ھزدار ءِ ھنکین ھورناچ ءُ نال ءَ نوزدہ وانگجاہ بند ءُ یازدہ چہ آسراتیاں زبھر اِنت۔بی این ایم گھبودی تک

گزارش ءَ ماں انگریزی زبان ءَ ایر گیج :

گزارش ءَ ماں اردو ءَ ایر گیج:

شال: بلوچ راجی زْرمبشت ( بی این ایم ) ءِ گھبودی تک ءَ بلوچستان ءِ وانگ ءِ جاورانی سر ءَ وتی گزارشانی دْرچ ءِ دومی گزارش ءَ گْوشتگ کہ ھزدار ءِ دمگ ءِ دو ھنکین ھورناچ ءُ نال ءَ نوزدہ وانگجاہ بند اِنت کہ ایشانی تہ ءَ لھتے وانگجاہ پاکستانی لشکر ءَ بنجل جوڑ کرتگ اَنت وھدے کہ یازدہ انچیں وانگجاہ نشان دیگ بیتگ کہ چہ بنکی وانگی آسراتیاں زبھر اَنت پمیشکا چک شریں وڑے ءَ وانینگ نہ بیگ ءَ اَنت۔

گزارش ءِ رد ءَ ھورناچ ھنکین ءِ جنکانی بنداتی پدانک ءِ (پرائمری) دربرجاہ ، بنداتی پدانک ءِ دربرجاہ بیرونٹ، بنداتی پدانک ءِ دربرجاہ چب،بنداتی پدانک ءِ دربرجاہ کلی ولی ھان، بنداتی پدانک ءِ دربرجاہ ڈل ، بنداتی پدانک ءِ دربرجاہ جنی، بنداتی پدانک ءِ دربرجاہ نیدو دمب ءُ بنداتی پدانک ءِ دربرجاہ دمب ءَ بازیں سال اِنت کہ بند اَنت۔

ھورناچ ءِ ھنکین ءَ یازدہ انچیں وانگجاہ ھم ھست کہ چہ وانگ ءِ بنکی آسراتی، میز ءُ وانگی کتاباں زبھر اَنت۔چہ ایشاں مزن دربرجاہ (ھائی اسکول) کھن، بنداتی پدانک ءِ دربرجاہ کھن،جنکانی بنداتی پدانک ءِ دربرجاہ کھن، نیامی پدانک ءِ (مڈل) دربرجاہ کھن،بنداتی پدانک ءِ دربرجاہ کولی، بنداتی پدانک ءِ دربرجاہ دودا بازار، بنداتی پدانک ءِ دربرجاہ ملازھی چکلی، جنکانی بنداتی پدانک ءِ دربرجاہ چکلی، بنداتی پدانک ءِ دربرجاہ الم ھان ءُ بنداتی پدانک ءِ دربرجاہ سرداری بینٹ ھما وانگجاہ اَنت کہ چہ آسراتیاں زبھر اَنت ءُ نودربراں کلاس زیرگ ءَ جیڑھانی دیمپانی اِنت۔

ھزدار ءِ ھنکین نال ءِ یونین کونسل کودہ ءَ یازدہ انچیں وانگجاہ اَنت کہ چہ ایشاں باز پاکستانی لشکر ءَ وتی بنجل کرتگ ءُ سرجمی ءَ بند اَنت ءُ لھتے انچیں دربرجاہ اِنت کہ چہ آسراتیاں زبھر اَنت ءُ چک پہ وانگ ءَ دلسیاہ اَنت۔

یونین کونسل کودہ ءَ بنداتی پدانک ءِ دربرجاہ مزاردان کوڑاسک، کوڈ نمبر 03501 ، بنداتی پدانک ءِ دربرجاہ ایکل کوڑاسک، بنداتی پدانک ءِ دربرجاہ کونڈی کوڑاسک، بنداتی پدانک ءِ دربرجاہ شھول کوڑاسک کوڈ نمبر 13241، بنداتی پدانک ءِ دربرجاہ چڈ کوڑاسک، کوڈ نمبر 03503 ، مزنیں دربرجاہ کوڑاسک(پاکستانی لشکر ءَ بنجل جوڑ کرتگ)، میانی پدانک ءِ دربرجاہ کودہ ، بنداتی پدانک ءِ دربرجاہ انور آباد کودہ، بنداتی پدانک ءِ دربرجاہ کلی کاسم ھان کودہ ءُ جنکانی بنداتی پدانک ءِ دربرجاہ کلی کاسم ھان ءَ وانگ ءُ زانگ ءِ کار سانمند اَنت۔

بی این ایم ءِ گھبودی تک ءِ گزارش ءَ گْوشگ بیتگ کہ پاکستانی نوکبادی شونداتانی پد ءَ بلوچستان ءِ دگہ دمگانی پیم ءَ ھزدار ءِ جاور ھم شر نہ اَنت۔ زوراکی ، زور بیگواھی ، آزار دئی ، ژانگولیں کنٹ ءُ پاکستانی لشکر ءِ کلپیں میڑاں پہ ھزدار ءِ مردماں زند گْران کرتگ۔

گزارش ءِ رد ءَ اگاں ھزدار ءِ وانگ ءِ جاورانی سر ءَ چمشانک دیگ بہ بیت گڑا ھما آسر دیم ءَ کئیت کہ آواران ءِ ھنکینانیگ اِنت۔وانگجاھانی بند بیگ ءَ نودربر جیڑھانی دیمپان اَنت۔ بلوچستان ءَ وانگ ءِ جاور ءُ بلوچستان ءَ نودربرانی زور بیگواھی ءِ آزار دئیں جاوراں بلوچستان ءِ مردمانی تہ ءَ بیمے ودی کرتگ ءُ چک چہ وانگ ءَ زبھر اَنت۔