شال: بلوچ نیشل موومنٹ نا بندغی حق آتا ادارہ پانک ئنا نیمہ آن شینک مروکا سالانہ رپورٹ ئٹی پاننگانے کہ 2022 ئٹی بلوچستان ئٹی پاکستانی لشکر 629 بندغ ئے زورانسری بیگواہ و 195 بندغ ئے بیدس عدالت آن قتل و 187 بندغ ئے تشدد نا گواچی کرے۔
پانک ئنا رد ئٹ تدوکا سال پاکستانی لشکر نا ٹارچر سیل آتان 187 زورانسری بیگواہ مروکو بندغ آجو مسُر۔
رپورٹ ئٹی انفوگراف نا کمک ئٹ تیبہ سال ئنا وخت آ بندغی حق آتا حالیت مونی ہتنگانے ۔ دانا رد ئٹ پاکستانی لشکر 2022 نا تو جنوری ٹی 92 بندغ ئے زورانسری بیگواہ،15 قتل و اسہ بندغ ئسے تشدد نا گواچی کریسر، فروری نا تو ئٹی 95 بندغ ئے زورانسری بیگواہ ،42 ئنا قتل و 5 آ تشدد کریسر ، مارچ ئنا تو ئٹی 62 بندغ ئے زورانسری بیگواہ 19 ئنا قتل و 6 آ تشدد کریسر ، اپریل نا تو ئٹی 50 بندغ ئے زورانسری بیگواہ 39 ئنا قتل و 18 آ تشدد نا گواچی کریسر ،مئی نا تو ئٹی 61 بندغ ئے زورانسری بیگواہ 5 ئنا قتل و 22 بندغ آ تشدد کریسر،جون ئنا تو ئٹی 26 بندغ ئے زورانسری بیگواہ و 11 ئے قتل کریسر، جولائی نا تو ئٹی 46 بندغ ئے زورانسری بیگواہ 5 ئنا قتل و 37 ئے تشدد نا گواچی کریسر ، اگست نا تو ئٹی 55 بندغ ئے زورانسری بیگواہ ،5 ئنا قتل و 37 ئے تشدد نا گواچی کریسر ،ستمبر نا تو ئٹی 30 بندغ ئے زورانسری بیگواہ،02 نا قتل و 19ئے تشدد نا گواچی کریسر، اکتوبر نا تو ئٹی 38 بندغ ئے زورانسری بیگواہ ،15 نا قتل و 18 ئے تشدد نا گواچی کریسر،نومبر نا تو ئٹی 36 بندغ ئے زورانسری بیگواہ ،23 نا قتل و 14 ئے تشدد نا گواچی کریسر ، سال 2022 نا آخرئی تو دسمبر ئٹی 38 ئے زورانسری بیگواہ ،02 نا قتل و 19 بندغ ئے تشدد نا گواچی کریسر۔
رپورٹ ئٹی پاننگانے کہ سال 2022 بلوچستان ئٹی بندغاتے کن مچی نا سزا ۔ زورانسری بیگواہ،قتل لشکر کشی و تشدد آن پورو سال اس مسُنے۔پاکستانی لشکر ،ایف سی ،آرمی تون کاریم کروکا سی ٹی ڈی بلوچستان نا جتا انگا ہند آتا و سندھ ئٹی زالبول و چناتیتو اوار کیہی بلوچاتے زورانسری بیگواہ ،مچی نا سزا ،دروغ ئنا مقابلہ تیٹی قتل و لشکر نا کاروائی تیٹی تشدد نا گواچی کننگا۔
رپورٹ ئٹی پاننگانے کہ بلوچستان ئٹی بلوچ راج دوست پارٹی تا زی آ تیبہ پابندی ئے ،بیرہ پاکستانی لشکر نا قوضہ ئے۔ و پاکستانی لشکر نا منوکا گروپ آتے بس سیاسی آزادی ارے ۔ راج دوست پارٹی تا زی آ پابندی نا سوب آن بلوچستان ئٹی اسہ خلا ئس ودی مسُنے کہ اودے پاکستانی لشکر تینا منوک آتان پر کننگ نا کوشست کیک۔
پانک نا رد ئٹ دا وخت بلوچستان ئٹی لشکری تاغت نا مقابلہ کن لشکر نا دو آن بیگواہ بندغ آتا خاہوت آک سیاسی تنہائی نا گواچی آ کیہی سال آتا بلوچ خاہوت آک تینا بندغاتا آجوئی کن برانز کننگ او ،حکومت و خاہوت آتا نیام ئٹی کیہی وار مذاکرات مسُنے ولہ پاکستانی وے اختیار حکومت تینا وعدہ آتے پورو کننگ کپک ۔ دا کچ اسکان کہ پاکستان نا داسہ نا وزیر اعظم شہباز شریف اسہ وار اس پاریسَس کہ ای زورانسری بیگواہ آ بندغ آتا کالخواہ تیتوں ہیت کروٹ ۔ داڑاںن چائننگ مریک کہ پاکستان نا پنی آ جمہوریت وے اختیار ئے ،اختیار بس پاکستانی لشکر نا رئی آ ارے، ہندا سوب آن کالخواہ و خاہوت آتا نیام ئٹی دا مذاکرات آک بے اثر مریرہ و بلوچستان ئٹی بندغی حق آتا بحران ودنگ ئے ۔
