تمن گورشانی نا مخلوک پاکستانی پوج نا زوراکی اَن بیدس میزائل نا ٹیسٹ کننگ کِن تینا خلکءِ خالی نہ کننگ اَسے جوانو و جرات مندءُ پیسلہ ئسے۔ دا ہمیشہ کِن علاقہءِ اللِنگ کِن اَسے بلو دھوکہ ئسے ، بلوچ مخلوکءِ اُشار مرویءِ۔ پاکستان اَسے مکار ئسے دا ہر وخت دنیاءِ دھوکہ ٹی تیخانءِ و تینا اندری انگا فائدہ تیکِن انسانیت نا خلاف کاریم کرینءِ۔ دا اِیت و گپ آتے بلوچ نیشنل موومنٹ نا چیئرمین ڈاکٹر نسیم بلوچ تینا اَسے بیان سیٹی کریسا پارے۔
ھو پارے پاکستان نا پوج راجن پور نا علاقہ تمن گورشانی ٹی ماڑی ، موضع کروزان ، دراڑتل ، موضع چمبڑی ، موضع لوٹ لڑ ، شم ، کلچاس و ریکانی گھور ئٹی مقامی انگا بندغاتءِ پارے کہ ھو علاقہءِ خالی کیر کہ نن داڑے تینا ایٹمی میزائل آتا تجربغاتءِ کین۔بلوچستان نا زی آ پاکستانی ریاست قوضہ کرے کہ دانا وسائل آتَن تینا پوجی زلورت آتاتءِ پُورو کے و پنجاب نا ترقی کِن خرچ کے داڑن بیدس ھو بلوچستانءِ ایٹمی ہتھیارآتا جوڑکننگ و ایٹمی دھماکہ غاتءَ تجربغاتءَ جاگہ اَس جوڑ کرینءِ۔
ڈاکٹر نسیم بلوچ پارے دنیا چاہیک کہ پاکستان اَسے مکار و دھوکہ بازو ریاست ئسے امو کہ موُست دنیاءِ چم ئٹی “ڈاکٹر قدیر خان “ نا ذریعہ ئٹی ایٹمی ہتھیارآتے پینتین تننگ نا جرمءِ کریسوس۔ داسہ بلوچستان نا علاقہ آک ڈیرہ غازی خان و راجن پورءِ خطرناک انگا ہتھیارآتءَ تجربغاتہ جاگہ اَس جوڑ کرینءِ۔ دا علاقہ آک یورینیم نا غیر مافوظ انگا خوتغ آتا وجہ ھن تابکاری انگا اثرات آتا شکار مسونءُ و داسا ہر دے زیات خطرناک انگا ہتھیارآتا تجربغاتءَ ذریعہ ئٹ علاقہ نا مقامی انگا آبادیءِ خالی کننگ کِن زور شاغِنگ ئٹیءُ تنکہ دا جاگہ نا معدنیات آتا خزانغاتءِ قوضہ کے۔
ھو پارے بلوچستان نا علاقہ آتیٹی سردی باز زیات مسونءِ و پاکستان نا ریاست خوائیک کہ مخلوک بغیرس کمک ، مناسبءُ رہائش نا بست وبند و واپس بننگ نا خاسو ضمانت سیئن علاقہءِ خالی کے۔ داڑن بیدس دا خدشہ تینا جاغہ ئٹ راستءِ کہ اگہ ھو علاقہءِ خالی کِیرا پدا واپس ہوفتے ھوڑے اللِنگ مفرورءِ۔ ہوفتا ہوراتے و مال دلوت آتے قوضہ کننگیک ہوفتے ہمیشہ کِن درپدری نا زند تدفِنگ کِن مجبور کننگیک۔ اننا وجہ اَن مخلوک تینا جاگہ آتے ہچ وڑسیٹی اِللِنگ خواپک۔
ڈاکٹر نسیم پارے 2018 ئٹی پاکستانی پوج پواد کوہ ( کوہ ء پواد ) نا خُڑک انگا علاقہ تیٹی تینا میزائل نا تخربغاتءِ کریسوس اموفتا نشان آک بارگ پواد ، مرنج ، گزبوڑ ، دراگل ماڑی ، کلیری تل ، ساوڑی گھور و جوپ پواد نا آبادی تیئٹ اریر ۔ اینوہم دا علاقہ آتے تجربغاتن مقامی اِنگا آبادی آتے تاوان رسینگیک۔
ھو پارے 6 اکتوبرءِ ڈیرہ غازی خان ئٹی اَسے پراسرارءُ دھماکہ اَس مسوسوس۔ مقامی انگا میڈیا نا رپوٹ نا وڑھٹ دا دھماکہ ڈیرہ غازی خان نا “جوہری انگا تنصیبات آتا خُڑکءِ مسئونءِ۔ داڑن پد علاقہ نا انٹرنیٹ و مواصلاتی نظام ءِ بند کنگاءَ۔ پدا پاکستانی میڈیا دا پراسرار انگا دھماکہءِ پاکستانی حکمران تا بیان ئٹ پارے کہ دا پاکستانی ائرفورس نا فائٹر جیٹ اَن پیدا مروکا سونگ بوم مسئونءِ ۔ولے دا اِیت نا ہچو ثبوت اَس تننگتو کہ آخر ھو ہرا خطرہ نا حالیت بسوسوس کہ پاکستان نا ایف 16 , ایف 17 یا جے 10 نا وڑانگا سپر سونگ ائر کرافٹ مُچ قانودآتا خلاف ورزی کریسا شاری آ آبادی آتا زی اَن توار نا رفتار اَن تیز بال کرفِنگیک۔ 6 اکتوبر نا دھماکہ اَسے پراسرارءُدھماکہ اَس اسکا، عالمی ادارغاتے دانا پٹ و پولءِ کرویءِ انتیکہ پاکستان موست ہم ایٹمی ہتھیارآتا تیاریتے اندری تخانءِ و ایٹم بم جوڑ کریساءِ۔ داسہ ہم دا دروغ نا خیرا بلُو راستی اَس ارے امو دا خطہ و دنیا کِن تباہی یا بے چینی نا وجہ ئس جوڑ مننگ کیک۔
بی این ایم نا چیئرمین پارے ڈیرہ غازی خان و راجن پور بلوچستان نا علاقہ آکءُ۔ بی این ایم تون ہوار مُچ بلوچ قوم ھو جاگہ نا مخلوک تون ھوارءُ و ہوفتا خلاف مروکا ہر وڑنا سازش سے آ چُپ مفرور ہوفتون ہر وخت اَسیجاگہ مرور ۔
