کیچ: بلوچ نیشل موومنٹ نا ترجمان تینا بیان ئٹی پارے کہ ایف سی کارندہ آک اسہ وار پدا کولواہ ٹی نیاڑی تتون جنسی زیادتی نا شرمناک ءُ کوشست اس کرینو۔ پاکستانی لشکر بلوچستان ئٹی بنگلہ دیش نا تاریخ ءِ دہرائفنگ خواہک ہرا نا بلوچ چاگڑد آ بھس کروک زہم تمو و بلوچ قوم ئنا غلامی نا زند پین زفت مرو۔
اونا پاننگ ئس کہ بی این ایم ءِ ہندی بندغ آتا شکائست رسینگانے کہ تدوکا نن ’یارو پنی ءُ ایف سی نا صوبیدار ئسے نا شیف کاریم کروک کارندہ آک‘ کولواہ ڈنڈار ضلع کیچ ئنا خلق ڈل بازار ئٹی اُرا ٹی نرینہ آتا ساڑی نہ مننگ نا فائدہ ارفِسہ توفک نا زور آ پیہانو و زالبول و چنا تتون جنسی زیادتی نا کوشست کرینو۔ زالبول و چنا تا مزاحمت و کوکار و توار آ خلق ئنا باتیک مچ مسونو ہرا نا سوب آن ایف سی کارندہ آتے تینا مسخت ئٹی بے سہبی مرِسہ پدی مروئی تمانے۔
اونا پاننگ ئس کہ بلوچستان ئٹی فوجی کارند آک بندغ آتے جسمانی و نفسیاتی بے دادی، خون و غارت گری و الس ءِ چاگڑدی نسخان تننگ آن بیدس وار خنِسہ زالبول و چنا تتون جنسی زیادتی ہم کیرہ۔ دنو کیہی رپورٹ رسینگانے ہرافتیٹی برامی و بے برام آ نیاڑی تتون جنسی زیادتی کننگانے ہرا نا سوب آن اوفتے چنا بٹفوئی تمانے۔
بی این ایم نا ترجمان خواست کرینے کہ جہانی میڈیا و ہندی میڈیا بلوچستان ءِ میڈیا بلیک آؤٹ آن کشیسہ رژنائی ٹی ہتنگ کن تینا کڑدار ئے ادا کے تانکہ بلوچستان ئٹی رہینگوکا بندغ آتے ریاستی زوراکی آن خلاصی رسینگے۔
