شال : بلوچ راجی زْرمبشت( بی این ایم ) ءِ گھبودی تک ءَ وتی گزارش ءَ گْوشتگ ماں آواران ھنکین ءِ ھند جاھو ءَ بلوچستان ءِ وانگی تک ءَ 25 اسکول بند کرتگ ءُ چہ آیاں لھتے پاکستانی لشکر ءِ دست ءَ داتگ چہ ایشی ءَ سرجمیں دمگ ءَ اے اسکولاں وانگ ءُ زانگ ءِ کار مھتل اَنت۔چہ ایشاں لھتے ءَ پانزدہ سال ، دہ سال، ھپت سال ، پنچ سال، شش سال، دو سال ءُ لھتے ماھے بیت کہ بند اَنت۔
گزارش ءِ رد ءَ بچکانی پرائمری اسکول زیرکانی جاھو ءَ گْوستگیں پنچ سال ، پچکانی پرائمری اسکول واستی گوٹھ جاھو ءَ گْوستگیں پنچ سال ، بچکانی پرائمری اسکول وادی ء بجار جاھو ءَ گْوستگیں پنچ سال ، بچکانی پرائمری اسکول اسمان چنال گوٹھ جاھو ءَ گْوستگیں ماھے ، بچکانی پرائمری اسکول سورگر جھاؤ ءَ گْوستگیں گْوستگیں دہ سال ، بچکانی پرائمری اسکول سری ٹڑانچ جاھو ءَ گْوستگیں پنچ سال ، بچکانی مڈل اسکول نوندڑہ پیلار جاھو ءَ گْوستگیں پنچ سال، بچکانی پرائمری اسکول نرمگی جاھو ءَ گْوستگیں پنچ سال ، بچکانی پرائمری اسکول نیک مھمد گوٹھ جاھو ءَ گْوستگیں پانزدہ سال ، بچکانی پرائمری اسکول ملاگزی جاھو ءَ گْوستگیں ھشت سال ، بچکانی پرائمری اسکول میر ابراھیم کنڈی جاھو ءَ گْوستگیں پنچ سال ، بچکانی پرائمری اسکول میتگو جاھو ءَ گْوستگیں پنچ سال ، بچکانی مڈل اسکول مردانگو نوندڑہ جاھو ءَ گْوستگیں دہ سال ، بوائز پرائمری اسکول لاڑاندری جاھو ءَ گْوستگے سالے ، بچکانی پرائمری اسکول کچ کمبی جاھو ءَ گْوستگیں پانزدہ سال، بچکانی اسکول کورک پیلار جاھو ءَ گْوستگیں پانزدہ سال،بچکانی پرائمری اسکول کولنج نوندڑہ جاھو ءَ گْوستگیں دہ سال،بچکانی اسکول کوھڑو جاھو ءَ گْوستگیں نو سال،بچکانی پرائمری اسکول کریم جان بازار جاھو ءَ گْوستگیں ماھے ، بچکانی پرائمری اسکول کپور پیلار جاھو ءَ گْوستگیں پنچ سال ، بچکانی پرائمری اسکول کلاتو جاھو ءَ گْوستگیں پنچ سال ، بچکانی پرائمری اسکول جما مھمد ھسنی گوٹھ جاھو ءَ گْوستگیں دو سال، بچکانی پرائمری اسکول جکی جاھو ءَ گْوستگیں دوسال ءُ نیم، بچکانی پرائمری اسکول سوادان جاھو ءَ گْوستگیں پنچ سال ءُ بچکانی پرائمری اسکول ھکیم داد گوٹھ نوندڑہ جاھو ءَ گْوستگیں ھپت سال اِنت کہ بند اِنت۔
بی این ایم ءِ گھبودی تک ءِ نیمگ ءَ شنگ کنگ بیتگیں گزارش ءَ گْوشگ بیتگ آواران ھنکین ءِ ھند جھل جاھو پدمنتگیں دمگے کہ آ اود ءَ ناں وانگ ءِ آسراتی ھست ءُ ناں جاندْراھی ءِ۔ وانگ ءُ جاندْراھی ءِ پجیگ ءَ دگ ھم نیست پمیشکا مردم پہ روگ ءُ آیگ ءَ ھم سک دلسیاہ اَنت۔ جھل جاھو ءِ بازیں میتگانی مزنیں کچے ءَ نندوکیں مردم چہ وانگ ءِ آسراتیاں زبھر اَنت۔ سرجمیں دمگ ءَ وانگجاہ یا و بند اَنت یا آ پاکستانی لشکر ءُ ایپ سی ءَ وتی پانگس ءُ بنجل جوڑ کرتگ اَنت۔
گزارش ءَ گْوشگ بیتگ بی این ایم ءِ چاگردی تک ءِ گْور ءَ بیست ءُ پنچ اسکولانی ھساب ءُ نام ھست اَنت کہ دیر اِنت بند اَنت چہ ایشی ءَ ناں ایوک ءَ دمگ ءِ چک چہ وانگ ءَ زبھر اَنت بلکیں اے وانگجاہ لشکر ءِ دست ءَ دیگ بیتگ اَنت چہ ایشی ءَ جاھو ءِ نندوکیں مردم زھنی ءُ بالادی رنگ ءَ آزار دیگ ءَ بیگ ءَ اَنت۔
بی این ایم ءِ رد ءَ چہ وانگجاھانی بندی ءَ زانگ بیت کہ پاکستانی مھترھند ءُ آئی ءِ ھمگرنچیں تْرامگیج بلوچاں چہ وانگ ءَ زبھر کنگ ءِ پندل کنگ ءَ اَنت ، آیاں جاھو ءِ چک چہ وانگ ءَ زبھر کرتگ اَنت۔
بی این ایم ءِ گھبودی تک ءِ کارگشاد ماسٹر ااکبال ءَ گْوشتگ کہ بلوچ نیشنل موومنٹ ءِ گھبودی تک پمیشکا جوڑ کنگ بیتگ داں بلوچستان ءَ جاندْراھیءُ وانگ ءِ جاور ءُ درانڈیھ بیتگیں بلوچانی جیڑھاںی شون ءَ بہ دنت داں میان استمانی تْرامگیج اے نیمگ ءَ وتی دلگوش ءَ پرینت بہ کن اَنت ءُ آ بہ گند اَنت کہ چوں پاکستان ءِ پل ءُ واریں تْرام بلوچ راج ءَ سمائی، گزرانکی ءُ چاگردی تک ءَ زیردست دارگ ءِ پجیگ ءَ چہ سنچ ءَ ھم زبھر کنگ ءَ اِنت داں آ چہ وتی راجی اگبالاں بے سما بہ بیت ءُ پاکستان وتی زورگری ءَ بلوچستان ءِ سر ءَ چہ مھکم ءَ مھکم تر بہ کنت۔
آئی ءَ گْوشتگ بلوچستان ءِ بازیں ھنکین ءَ سدانی کچ ءَ وانگجاہ بند اَنت یا آ لشکری بنجل جوڑ کنگ بیتگ بی این ایم ءِ چاگردی گھبود ءِ تک اے بارہ ءَ سرپدی یکجا کنگ ءَ اِنت آیوکیں روچاں دگہ ھنکینانی گزارش ھم شنگ کنگ بہ اَنت داں بلوچستان ءَ وانگ ءِ جاورانی پدمنتگی سھرا کنگ بہ بیت۔