شال : بلوچ نیشنل موومنٹ نا شعبہ چاگڑدی دیمروی تینا رپورٹ ئٹی پارے کہ محکمہ تعلیم تحصیل جاھو ضلع آواران ئٹی 25 اسکول آتے بند کریسہ کیہی تے پاکستانی لشکر نا حوالہ کرینے ہراڑان تیبہ ضلع ٹی خواننگ و چاننگ نا عمل بند ءِ ۔ دا اسکول آتا بندی نا مدت پانزدہ سال،دہ سال،ہفت سال،پنچ سال،شش سال ،ارا سال و اسہ توو ئنا درمیان ئٹی ءِ ۔
رپورٹ نا رد ئٹ بوائز پرائمری اسکول زیرکانی جاھو تدوکا پنچ سال ،بوائز پرائمری اسکول واستی گوٹھ تدوکا پنچ سال،بوائز پرائمری اسکول وادی بجار تدوکا پنچ سال آن،بوائز پرائمری اسکول عثمان چنال گوٹھ جاھو تدوکا اسہ تو ئسے آن ،بوائز پرائمری اسکول سورگر جھاو تدوکا دہ سال آن،بوائز پرائمری اسکول سری ٹڑانچ جاھو تدوکا پنچ سال آن ،بوائز مڈل اسکول نوندڑہ پیلار جاھو تدوکا پنچ سال آن ،بوائز پرائمری اسکول نرمگی جاھو تدوکا ارا سال آن،بوائز پرائمری اسکول نیک محمد گوٹھ جاھو تدوکا پانزدہ سال آن،بوائز پرائمری اسکول ملاگزی جاھو تدوکا ہشت سال آن ،بوائز پرائمری اسکول میر ابراہیم کنڈی جاھو تدوکا پنچ سال آن ،بوائز پرائمری اسکول میتگو جاھو تدوکا پنچ سال آن،بوائز مڈل اسکول مردانگو نوندڑہ جاھو تدوکا دہ سال آن،بوائز پرائمری اسکول لاڑاندری جاھو تدوکا اسہ سال ئسے آن،بوائز پرائمری اسکول کچ کمبی جاھو تدوکا پانزدہ سال آن،بوائز اسکول کورک پیلار جاھو تدوکا پانزدہ سال آن،بوائز پرائمری اسکول کولنج نوندڑہ جاھو تدوکا دہ سال آن،بوائز اسکول کوہڑو جاھو تدوکا ہفت سال آن،بوائز پرائمری اسکول جمعہ محمد حسنی گوٹھ جاھو تدوکا ارا سال آن،بوائز پرائمری اسکول جکی جاھو تدوکا ارا سال ءُ نیم آن و بوائز پرائمری اسکول حکیم داد گوٹھ نوندڑہ جاھو تدوکا ہفت سال آن بند ءِ۔
بی این ایم نا چاگڑدی دیمروی محمکہ نا نیمہ آن شینک مروکا رپورٹ ئٹی پاننگا کہ ضلع آواران نا تحصیل جھل جھاو اسہ پسماندہ ہند ئسے اوڑے نہ تعلیم نا سہولت ارے نہ صحت نا۔ تعلیم و صحت آن بیدس رابطہ نا نظام ہم درہم برہم ءِ ہراڑان بندغ آتے ہِننگ بننگ آ مشکل مننگ ءِ۔ جھل جھاو نا کیہی ہنداک کہ اوفتا گیشتر آبادی تعلیم نا سہولت آن مر ءِ ۔ تیبہ ہند ئٹی کل اسکول آک یا بند ءُ یا اوفتے پاکستانی لشکر و ایف سی نا چوکی و کیمپ آ تیٹی بدل کرینے۔
پاکستان بلوچ الس ءِ ذہنی،معاشی چاگڑدی استحصال تون اوار خواننگ آن ہم مر کننگ ءِ تانکہ بلوچ راج باشعور مریسہ تینا راجی حق آتے آن بے خیال مرے و پاکستان نا قوضہ بلوچستان نا زی آ گیشتر مضبوط مریسہ کے۔
ماسٹر اقبال
رپورٹ ئٹی پاننگانے کہ بی این ایم نا چاگڑدی دیمروی نا رئی آ 25 پین اسکول آتا ریکارڈ ارے کہ اوفک کیہی سال آتے آن بند ءُ ہراڑان ایوکا دا ہند ئنا چناک خواننگ آن مر مننگ ءُ ولہ دا اسکول آتے لشکر نا حوالہ کریسہ جھاو نا الس ئنا ذہنی و جسمانی استحصال کننگ ءُ ۔
بی این ایم نا رد ئٹ اسکول آتے بند کننگ آن دا چاننگک کہ ریاست پاکستان و اونا ادارہ آک بلوچ راج ءِ خواننگ آن مر کننگ نا سازش کننگ ءُ و جھاو نا چناتے ہندا وڑ خواننگ آن مر کرینو۔
بی این ایم نا چاگڑدی دیمروی نا سیکریٹری ماسٹر اقبال پارے کہ بلوچ نیشنل موومنٹ نا چاگڑدی دیمروی نا اڈ تننگ نا مسخت بلوچستان ئٹی صحت ،تعلیم و بلوچ مہاجر آتا جیڑہ تے نشاندہی کریسہ جہانی ادارہ آتا توجہ ءِ تینا نیمہ غا ہتین و جہان نا مہذب ڈیہہ آک دا چاننگ کیر کہ پاکستان نا ننا زی آ بٹوکا نو آبادیاتی نظام بلوچ الس ئنا زندگی تے دوزخ کریسہ و تینا قوضہ گیری نا نظام تون پاکستان بلوچ الس ءِ ذہنی،معاشی چاگڑدی استحصال تون اوار خواننگ آن ہم مر کننگ ءِ تانکہ بلوچ راج باشعور مریسہ تینا راجی حق آتے آن بے خیال مرے و پاکستان نا قوضہ بلوچستان نا زی آ گیشتر مضبوط مریسہ کے۔
اوفک پاریر کہ بلوچستان نا جتا انگا ضلع آتے ئٹ کیہی اسکول آک بند ءُ یا اوفتے لشکری کیمپ آتیٹی بدل کرینو ۔ بی این ایم نا چاگڑدی دیمروی نا محکمہ دا رد ئٹ حوال اوار کننگ ءِ ،بروکا دے تیٹی ایلو ہند آتا رپورٹ آک ہم شینک کننگ مرور تانکہ بلوچستان خواننگ نا حالیت ءِ کُھل چاننگ کیر۔
