بلوچ نیشنل موومنٹ نا ترجمان پارے کہ 28 جون 2009 نا دے بلوچستان نا تاریخ ئٹی اَسے مونُو نوشتہ کروکُو سبغ سینا وڑ ئٹیءِ ، ہراتم ننا بنجاہی رہنما ڈاکٹر دین محمد بلوچءِ پاکستانی پوج گرفتار کننگ اَن پد بیگوا کیک۔ اینو 15 سال گِدرینگ اِنگ اَن پد پاکستانی ریاستءِ داخَس جرات اَف کہ ھو ڈاکٹر دین محمد بلوچءِ تینا اَسے عدالت سیہ پیش کِے۔ دا دے نہ کہ ننے ڈاکٹر دین محمد بلوچ نا یات ئٹ شاغِک بلکِن بلوچستان ئٹی جبرئٹ مروکا بیگواہی تا خُولیفُوکا کسہ غاتہ گواہی ھم ایتک۔
ترجمان پارے ڈاکٹر دین محمد بلوچ نا بیگواہی نہ کہ ھو نا خاندان بلکِن بلوچ سماج نا زی آ ھم اَسے نفرت اَس شاغانءِ۔ ہونا چُنکا و معصوم اِنگا مَسِنک احتجاجی کیمپ ، عدالت و نام نہادءَ کمیشن آتیٹی بَلون مَسُور۔ ڈاکٹر دین محمد بلوچ نا خاندان رنج و پریشانی تا جاغہ اَس جُوڑ مَسونءِ۔
ھو پارے ڈاکٹر دین محمد بلوچ نا جبرئٹ بیگواہی پاٹی و خاندان کِن بلُو تاوان اَسے ہرانا کمی پُورا مننگ کپپک۔ دا اَسے انُو خُولیس اَسے ہرا لفظ آتیٹی بیان کننگ مفَک، ولے ہونا بہادر و باشعور اِنگا مَسِنک تینا باوا نا محبت کِن جبری بیگواہی نا دردءِ تینا طاقت جوڑ کریسہ پاکستان نا پوج و خفیہ ادارغاتہ دُو ئٹ کُل بیگوا مروکا بندغاتہ توار جوڑ مسُور و اینو سمی بلوچ نہ خالی بلوچستان بلکِن عالمی سطغءَ انسانی حقوق کِن کاریم کروکاتہ کُلن بلا توار جُوڑ مسونءِ۔ سمی بلوچ نا جُہد دا ثابت کرینءِ کہ دشمن نا دُوتیٹ رسینگوکا دردءِ اَمر طاقت اَس جُوڑ کرویءِ و وخت نا فرعون آتُو اَمر جنگ کرویءِ۔
28 جونءِ اننا حوالہ ئٹ نن بازنگا پروگرام آتے اڈ اِیتون۔
1:سوشل میڈیا کمپین : نن #Release DrDeenMohammad و #StopEnforcedDisappearances نا ہیش ٹیگز آتُون سوشل میڈیا ٹی کمپین اَس چلائفِنءَ۔ پاٹی ، تنظیم و انسانی حقوق نا ادارغاک و انسان دوست انگا بندغاتَن خواست کینا کہ ھو دا کمپین ئٹی زیات آن زیات ھوار مریر و ڈاکٹر دین محمد بلوچ نا بیگواہی نا برخلاف ننا توار جوڑ مریر۔
2: ریفرنس پروگرام : دا دےءِ کُل ذیلی انگا ادارغاک ڈاکٹر دین محمد بلوچ نا خدمت آتے مونءِ اتیر ، ہونا بازیابی کِن جُہد کیر و انسانی حقوق نا کاریم آتے مونءِ اتیر۔
3: پمفلٹ و بروشر : ڈاکٹر دین محمد بلوچ نا شخصیت ، جدوجُہد و بازیابی کِن آگاہی مہم نا حوالہ ئٹ پمفلٹ و بروشر بشخِنگیک اراٹی ڈاکٹر دین محمد بلوچ نا زند، ہونا جبرئٹ بیگواہی و بلوچستان ئٹی انسانی المیہ نا زی آ بازنگا تفصیل آک ھوارءُ۔
4: آگاہی مہم : عالمی سطغءِ بازنگا عوامی جاگہ غاتے آگاہی مہم اڈ تننگوئے تنکہ زیات آن زیات بندغاتءِ دا مسلئہ اَن معلوم داری رسینگے۔
نن نما کُل اَن خواست کینا کہ دا دےءِ ننا اڈ تروکا پروگرام آتیٹی زیات بشخ البُو و ڈاکٹر دین محمد بلوچ نا بازیابی و بلوچستان ئٹی مروکا جبرئٹ بیگواہی تا خلاف تینا توارءِ چِست کبُو۔ نما حمایت کننگ و بشخ الِنگ اَن نن ظلم نا برخلاف اَسے مظبوطءُ توار اَس خلِنگ کینا۔ اینو ، نن نم کُل یک توار مرین عالمی ضمیرءِ سُریفِنگ نا عزمءِ کین تنکہ ننا لمہ غاتہ کُوکار ، ایڑ آتہ ہوغِنگ و فریاد کننگ و چُناتہ چیہانٹ آک عالمی سطغ آ خَف تورنگءِ۔
