٹی ‘‘ ءِ نام ءَ چہ آ دگہ بلوچستان ءَ سندگ ھوار اِنت۔
ڈاکٹر نسیم ءِ گْوشگ اَت چہ ایشی ءَ پیش پہ گوادر ءِ پترگ ءَ گچینی کارڈے ءِ بیگ ءِ گپ بیتگ اَت کہ اگاں کسے ءَ آ کارڈ نہ بیت گڑا آ گوادر شھر ءَ شت نہ کنت ءُ نی نا ایمنی ءِ نیمون ءَ شھر ٹٹ کنگ بیگ ءَ اِنت ، چوش چہ آ دگہ بلوچستان ءَ گوادر ءِ پہ مدامی سندگ ءُ گستا کنگ ءِ راہ پچ بیت۔
آئی ءَ اے گپ پاشک کرتگ کہ شور ءِ رد ءَ چہ زیرو پوائںت ءَ گر پشوکان ءِ تیاب ءَ ٹٹ جنگ بیت چہ ایشی ءَ شھرمنندانی تر ءُ تاب ءِ آزادی ءِ تہ ءَ سھرائیں رنگے ءَ کمی کئیت۔ بلوچستان ءَ برجاھیں آجوئی ءِ جنگ ءَ ھواریں مردماں شھرمنندانی تاوان دیگ ءَ پھریز کرتگ بلے پد ءَ ھم زورگر سجھیں شھر ءَ انگر کنگ ءِ کوشست ءَ اِنت ءُ آئی ءِ ٹاپار ھمیش اِنت کہ آ اے کار ءَ پہ وتی ماڑی ، بند ءُ ساچ ءُ سپاھیگانی پھریزگ ءَ کنگ ءَ اِنت، اے گپ بلوچ راج ءَ رد کرتگ ءُ گوں ترندی ءَ بگیری کرتگ۔اے کار ءَ ایوک پہ ایمنی ءَ کنگ ءَ نہ اَنت؛ اے بلوچستان ءِ آبادی ءِ ترینگ ءِ بدیں پندلے۔اگاں آ پہ ایمنی ءَ بے تاھیر بوتین اَنت گڑا چہ درساں پیش پاکستان ءِ بنجاھی شھر اسلام آباد ٹٹ جنگ ءُ پھریزگ بیتگ اَت۔
آئی ءَ چاگردی رسانکدر ایکس ءَ داتگیں وتی درشان ءِ پجیگ ءَ تامرے ھم شنگ کرتگ کہ بی این ایم ءِ رسانکدری تک ءَ آدینگ ءِ روچ ، 3 مئی ، 2024 ءَ گپتگ کہ آئی ءِ تہ ءَگوادر شھر ءِ چاگرد ءَ ٹٹ جنگ ءِ کار پیش دارگ بیت۔
ڈاؤن لوڈ
اے تامر ءِ سر ءَ گپ جنان بی این ایم ءِ نیمگ ءَ گْوشگ بیتگ ٹٹ جنگ ءِ کار ءِ تہ ءَ سھرائیں گیشی آیگ ءَ پد ھم مھترھندی تک ءَ اے کار ءِ چیر دیگ ءِ کوشست بیگ ءَ اِنت۔
