ما شھید اکبرھان بگٹی ءِ سیاسی پشت پد ایں۔ پہ آئی ءِ دیمونیانی سوب ءَ داں منزل ءَ جھد برجاہ بیت۔شھیدانی پشت پد آیانی کھول نہ اَنت بلکیں سرجمیں بلوچ راج اِنت بلے ھما کہ شھید اکبر ھان ءَ وتی جھگیر لیک اتگ اَت اَنت ، اوست ھمیش اِنت کہ آ اے مزنشانیں مردم ءِ گْوشتن ءَ رد نہ کن اَنت۔
اے گپ بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ شھید اکبر ھان بگٹی ءِ سالروچ ءِ دم ءُ درگت ءَ گوں گل ءِ باسکاں بیتگیں مراگشے ءَ درشانتگ اَنت۔شھید اکبر ھان بگٹی ءِ شھیدی ءِ روچ ءِ رد ءَ بی این ایم ءِ سرکماش ءَ آئی ءِ زند، کرد ءُ لیکھانی سر ءَ دلجمی ءَ گپ جتگ۔
آئی ءَ گْوشتگ شھید اکبر ھان بگٹی زانتکار ، جاور ءُ جیڑھاں پوھیں سیاسی مردمے اَت۔ جمھوری وتن پارٹی ءُ بلوچستان نیشنل موومنٹ ءِ سنت ’ بلوچستان راجی سنت ‘ (بلوچستان نیشنل الائنس) ءِ سرکار ءِ سروک ءِ بستار آئی ءَ بلوچ راج ءِ وانگ ءُ زانگ ءُ پہ بلوچی زبان ءِ دیمروئی ءَ ماں وانگجاھاںچہ بنداتی پدانکاں بلوچی وانینگ بندات کرت ءُ پہ بلوچی نبیسگ ءَ انچیں سیاھگے دیم ءَ آؤرت کہ گوں آئی ءَ جتائیں گالوار یکیں سیاھگ ءَ نبیسگ بیتگ اَت اَنت۔
’ آ گْوستانک ساچیں کارستے اَت۔ آئی ءَ زالپکار الی بٹو ءِ زمانگ ءَ بلوچستان ءِ گورنری من اِت ءُ ھمے میان ءَ بلوچ راج ءِ سر ءَ لشکرکشی بوت ءُ آ ایرجنگ بوت۔ اے گْوستانک ءِ بھر اِنت بلے رند ءَ آئی ءَ چہ وتی کرد ءُ کاراں وت ءَ پلکشود کرت۔گْوستانک ءَ چوناھیں ھم مردمے ءِ شر ءُ ھرابیں کرد ءُ کار درشان کنگ بہ اَنت ءُ ما چہ آیانی وانگ ءَ پد ھما کارست ءِ بارہ ءَ زان ایں۔ھمے پیم شھید اکبر ھان راجی راھشونے ءِ بستار ءَ منگ بیت۔‘
آئی ءَ گْوشتگ شھید اکبر ھان بگٹی ءَ وتی تچکیں راھے گچینتگ اَت۔آئی ءَ بلوچستان ءِ تیاب ءُ مڈیانی سر ءَ بلوچ راجی اگبال ءُ واک ءِ لوٹ کرتگ اَت۔ آئی ءِ گوں شھید واجہ گلام مھمد ءُ شھید بالاچ مری ءَ سیاسی ھم بستگی اے شبین ءَ دیگ ءَ اَت کہ آ کجام سْرپ ءَ ھوار اِنت۔ پمیشکا پاکستانی مھترھند ءَ آ تچکے ءَ نشانگ کرت ءُ کشگ ءِ کوشست کرت۔آ بلوچستان ءِ تیاب ءُ مڈیانی سر ءَ واکداری ءِ اگبال ءِ بنگپ ءَ گپ ءُ تْران کنگ لوٹگ ءَ اَت ءُ پاکستان پہ ایشی ءَ ساجو نہ اَت ءُ آ چہ وتی لوٹ ءَ پدکنز بیگ ءَ ساڑی نہ اَت۔ پمیشکا آئی ءَ گھگیری ءِ راہ گپت ءُ ماں تْراتانی ءَ شھید بوت۔
آئی ءَ گْوشتگ چہ بلوچ شھیدانی دیمونیاں مارا جھد ءِ سکین رس ایت۔شھید اکبر ھان ءِ دیمونی ءَ ھم بلوچ راج جھد ءِ نیمگ ءَ آؤرتگ۔مارا ھمے راہ ءَ روگی اِنت کہ آئی ءَ مارا پیش داشتگ۔چہ ما یا چہ آئی ءِ کھول ءَ کسے چہ اے راہ ءَ در بہ کپ ایت گڑا چہ ایشی ءَ شھید اکبر ھان بگٹی ءِ جھد ءِ سر ءَ کچوچینی نہ بیت بلکیں ھما مردم جست کنگ بیت کہ وتی راہ ءَ تاب دنت۔ اے جھد ءَ بے سوب بیگ ءُ ردی کنگ جتائیں گپ ءُ کار اَنت کہ آیانی سر ءَ ریس ءُ پریس ءُ شرگداری بیت کنت بلے چہ جھد ءَ دستکش بیگ چہ شھیدانی ھون ءُ دیمونیاں سرگْوز بیگ اِنت، ءُ ما چہ وتی جھد ءَ پدکنز نہ بہ ایں۔
اے مراگش ’ ھیلکاری پتر ‘ ءِ رد ءَ بیتگ اَت ، کہ آئی ءِسروکی بی این ایم ءِ کمک سرکماش ڈاکٹر جلال کنگ ءَ اِنت۔ مراگش ءِ جارچین بی این ایم ءِ باسک کھور اَت۔
