شال: بلوچ نیشنل موومنٹ نا ترجمان تینا اسے بیان اسے ٹی پارے کہ عبدالحفیظ زھری پاکستان نا عدالت ھن آجو مننگ اَن پد، پاکستان نا پوج و ایجنسی ھودے واپس بیگواہ نا کوشست کننگ ریاست ھونا زند اے مشکلات ٹی شاغان اے ۔ انصاف کروکا دنیا نا ادارغات آ مداخلت آن بیدس ھونا خاندان نا زند پین زیات مشکل و تکلیف ٹی مروے۔
ھو پارے ۲۷ جنوری ۲۰۲۲ اے پاکستان عبدالحفیظ زھری اے دبئی پولیس و امارت نا حاکم آتیہٹ اَٹ گرفتار کریفے ھودے شش دے ٹی پاکستان نا حوالہ کننگا۔ پدا پاکستان ھودے مسے تُو اسکان بےگواہ کریے پدا سلاح الینک نا دروغ سے نا مقدمہ سے ٹی ھونا گرفتاری اے پاش کرے ھودے کراچی ٹی بندی کرے۔ ۳ فروری ۲۰۲۳ آ پاکستان نا اَسے عدالت آس ھودے بے قصور پارے ھودے آجو کرے۔ھونا خاندان والاک ھودے جیل آن ھوراغا دننگ ہسورا اسیوار پدا پاکستان نا ایجنسی والاک ھودے آغوا کننگ نا کوشست اَس کریر ھورا والاتا مزاحمت اَن ھوڑا پین تشدد کریر۔ ریاست نا تیرگواری آن ھونا ھورا والاک و عبدالحفیظر سخت ٹپی مسہور۔
بی این ایم نا ترجمان پارے پاکستان نا ریاست و ھونا طاقتورنگا ادارآک تینا پورا زور اے خلنگ او کہ زھری خاندان اے امر خلین زھری خاندان اے ختم کننگ کِن ریاست نا مُچھا مشینری حرکت آ ٹی بسونے۔ داڑان مست عبدالحفیظ زھری نا سینزدہ سال نا ایلم مجید زھری اے شش دے زبردستی بیگواہ کننگ اَن پد ھودے شہید کننگا و ھونا جون اے خسنگا۔ھونا باوا حاجی رمضان اے دے نا مون اٹ شہید کننگا۔ انون ھونا اِلحہ نا مار راشد حسین اے عرب امارات آن گرفتار کرفینگا ھو اینو نا دے اسکان بےگواہ اے ۔
ھو پارے انسانی حقاتا ادارآک “ ریاست بمقابلہ اے زھری خاندان” نا معاملغاتے آ غور کے دا خاندان نا مدد کننگ کن ہر وڑنا قدم اَس ہرفینگ کن مونا مستی برے۔دا خاندان نا خلاف خالی ریاست نا مچا مشینری فوج فوج اتون اوار دا جرم اَٹی ھوار اے۔ ھمو کہ دا ریاست نا عدلیہ تون ھوار ایلو ادارتے براہ راست کنٹرول کیک۔
انسانی حق آتا خواہوک و ایلو سیاسی کارکناک عالمی ادارآتا مونا اسے جوانو مثال سے نا وڑاٹ دا ایت اے تخر و اوفتان سوال کیر کہ دا ریاست اگہ بلوچاتے حق تینگ ان حقاتن انکار کیک، پدا بلوچات اے کن تینا بقاء و زندگی اے بچفنگ کن پین ہرا کسر بچان اے؟
ترجمان پارے بلوچ قوم اے بلوچستان آٹی زندگی نا حق آن محروم کننگان اے داڑے ریاست نا اختیاردارہس بلوچ تون امرو سلوک کننگ خوائے کننگ کیک داڑن ھودے ہچکہ سوج ہم کپرو اے نہ ھو اسٹ اے جوابدہ اے۔انسانی حق تا دونو حالیت ٹی انسانی حق تا جہانی ادارغاک تماشائی جوڑ مسونو و عالمی برادری ہم تینا خنتے بند کرین اے۔ داوڑ اَٹ دا ادارغاک و جہانی برادری نا جہان آٹی اینو حیثیت خلاس مننگ نا کنڈا انسائے و بلوچ قوم نا جہانی ادارغاتن ہمو اومیت اے تخاسوس ھو اینو مایوسی ٹی بدل مسہونے۔
ھو پارے جہانی ادارغاتے و دنیا نا آجو اننگا ملک آتے بلوچ قوم نا جنگ آجوہی نا حمایت اے کروہی اے انتے کہ بلوچ قوم نا نسل کشی دے پہ دے ودینگ آ ٹی اے ۔ ہردے بلوچ آتا جون آک تمینگ ٹی ھو انسانی بنیاد اَٹ اوفتے زوت آن زو مدد نا ضرورت اے۔
