اقوام متحدہ نا ہیومن رائٹس کونسل جنیوا ٹی ستمبر ۔ اکتوبر 2024 نا سیشن نا وختءِ بی این ایم بلوچستان ئٹی انسانی حقوق نا حوالہ ئٹ مُسءِ دے تینا پروگرام آتے اڈ تروے۔دا پروگرام ئٹ بلوچستان ئٹی انسانی حقوق نا حالیت و بلوچ قومی سوالءِ مونءِ اتِنگیک۔
دا پروگرام آتا بندات 16 ستمبر اَن مروے ، دا دےءِ پریس کانفرنس ئس کننگیک۔ 17 , 18 ستمبر اِسکان فوٹو تا نمائشت ئس مریک اراٹی بلوچ و بلوچستان نا بارسٹ آگاہی تننگیک۔
بی این ایم میڈیا نا ادارہ ، زرمبش نیوز نا فوٹو نمائشتءِ بروکا بلوچ فوٹو گرافرز آتَن اپیل کیک کہ ھو تینا فوٹوتے زرمبش نا ای میل ، واٹساپ و ٹیلی گرامءِ مون ایتِر۔
دا پروگرام ئٹی مُچ دنیا اَن بی این ایم نا ممبرآک و لیڈرآک بشخ الور۔ دا پروگرام آتے زرمبش نیوز تون ھوار ، بی این ایم نا بازنگا سوشل میڈیا اکاؤنٹس آتیٹی لائیو شان تننگوئے۔
بلوچ نیشنل موومنٹ ( بی این ایم ) نا ترجمان پارے پاٹی بلوچستان ئٹی انسانی حقوق و بلوچ قومی آجوہی نا تحریک نا سوالءِ ارفِک کہ عالمی ادارغ آک دانگ توجُو ایتِر۔ بلوچستان اَسے قوضہ ئٹ الوکءُ ملک ئسءِ ہودے پاکستان پوجی طاقت ئٹ قوضہ کرینءِ ، بلوچ قوم مزاحمت کننگ ئٹیءِ و اننا یک کش ئٹ مروکا مزاحمتءِ خلاس کننگ کِن پاکستان نا پوج جبرئٹ بیگواہ کننگ و بغیرس عدالت سینا حکم اَن کسِفنگ نا وڑئنا سختءُ جرم آتیٹی ھوارءِ۔ بلوچ سرمچار آتا حملہ غاتے تورنگ اَن بے سوب مننگ نا غصہءِ پاکستان نا پوج لَس مخلوکءِ کشِنگ ئٹیءِ۔ بلوچستان نا زی آ پاکستان مارچ 1948 اے قوضہ کرے ہمو وخت اَن الیس اینو اِسکان پوج کشی کننگ ئٹیءِ۔ اینو پگہ بلا پوجی و سیاسی بندغ آک بلوچستان ئٹی مروکا نسل کشی ، جنگ و أپریشنءِ زیات کننگ نا اشارہءِ تننگ ئٹیءُ ارا بروکا دے تیٹی زیات خونریزی نا کُنڈا اِنوئے، دادے تورنگ کِن عالمی مخلوکءِ زوُتس قدم ئس چِست کننگ زلوریءِ۔
ھو پارے بلوچ سرمچار آتَن شکست کُننگ و تینا پوجی بے سوبیءِ ڈکننگ کِن پاکستان نا پوج موست اَن جبرئٹ بیگوا کروکا بلوچ آتے شہید کیک پدا ہوفتہ جوُن آتے خسسِک، ہراٹی داسہ زیادتی ایسونءِ۔ اننا کُل حالیتءِ جینوا نا تقریب ئٹی پاش کرون۔
بی این ایم نا کُنڈ اَن انسانی حقوق و بلوچ قومی کارکن آتَن دا پروگرام ئٹی بشخ الِنگ نا خواستءِ کینا۔
سوشل میڈیا ٹی بازنگا ہیش ٹیگز آتَن دا پروگرامءِ شنگ کرون۔
ترجمان پارے پاٹی نا کُل ممبرآک و دوست خوآک سوشل میڈیا ٹی دا پروگرامءِ خاص توجُو ایتِر و بازنگا زبان آتیٹی شنگ مروکا اِیت و گپ آتے ہیش ٹیگز آتون زیات آن زیات وائرل کیر۔
