شال: بلوچ راجی زْرمبشت ( بی این ایم) ءِ چاگردی گھبوی تک ءِ گزارشے ءَ گْوشگ بیتگ آواران ھنکین ءِ دو ھند مشکے ءُ آواران ءَ 76 اسکول یا و سرجمی ءَ بند اَنت یا پاکستانی لشکر ءَ دستیگ کنگ ءَ پد بنجل جوڑ کرتگ اَنت۔
بی این ایم ءِ چاگردی گھبودی تک ءِ رد ءَ مشکے ءَ سیزدہ ءُ آواران ءَ شست ءُ سئے اسکولانی بندی ءُ آسراتی نہ بیگ ءِ پد ءَ چکانی وانگ سانمند بیگ ءَ اِنت : ’’ اے سکا بے تاھیر کنیں گپے کہ آواران ھنکین ءَ بلوچانی زھگ چہ وانگ ءَ زبھر اَنت۔وانگ ءِ آسراتی نہ بیگ ءُ اسکولاں دستیگ کنگ ءُ لشکری بنجل جوڑ کنگ وانگ ءِ بنکی اگبالانی بگیری اِنت، میان استمانی گلاں اے کار ایر جنگ لوٹ ایت۔‘‘
گزارش ءَ لوٹ کنگ بیتگ کہ بلوچستان ءَ وانگ ءِ بدجاوری ءِ سر ءَ میان استمانی تْرامگیج دلگوش بہ کن اَنت : ’’ وانگ بنکی مردمی اگبالے ، ءُ چہ ایشی ءَ زبھری دمگے ءِ چاگردی ءُ گزرانکی دیمروی ءِ سر ءَ شول کشیں سان ایر کرت کنت۔میان استمان ءَ چہ اے ناگیگیں جاور ءِ دیمپانی ءَ زیتیں گامگیج زیرگ لوٹ ایت ۔ آ اے گپ ءَ الم ءُ دلجم بہ کنت کہ انجاریں وانگ بلوچ چکانی دزرس ءَ بہ بیت۔‘‘
’’ میان استمان پاکستان ءِ سر ءَ زور بہ دنت کہ آ بلوچ چکانی وانگ ءِ اگبال ءَ منگہ بہ دنت ءُ اسکولاں لشکری بنجل جوڑ مہ کنت۔بلوچستان گوں وتی یکتائیں ربیدگ ءُ زبانی پجار ءَ راجی سرڈگارے پمیشکا پاکستانی مھترھند وتی گْوستانک، زبان ءُ ربیدگ ءَ بلوچ راج ءِ سر ءَ مہ منڈ ایت۔
گزارش ءَ ماں بلوچستان ءَ وانگ ءِ نزوریں جاورانی زمہ وار پاکستان ءِ نوکابادی شوندات لیکگ بیتگ اَنت : ’’ بلوچستان ءَ پاکستانی مھترھند ءُ بلوچ راج ءِ سیادی زورگر ءُ زور دست ئیگ اِنت۔مھترھند گوں لشکری زوراکیاں مردمی اگبالانی بگیری کنگ ءَ اِنت وھدے کہ مردماں چہ وانگ ءَ زبھر کنگ ءِ کوشست کنگ ءَ اِنت۔دمگ ءِ بازیں اسکول یا چہ الکاپیں آسراتیاں زبھر اَنت یا بند اَنت، پمیشکا پہ چکاں وانگ ءِ راہ ءُ در سانمند بیگ ءَ اَنت۔‘‘
اے گزارش اردو ءُ انگریزی ءَ بی این ایم ءِ تندجاھاں شنگ کنگ بیتگ کہ پی ڈی ایپ ءَ ڈاؤن لوڈ کنگ بیت۔ گزارش ءِ تہ ءَ آواران ھنکین ءِ ھند مشکے ءُ آواران ءِ76 بندیں اسکولانی بارہ ءَ الکاپی ءَ سرپدی دیگ بیتگ۔
بلوچ راجی زْرمبشت ( بی این ایم) ءِ چاگردی گھبودی تک ءَ چہ ایشی ءَ پیش آواران ھنکین ءِ ھند جھل جاھو ءِ اسکولانی جاور ءِ سر ءَ ھم گزارش شنگ کرتگ اَت ، آئی ءِ تہ ءَ چہ پاکستانی لشکر ءِ نیمگ ءَ اسکولانی بندی ءُ آیاں لشکری بنجل جوڑ کنگ ءِ جیڑہ سھرا کنگ بیتگ اَت۔
چاگردی گھبودی تک بی این ایم ءِ رد ءَ پاکستانی لشکر ءُ مھترھند ءِ اے گامگیج ماں بلوچستان ءَ پاکستان ءِ نوکابادی تْرام ءِ جلشک اَنت ءُ سنچ ءِ لپاشگ ءِ سھرائیں مناک اَنت۔
