شال : بلوچ نیشنل موومنٹ نا محکمہ سماجی بہبود نا اَسے رپوٹ سے نا وڑھٹ ضلع آواران نا اِرا تحصیل مشکے و تحصیل آواران ھٹی 76 اسکول بندوُ یا پاکستان نا پوج قوضہ کرین اِیتا و تینا پوجی پوسٹ جوڑ کرین اِیتا۔
بی این ایم نا محکمہ سماجی بہبود نا وڑھٹ تحصیل مشکے نا سینزدہ و تحصیل آواران نا شست و ستیں اسکولاک بند مننگ و سہولتاک نہ مننگ نا وجہ ھن چُناتا خواننگ اے باز بلوُ اثر اَس تمان اے : “ دا المیہ سے ھن کم اف کہ ضلع آواران ھٹی بلوچ چُناک خواننگ ھن محروم مننگ ھٹی او۔ خواننگ نا سہولتاتا کمی و اسکولاتے پوجی تا قوضہ خواننگ نا بنیاتی انگا حقاتا خلاف ورزی اے، دانا جہانی تنظیماتے مذمت اے کروی اے”۔
رپوٹ ھٹی انا پاننگا اے کہ بلوچستان ھٹی خواننگ نا دا پراگندہ انگا حالیت نا زی جہان نا ادارغاک توجو ایتِر : “خواننگ اَسے بنیاتی ہو بندغی حق اَسے، داڑن محرومی اَسے علاقہ سے نا سماجی و اقتصادی ترقی نا زی بلوُ اثر اَس شاغک۔جہانی برادری اے دا مسلئہ اے کم کننگ کِن زوت اَس مون مستی بروہی اے و بلوچ چُناتے معیاری انگا خواننگ اسکا سر کننگ نا بروسہ اے تروی اے۔
’’ جہانی برادری پاکستان اے زور تِخِر کہ ھو بلوچ چُناتا خواننگ نا حق نا احترام اے کِیر و اسکولاتَن قوضہ کننگ ھن پاریز کیِر۔ بلوچستان نا تینا اَسے ثقافتی و نسلی ھو پہچان تون ھوار اَسے قومی حیثیت اَسے اننا خاتِر ھن پاکستان نا ریاست اے تینا تاریخ، زبان و ثقافت اے بلوچ مخلوق نا زی آ خلوی اف۔‘‘
رپوٹ ھٹی بلوچستان نا خواننگ نا بد حال انگا حالیت کِن بلوچستان نا حوالہ ٹی پاکستان نا کالونیل پالیستے ذمہ دار کننگان اے ۔ ’’ بلوچستان ٹی پاکستانی ریاست و بلوچ مخلوک نا رشتہ قوضہ گیر و محکوم نا اے۔ ریاست پوجی زور ھٹ بندغی حقاتا خلاف ورزی کننگ ھٹی اے داڑن بیدس مخلوک اے خواننگ محروم کننگ نا کوشست مننگ ھٹی اے۔علاقہ نا بازنگا اسکولاک مناسب انگا سہولت تیہن محروم ہو یا بندوُ ، داڑن چُناتا خواننگ بےکچ متاثر مسون اے ۔‘‘
دا رپوٹ اردو و انگریزی زبان ھٹی بی این ایم نا ویب سائیٹ تے اے ھم شنگ کننگان اے دا دے نوم ہوڑے پی ڈی ایف فائل اے ڈاؤن لوڈ کننگ کِیرے۔رپوٹ ھٹی ضلع آوارن نا تحصیل مشکے و تحصیل آواران نا 76 بند انگا اسکولاتا تفصیل اے ھم تننگان اے۔
بلوچ نیشنل موومنٹ نا محکمہ سماجی بہبود داڑن موست ضلع آواران نا تحصیل جھل جاھو نا اسکولاتا حالت نا زی آ اَسے رپوٹ اَس پیش کریسوس ، ہوڑے پاکستان نا فورسزاتا کنڈ ھن اسکولاتا بندش و ہوفتے پوجی کیمپ تیٹ بدل کننگ نا مسلئہ اے مونا اتنگاسوس۔
محکمہ سماجی بہبود بی این ایم نا وڑھٹ پاکستان نا پوج و ریاست نا دا وڑآک بلوچستان ٹی پاکستان نا نوآباتی نظام نا مون اے پاش کِیرا و شعور اے دبائفنگ نا سافو ثبوت ھم ایتِرا۔
