شال: بلوچ نیشنل موؤمنٹ نا ویلفئرسیکریٹری ماسٹر اقبال پیرکوہ نا حالیت آتا زی آ افسوس کرِسہ پارے کہ پیرکوہ ٹی دیر مفننگ نا سَوب آن اُست و پڈ ئنا وبا تالان مسونے کہ ساف ءُ دیر مفننگ نا سَوب آن ہشت تو ئنا چُنا سے آن ہلیس تا 75 سال نا عمر ئنا 13 آن زیات بندغ آک مرک ئنا گواچی مسونو۔
اوفک ہندی و جہانی کُمک کروک آ ادارہ تے آن خواست کرینو کہ اوفک ڈیرہ بگٹی نا ہند پیرکوہ،نصیر آباد و ضلع لسبیلہ نا سونمیانی وندر ٹی میڷ تا بیماری نا توننگ کن دیر ئنا وے مفننگ نا جیڑہ ءِ زوت حل کننگ نا کوشست کیر۔
اوفک تینا درشان ئٹی پاریر کہ بلوچستان نا ہندا ضلع آتون اوار ایلو ضلع تیٹی ساہدار آتا سِل ئنا بیماری لامپی اسکن ڈیزیز نا سَوب بھازنگ آ ساہدار آک کھسکونو۔ بلوچستان ئٹی 44 فیصد زیات بندغ آتا زند ئنا گدرفنگ ہندا ساہدار آتا توننگ آن مریک ولے تدوکا منہ سال تیٹی بلا بیماری و ڈکال نا سوب آن بلوچستان نا نیم آبادی نا زند گیشتر تکلیف مسونو۔ ساہدار آتے مروکو بیماری تا سَوب آن اقتصاد(زر ) آ اثر تمانے ہندا سوب تعلیم،کُننگ ایلو چُنکا چناتا جان جوڑیک ہم متاثر مسونو۔
ماسٹر اقبال پارے کہ ہندی حال آتا رد ئٹ چھار شنبے نا دے پیرکوہ ٹی ہندا مرض نا سوب آن 13 بندغ ساہ تسونو۔ اوفتیٹی انور ولد باغی عمر 2 سال باغی کالونی نا تولوک، خدیجہ بنت اکبر علی عمر 8 تو میر حاجی کالونی نا تولوک،فرزانہ بنت نظیر احمد عمر 2 سال لعل محمد کالونی نا تولوک، ظفر علی ولد سخی محمد عمر 2 سال میر حسین کالونی نا تولوک، نوراتون بنت چلو عمر 2 سال باغی کالونی نا تولوک، سعدیہ بنت بشیر عمر 2 سال بختیار کالونی نا تولوک،میر زادی بنت بشیر عمر 1 سال لعل محمد کالونی نا تولوک، صاحب زادی لیاقت نا اُرائی عمر 25 سال میر حسین کالونی نا تولوک، ساھو ،بری نا اُرائی عمر 75 لعل محمد کالونی نا تولوک،حضور بخش عمر 65 سال بند تھل و محمد بلال ولد رزاق عمر 2 سال بھٹوکالونی نا تولوک آتا پنک اوارءُ۔
