جنیوا: بلوچ نیشنل موومنٹ نا چیرمین ڈاکٹر نسیم پارے چین و پاکستان نا اتحاد مغرب نا مفاداتیکِن خطرہ سےاو اموڑے بلوچ مخلوق نا بنیاتی و بندغی حقاتیں مون پہ مون حملہ کننگ اے۔
دا ایت آتے ھو اقوام متحدہ نا بندغی حقاتا کونسل نا 52 می اَسے باقاعدہ اُو نشست سے نا موقع اے اَسے شِیف اُو تقریب سے ھن خطاب کریسا پارے۔دا کانفرنس اے اقوام متحدہ نا ادارتون اَسے جاگہ کاریم کروکا غیر سرکاری تنظیم (این جی اوز) ضمیر نا آجوہی کِن انجمن آتون و بندغاتون حواری کِن -کیپ (Coordination des Associations et des Particuliers pour la Liberté de Conscience )کریسوس۔
ھو تینا خطاب ھٹی پارے اراوختا پاکستان دا خطہ اے قوضہ کرین اے، بلوچستان نا مخلوک عام اننگا زندگی تدیفنگ کن جُہد کننگ اُو۔پاکستان نا دا جبر ھن ننا معاش ، ثقافت ، روایات تون حوار زبان اے ھم خطرہ ٹی شاغان اے ۔بلوچستان نا زیادتر مخلوق مَش تیٹی رھینگرا تینا ایرغ و دیر کِن ایٹ و میل یعنی مال داری کیرا۔ پوجی آپریشن تَن ہوفتا دیرو ارغ ھم مشکل تیٹی تمان اے ھو تینا مَش و خلکاتین لَڈ و بار کننگ اے مجبور مسون اُو۔
چیرمین ڈاکٹر نسیم چین و پاکستان نا نام نہاد اننگا اقتصادی کوریڈور نا زی آ تنقید کریسا پارے داڑن موست پاکستان بلوچستان ھٹی تنیا بندغی حقاتا خلاف ورزی اے کریسا اسکا ولے داسا چین ھم دا دے زیات کننگ اے زور تیریسا اے اَسے نام نہادو ترقیاتی اسکیم اَس زی اے شاغن کن کٹھ و جوڑ کرین او ، دا ون بیلٹ ون روڈ منصوبہ، چین پاکستان اقتصادی راہداری (سی پیک) نا بشخ اَسے۔دا منصوبہ اے زبردستی جوڑکننگ ھن ہزاراتا مقامی انگا مخلوق لڈوبار کننگ اے و اوفتے جبرھٹ بیگوا کننگان اے۔سی پیک نا مون اے ساف کننگ کن بازا خلقاتے اوشنگان اے و چین نا مفاداتا حفاظت کننگ کن بازا پوجی کیمپ و چوکی جوڑ کننگان اے، حقیقت ھٹی دا پوجیک بندغی حقاتا درندگی ھٹ خلاف ورزی کننگ نا ذمہ وار اُو۔
ھو بلوچستان ھٹی بندغی حقاتا پُوسکنا حالیت اے پاش کریسا پارے فروری 2023 ھٹی جبرھٹ بیگوا مرکاک 39 کیس آک مونا بسونو اوفتیٹی اِرا زالبول رشیدہ بلوچ و ماھل بلوچ ھم حوار او ۔ماھل بلوچ اے وختی جبرھٹ بیگوا کننگا و پدے ھودے سلہ بند اننگا تنظیماتا باسک جوڑنگ نا دروغ نا الزام اَس خلنگا۔ھودے ھونا تاتہ اے و ارا چُناتون حوار بیگوا کننگا، اوفتے 24 گھنٹہ ھن زیات بیگوا کننگا, ایلوتے پدے الہ کرے ولے ماھل بلوچ جبرھٹ بیگوا اسَکا۔بلوچ مخلوک نا بازنگا کُوکار و احتجاج و مظاہرہ تن پد اودے اَسے ہفتہ سے ھن پد عدالت اے اتنگا۔انون رشیدہ زھری اے ھونا ارِغ و چُناتون حوار بیگوا کننگا۔انونکہ رشیدہ اے 11 دے ھن پد تشدد کننگ ھن پد یلہ کننگا ولے ھونا ارِغ رحیم زھری داسکان بیگوا اے۔ اَسے پین اوست اے اوسون کروکو واقعہ اَس ضلع آواران نا علاقہ گیشکور ھٹی مَس۔دا دادبخش مسکان نا سفاکنگا کسفنگ اے۔ اودے اَسے پوجی کیمپ سے آ بٹنگک پدے ھوڑے تشدد کننگک، یلہ کننگ ھن پد ٹپ آتے سگنگ کپپک ھو دا دنیا اے اِللک۔
ھو پاکستان اے دا خطہ ھن بیدس پورا دنیا کن اَسے خطرہ ھس پائک۔ھو پائک پاکستان بلوچستان تون حوار پورا خطہ نا امن و سلامتی کن سنگینو خطرہ اَسے۔دا ضلوری اے اقوام متحدہ و ایلو عالمی طاقتاک کل دنیا ٹی بے حفاظت انگا بندغاتا جان تے بے وجہ زایا مننگ نا وجہ اے پٹیر و دادے توریر دانا مقابلہ اے کننگ کِن اَسے بلو منصوبہ اَس ٹہفیر۔دا خطہ امو وخت اسکان سلامتی و مضبوطی نا کونڈا انپک ارا وخت اِسکان پاکستان جنونیت و دہشتگردی نا پرورش و سائیڈ نا النگ اے الیپک۔پاکستان نا مذھبی عسکریت پسند آک پراکسی جوڑ کننگ و اوفتا استعمال کننگ نا پالیسی تا وجہ ھن باز بے قابو انگا جنگجوک و اسلامی انتہا پسندآک با اختیار مسون اُو۔ہمو اینو جہان نا سلامتی کن خطرہ جوڑ مسون اُو۔پاکستان نا تربیت یافتہ انگا انتہا پسندآک یورپ و مشرق وسطی ھن الیس ہندوستان اسکان دہشت گردی و حملہ کننگ اُو۔مہذب دنیا اے خطرناک انگا مذھبی جنونیت نا خلاف جنگ کروکنگا قوماتون و مقامی انگا تحریکاتا کمک اے کروی اے۔بلوچ، سندھی، و پشتون نا وڑانگا قوماک مُتکوننگا سیکولرانگا تہذیباتے مذھبی انگا انتہا پسندآتن بچِفنگ کن جہد کننگ ٹی اُو۔عالمی برادری اے زوت اَس دا مسلۂ نا سوج اے کروی اے و دا خطہ ٹی آجوہی کن جنگ کروکاتا کوشست آتے منووی اے و افتا کمک اے کروی اے۔
ڈاکٹر نسیم پارے بلوچ تینا لبرل و سیکولر انگا روایات آتا بچائفنگ کن پاکستان نا نظریاتی و اسلامی پوج و ھونا پراکسی تا خلاف جہد کننگ ھٹی اے۔داسا وخت بسون اے عالمی برادری مننے کہ بلوچستان نا مسلۂ علاقائی او مسلۂ ھس اَف بلکہ دا جہانی مسلۂ سے۔دنیا اے چین نا قوضہ و زیات مروکا اسلامی انتہا پسندی نا خلاف آجوہی نا جنگ ھٹی بلوچ مخلوک تون کمک کروی اے ۔ دا ایت ساف اے بلوچستان ھٹی بندغی حقاتا سنگین انگا خلاف ورزی ھن بیدس یورپ پاکستان تون تینا اقتصادی تعلق و معاہدہ تے تورین اے۔ اَسے جہانی اقتصادی و سیاسی او طاقت اَس چائنگ ھٹ یورپ نا دا ذمہ واری اے ھو پاکستان اے بلوچستان ھٹی ھونا کروکا عمل کن جوابدہی کے۔ترجیحات نا عمومی اسکیم(جی پی ایس پلس) معاہدہ پاکستان ھن بندغی حقاتا قانون و اودے برجا تِخن کن و ھونا احترام کننگ نا پائک۔ نن یورپ اے پاننگ خوانا ھو آئندہ اجلاس ھٹی بلوچستان نا سنگین انگا حالیت اے مونا اتے و پاکستان اے ھونا عمل تا زی آ جوابدہی کن سختو قدم اَس ارفے۔بلوچستان نا بندغاتا بنیاتی انگا حقاتا و اوفتا قومی آجوہی النگ کن اوفتا مدت و کمک کن مونا برے۔
