بلوچ راجی زْرمبشت ( بی این ایم ) ءَ پاکستان ءِ نام گپتیں ازم ء استھکام آپریشن ءِ سر ءَ وتی بے تاھیری درشانتگ ءُ گْوشتگ چہ پاکستان ءِ نام گپتیں ازم ء استھکام آپریشن ءَ بلوچستان ءُ پشتونوا ءَ کشت ءُ کوش ، زور بیگواھی ءُ درآمیدگسی کوشانی تہ ءَ گیشی کئیت۔آیوکیں روچ ءِ اے ھون ریچی ءِ دارگ ءَ زیردستیں راجانی میان ءَ ھم سنتی ، ھمساھگیں ڈیھ ءُ میان استمانی واکانی دزمانجنی المی اِنت۔
آئی ءَ گْوشتگ پاکستان بے سوبیں مھترھندے کہ آ اود ءَ لشکر وتی زورگری ءِ برجاہ دارگ ءَ نوک نوکیں آزمائش کنگ ءَ اِنت۔اے درس ایوک ءَ لشکری لٹ ءُ پل ءُ زورگری ءِ شول کش دیگ ءِ بے سوبیں کوشست اَنت۔ ایشانی آسر چد ءُ گیشتریں مرک ءُ میر ، مردمی اگبالانی لگتمالی ءُ زور بیگواھی رنگیں سنگینیں میارانی تہ ءَ گیشی بیت۔
جارکش ءَ گْوشتگ بلوچستان ءِزورگرگ ءَ پد پاکستانی لشکر ھم روچ گوں سرجمیں مھترھندی مڈی ءُ واک ءَ گوں بلوچ راج ءَ مڑگ ءَ اِنت۔داں اد ءَ کہ 28 مئی 1998 ءَ ماں بلوچستان ءَ چاگی ءِ ھند ءَ ایٹمی تْراک کنگ بیتگ اَنت چہ آیانی تابکاری ساناں مزنیں دمگے سانمند اِنت۔ سی پیک راھداری ءِ کش ءَ دھانی میتگ ءِ مردم چہ یکشلیں لشکرکشیاں شزار بیتگ ءُ لڈ اتگ۔چہ ڈیرہ بگٹی ، کوھلو ءُ کاھان ءَ ھزاراں مردم ماں گلزمین ءَ ءُ ھزاراں ماں ڈن ءَ در پہ دری ءِ زند گْوازینگ ءَ اِنت۔داں اد ءَ بہ یا ءُ بہ رس کہ ڈرون ھم بلوچانی بگیری ءَ کارمرد کنگ بیگ ءَ اِنت ءُ میان استمانی سیمسراں ڈن ھم بلوچ چہ پاکستان ءِ ناشریاں پھریز نہ اِنت۔ھمے جاورانی تہ ءَ چہ ’ ازم ء استھکام ‘ ءِ نام ءَ بیوکیں لشکرکشی ءِ پد ءَ چد ءُ گیش بیرانی بیت ءُ گیشتر بلوچ پہ لڈ ءُ بار ءَ لاچار بیت۔
آیاں گْوشتگ پاکستانی مھترھند بلوچستان ءِ آبادی ءِ آمید ءَ مٹ کنگ ءُ تیاب ءُ مڈیاں دستیگ کنگ لوٹ ایت۔ھربہ پاکستان ءَ پیپلز پارٹی واکداری ءِ تہ ءَ بھرمند بیتگ گڑا بلوچ راج ءِ سر ءَ مھترھندی زوراکی گیش بیتگ۔ انی ھم بلوچستان ءِ سر ءَ لشکرکشی ءِ پلہ مرزی ءَ چہ درساں پیسر آسپ الی زرداری ءَ درشان داتگ۔ زولپکار الی بٹو ءُ بانک بے نزیر بٹو ءِ دردناکیں کوش ءَ پد ھم بٹو ءِ گل لشکر ءَ آسراتی دیگ ءُ وتی گْوست ءِ کرد ءَ دمپارگ ءَ اِنت ، اے پہ سیاسی گلے ءَ شرمناک اِنت۔
بی این ایم ءِ جارکش ءَ چیردستیں راج ءُ راجی سیاسی گلانی میان ءَ ھم سنتی ءُ یکجاھی ءِ سر ءَ زور داتگ ءُ گْوشتگ بلوچ ءُ پشتون ’ راج ءُ گلزمین دوستیں واک ‘ دشمن ءِ بگیری ءَ وتی کسانیں ناپتی ءُ ناوشیاں یک کر بہ کن اَنت ءُ ھم دست بہ بہ اَنت داں دشمن ءِ ھرچ سنگر ءَ دیم دارگ بہ بیت۔پہ مزنیں سیاسی سنتے ءَ پیش راجی سیتانی سر ءَ ھم پت ءُ یک زبان بیگ ءُ سیاسی کارکنانی میان ءَ پہ راجی درشان ءِ جوڑ کنگ ، شکسارگ ءُ مردمانی پوہ کنگ ءَ ھم آھنگی المی اِنت۔ما پیسر ءَ یک دومی ءِ سر ءَ وتی ڈکاں مہ بادین ایں بلکیں یک برے پہ ھم سنتی ءَ سازگاریں چاگردے ودی بہ کن ایں۔
آئی ءَ گمان درشانتگ کہ نوکیں شوندات ءِ رد ءَ پاکستان ھمساھگیں ڈیھ ءَ درانڈیھیں بلوچانی بگیری ءَ چد ءُ گیش گامگیج زیر ایت ءُ آیاں تنگ کنت۔پاکستان وتی جیڑہ ءُ بے سوبیاں ھمساھگیں ملکانی سر ءَ لڈ ایت ءُ آیاں زور پر دیگ ءِ کوشست کنت پرچا کہ پاکستان ءِ لشکری واک بلوچ گھگیری ءِ دیم ءَ بے سوب بیتگ ءُ سی پیک ءِ راستیں واھند چین چہ پاکستان ءِ پھزداری گامگیجاں دلپروش اِنت۔
جارکش ءَ گڈ سر ءَ گْوشتگ ھمساھگیں ڈیھ اے رد ءَ بے تواری ءَ سیل چارگ ءِ جاہ ءَ گوں تچکیں دیدانک ءَ بگیری بہ کن اَنت ءُ میان استمانی تک ءَ پہ پاکستان ءِ گر ءُ دار ءَ سپارتکاری بہ کن اَنت داں پاکستانی لشکر ءِ دیم دارگ بہ بیت ءُ آ مردمگری ءِ بگیری ءَ میار کرت مہ کنت۔ بلوچستان ءُ پشتونوا ءِ ایمنی دمگ ءِ داشت ءُ وشھالی ءِ مانزمان اَنت ءُ اے ھما وھد ءَ بیت کنت کہ چیردستیں راج وتی سرزمین ءِ واھند بہ اَنت۔ پاکستان وتی بے سوبیں شونداتانی آس ءَ سوچگ ءَ اِنت ءُ ھمساھگیں ملکانی سر ءَ وتی بار ءَ لڈگ ءُ ڈنی کمک ءِ واھگدار اِنت داں لمب اتگیں مھترھند ءَ دگہ چیزے روچ کمک بہ رس ایت ءُ پاکستانی لشکری سروگان ءُ آیاں آسراتی دیوکیں سیاستدان چد ءُ گیش لٹ ءُ پل بہ کن ءُ مڈی یکجاہ کرت بہ کن اَنت۔