بلوچ راجی زْرمبشت ( بی این ایم ) ءِ جارکش ءَ وتی درشان ءِ تہ ءَ گْوشتگ کہ پاکستانی مھترھند پرایمنیں سیاسی گل ءُ آیانی باسکانی بگیری ءَ ریاستی زور ءَ ناراھی کارمرد کنگ ءَ اِنت۔ پشتون پانک زْرمبشت ( پی تی ایم ) ءِ چیر دستی ءَ بیوکیں پشتون راجی جرگہ ءِ دیم ءِ دارگ ءَ پاکستانی سرکار ءَ پشتون پانک زْرمبشت ( پی ٹی ایم ) ءِ سر ءَ پابندی جتگ۔ دومی نیمگ ءَ ماں جھان ءَ نامداریں مردمی اگبالانی راھشون ڈاکٹر ماہ رنگ ٹائم میگزین ءِ مراگشے ءِ بھر زیرگ ءَ امریکہ ءَ روگ ءَ بیتگ کہ دارگ بیتگ ءُ آئی ءِ پاسپورٹ ھم پچ گرگ بیتگ۔ بلوچ ءُ پشتون ءِ بگیر ءَ پاکستانی سرکار ءِ چہ اے کارروائیاں پدر بیت کہ پشتون ءُ بلوچ راج پاکستان ءِ تہ ءَ چہ وتی درسیں اگبالاں زبھر اَنت۔
’’ پی ٹی ایم ءَ در راھبندی لیکگ ءُ ڈاکٹر ماہ رنگ ءَ بالی پٹ ءَ دارگ ءِ کاراں بلوچ راجی زْرمبشت ( بی این ایم ) گوں تُرندی ءَ ایر جنت۔ ‘‘
آئی ءَ گْوشتگ کہ پی ٹی ایم ءَ گْوستگیں ھشت سالانی تہ ءَ مدام پرایمنیں جھد کرتگ ۔ پی ٹی ایم پشتون سرڈگار ءَ مردمانی مھکمیں زْرمبشتے کہ مھترھند ءُ درمھترھندی ناشرکاریانی دیم ءَ میلانک اِنت ۔ آئی ءِ باسک چہ پاکستان ءِ ترندیں گر ءُ دار ءُ لٹ ءُ کٹانی دیم ءَ ھم پر ایمن اَنت۔ چہ ایشی ءَ ابید ھم پاکستانی سرکار ءَ آئی ءِ سر ءَ پابندی جتگ۔ مارا ترسگ ءَ اِنت کہ یازدہ اکتوبر ءَ بیوکیں ‘پشتون راجی جرگہ’ ھم گوں زور ءَ دارگ بیت، انچوش کہ گوادر ءَ بلوچ یکجھتی پتر ( بی وائی سی ) ءِ راجی مچی دارگ بوت ، پرایمنیں سیاسی کارکن دزگیر کنگ ءُ کشگ بوت اَنت ءُ پاکستانی لشکر ءَ مردمانی مال ءُ مڈی ھم تاوان دات اَنت۔
اے ترس اِنت کہ پشتونانی بگیر ءَ ھم گوادر ءِ وڑیں کارروائی کنگ بیت۔ پمیشکا راجانی سنت ءُ اے دگہ میاں راجی گل پاکستان ءِ سر ءَ زور بہ دے اَنت ءُ کڈن بہ کن اَنت کہ پشتون راجی جرگہ گوں ایمنی بہ بیت۔
آئی ءَ گْوشتگ کہ ما پشتون پانک زْرمبشت ( پی ٹی ایم ) ءِ ھمراہ ایں کہ پہ پشتون اگبالاں پرایمنیں زْرمبشتے ۔ بی این ایم پشتون راج ءِ سیت ءُ گچین پی ٹی ایم ءِ ھرچ پڑ ءَ پلہ مرزی ءَ برجاہ دار ایت۔ اے پرایمنیں زْرمبشت ءِ کارکناں پاکستان مدام دلسیاہ کنت ، سداں کارکن دزگیر کنگ بیتگ اَنت ءُ بازینے نشانگ کنگ ءُ شھید کنگ بیتگ۔ اے ھرچ مردم ءِ اگبال اِنت کہ آ پہ وتی اگبال ءُ سیاسی من ءُ مولاں گل جوڑ بہ کنت ءُ پہ آیانی گرگ ءَ کوشست بہ کنت۔
بی این ایم ءِ جارکش ءَ گْوشتگ کہ میان راج بلوچستان ءُ پشتونوِا ءِ تہ ءَ مردمی اگبالانی بدتریں جاور ءُ پشتون ءُ بلوچ راج ءِ ناگیگیں زندمان ءِ سر ءَ دلگوش گْور بہ کنت۔اے رد ءَ چہ میان راجی بے تواری ءَ پاکستان شیرک اِنت۔
آئی ءَ گْوشتگ کہ مردمی اگبالانی داد گپتگیں کارست ڈاکٹر ماہ رنگ ءُ سمی دین وڑیں مردماں کہ آیانی کرد جھان ءِ تک ءَ منگ بیتگ ، پاکستان اوپار نہ کنت۔ ڈاکٹر ماہ رنگ ماں کراچی ءِ جنا میان راجی بالی پٹ ءَ دارگ بیتگ داں آ ڈن ءَ مہ روت ءُ آئی ءِ پاسپورٹ ھم پچ اش گپتگ۔ ھچ وڑیں راھبندے گْوشگ نہ بیتگ کہ پرچا گوں آئی ءَ اے کار کنگ بیتگ ءُ پد ءَ وھدے کہ آ ءُ سمی گس ءَ واترگ ءَ بیتگ اَنت راہ ءَ دارگ ، تیلانک ، مشت ءُ شھمات کنگ بیتگ اَنت ،آیانی گاڑی ءِ کلیت اش برتگ ءُ آ وایرانگے ءَ یلہ اش داتگ اَنت، اے انچیں کارے کہ پد ماں پدی کنگ بیگ ءَ اِنت۔
جارکش ءَ گْوشتگ ، ما پاکستان ءِ مھترھند ءَ ڈاہ دے ایں کہ آ گوں آچ ءَ گوازی کنگ ءَ اِنت۔ منزور پشتین، ڈاکٹر ماہ رنگ ءُ سمی دین زیردستیں راجانی مڈی ءُ راجی توار انت، ایشانی بے توار کنگ ءِ چوناھیں ھم کوشستے بہ بیت آ گوں ترندی ءَ پسو دیگ بیت۔
