بلوچ نیشنل موومنٹ نا چیرمین ڈاکٹر نسیم بارکھان اَٹی مروکا دلخراشنگا واقعہ نا بارا ٹی پارے کہ دا ریاست و دا ریاست نا ایجنٹاک بلوچ نا نسل کشی و مظالم اَٹی باز زیادہ تیزی ایسونو۔بارکھان اَٹی علاقہ نا ایم پی اے عبدالرحمن کھیتران اَسے لمہ سے تون ھوار ھونا شش چوناتے تینا ذاتی اننگا جیل اَٹی بند کریسوس۔اوفتیٹی اَسے چُنکو مسھڑ ھس ھم اَسُکا ۔اوفتے چار سال ناسے بدنی ، ذہنی و جنسی اُو تشدد نا نشانہ جوڑ کریسا اوفتے کسفنگیک اوفتا جوناک سیشمئے نا دے آ عبدالرحمن نا حویلی نا خڑکا خنگیرا۔ دا درندگی نا جواب تننگ کِن بنداغاتے دا درندہ صفت انگا بندغ نا خلاف مزاحمت کروی اے۔ریاست و ریاست نا ایجنٹاتا خلاف مزاحمت کننگ کل بلوچ آتا زی آ فرض اے ۔بلوچ معاشرہ ٹی دوننگا بندغاتا ہچو گنجاہشت اَس اَف۔پاکستان نا ریاست قوضہ اننگا یعنی مقبوضہ بلوچستان اَٹی قوم دوستی نا سیاست نا زی آ پابندی خلکونے و ننا سر زمین اے پارلیمانی پاٹی تا دُوٹی تسونے داخاطرا کہ اوفتا روایاتاتے آسانی ھٹ ماسن ختم کے۔
ڈاکٹر نسیم پارے دا چُوناتا پاوا خان محمد گزینی مری باز وار سوشل میڈیا ٹی دا نام نہاداننگا ریاست، ریاست نا ادارغاتن و نام نہاداننگا قبائلی سربراتن مدت نا خواستے کرے ولے افسوس بلوچ اَس مننگ نا وجہ غن ھودے خف توروکس اَسِٹ ھم مونا بتہو۔مُچ قبائلی شخصیت آک درو ھم چپ اسورا اینو ھم چپ اُو انتے کہ عبدالرحمن نا و اوفا آقا اَسِٹ اے۔
’’ دا چناتا ذاتی اننگا جیل ٹی بند مننگ نا باراسٹی پاکستان نا سینٹ اَٹی سینٹر کامران مرتضی ھم نشاندہی کریسا پارے خان محمد نا ظحیفہ و چناک صوبائی وزیر نا ذاتی اِننگا جیل اَٹی بند اُو۔ اُونا داایتےاَسِٹ ھم خف توتوے انتے کہ بلوچستان نا کُل ایم پی ایاک جی ایچ کیو نا آشربادٹ تخنگان اُو۔ دانا بدلہ ٹی اوفتے بلوچاتا زی آ ظلم و نسل کشی نا ذمہ واری تننگان اے۔ داوختا کُل ممبراک پاکستان نا پوج نا اشارتیٹی بلوچستان اَٹی بندغاتے تذلیل کننگ ، کسفنگ، قوم پرستی نا سیاست اے ماسن خلاس کننگ، آجوہی خواہوکاتا شیطانی کننگ و مذہبی شدت پسندی اے ودفنگ ھٹ گٹ او۔دوننگا واقعاتیٹ چپ کننگ ننا راستی اننگا کسر اے مننگ اے۔‘‘
ھو پارے عبدالرحمن کھیتران خان محمد مری نا چُنکا مسھڑ فرزانہ اے جنسی درندگی نا نشانہ جوڑ کرے و سیشمئے نا دے آ اُونا گُٹ اے تڑے و اودے دیدہ دلیریھٹ کسیفے، داڑن اننا معلوم مریک صوبائی وزیر تینا آقا تا حکم اے پورا کننگ کِن ہچو کاریم سے ھن چک و پد مفک۔ ایلو نیمغ ھن دا واقعہ ماھل بلوچ نا بیگواہی ھن بندغاتا دھیان اے پین نیمغا دننگ نا اَسے نا کام او کوشست اَس کننگ اے۔بارکھان نا واقعہ اَسے تکلیف تیروکو سنگینو جرم اَسے۔پاکستان نا ادارغاک وختی دا فیصلہ اے کرینو کہ اوفتے بلوچاتے ہر حال اَٹی ختم کروہی اے۔داسا وخت بسونے جہانی ادارغاک بلوچستان ھٹی پترینگر بلوچ نسل کشی اے تورنگ کِن تینا حق اے پورا کننگ کن تینا کوشستاتے تیز کیر۔
ڈاکٹر نسیم پارے ریاستی ادارغاتا خِیرھٹ نام نہاد اننگا صوبائی وزیر عبدالرحمن کھیتران خان محمد مری نا ظحیفہ گراناز، ھونا مسھڑ فرزانہ، ھونا مار بیست و دو (22)سالہ محمد نواز، پانزدہ(15) سالہ عبدالقادر و اَسے چنکو مسھڑ اَس باز بے دردی ھٹ کسفننگ ھن پد اوفتا جُونتے خسانے۔ گراناز تینا زندگی ٹی عبدالرحمن نا دا عمل اے پاش کریسوس ۔ دا ایت وختی مونا بسوسس کہ دا خاندان عبدالرحمن نا جیل اَٹ غلاماتا وڑ زندگی گدریفنگ اَٹی او۔داڑن بیدس عبدالرحمن اے دافتا کسفننگ ھن پد قانون ھن ہچو خوف اَس ھف او دے خبر اے دا عمل ھن ریاست اودے تحفظ ایتک ۔
بی این ایم نا چیرمین پارے بارکھان و اننا وڑاننگا بازنگا واقعاتاتن پد اگہ اسٹ اَس سمجھک کہ ھو پاکستان نا فریم ورک ھٹی بلوچ نا حقاتا، و ننگ و ناموس نا
حفاظت اے کیک تو ھو باز بلو غلط فہمی سے ٹی اے۔پارلیمانی پاٹی تا کارکناک دا ایت اے سمجھ ایر و پُو مریر اوفتے جہد آجوہی ٹی حوارنگا پاٹی تون ھمتوار مروی اے انتیکہ پگہ ھو تینا ضمیر اے خوش تخِن کیر و تینا بروکا نسل کِن جوانو مثال اَس مونا اتِن کیر نہ تو تاریخ افتے ھم عبدالرحمن کھیتران نا وڑننگا کردارتا وڑٹ دا جرم تیٹی شریک لِکیک۔
