شال: بلوچ نیشنل موومنٹ نا ادارہ پانک بندغی حقاتا اگست 2023 نا رپوٹءِ شِنگ کرینءِ ۔
رپوٹ ئٹی توہین رسالت نا دروغ نا الزام سیٹی عبدالرؤف برکتءِ کسفِنگیک ، مغربی بلوچستان ئٹی ھانی گل و اونا اَرِغ سمیرءِ کسفِنگ، جھل مگسی ٹی زمیندار امداد جویو نا کسِفنگ، نور خاتون و اُونا چُناتے بیگوا کنِنگ، جبرئٹ بیگوا مروکا غلام فاروق زہری نا کسِفنگ و بندغی حقوق نا کارکن ایمان مزاری نا گرفتاری نا زی آ تروکا رپوٹ آک تفصیل ئٹ ھوار کننگانءُ۔
پانک نا پارغن شِنگ کروکا اعداد و شمار نا وڑئٹ پاکستان نا پوج اگست 2023 ئٹی 64 بندغاتءِ بغیر اَس عدالت سینا حکم ئن جبرئٹ بیگوا کننگاسَس ہمو کہ موست نا تُو ئن بیگوا مروکاتَن زیات اسُر۔موست نا تُوئے 57 بندغاتءِ جبرئٹ بیگوا کننگاسَس۔ادارہ پانک جولائی 2023 ئٹی جبرئٹ بیگوا مروکاتے سال نا بدترین اِنگا تُو پاریسَس ولے داسا اگست 2023 نا اعداد و شمار ئٹی دا پانگیک کہ اگست 2023 نا تُو جبرئٹ بیگوا مروکاتیکِن سال ئنا بدترین اِنگا تُو پاننگِک۔
رپوٹ ئٹی پاننگانءِ اعدادوشمار ئن اندازہ خلنگیک حالیت آک دے پہ دے خراب مننگءُ و پاکستان نا پوج و ریاست نا پالیسیک جبرئٹ بیگوا مروکاتیکِن ختم مننگ نا ہچو اشارہ اَس تِفسءَ۔ننے اَننا گمان بریک بروکا وخت ئٹ انسانیت نا خلاف دائنا جرم آک زیات مرور۔
رپوٹ ئٹ اننا پاننگانءِ اگست 2023 ئٹی 24 بندغاتءِ بغیر اَس عدالت سینا حکم اَن گرفتار و جبرئٹ بیگواہی ٹی تِخنگ اَن پد اوفتا جرم نا وضاحتءِ تننگ ئن بیدس اوفتے تشدد کننگیک پدا الہ کننگیرا۔
رپوٹ ئٹی اننا گمان کننگانءِ کہ معاشی دباؤ زیات مننگ و پیشن نا سرمایہ کار خاص کر چین نا دلچسپی نا وجہ ئن پاکستان بلوچستان نا وسائل نا لوٹ مار کننگ کِن پین شریک دار پٹنگ ئٹیءِ۔دانا خاطر کِن ہودے بلوچستان نا سیاست ئٹی مروکا مخالف یا مزاحمت کروکا طاقت آتے کمزور کننگ نا زلورتءِ تنکہ بغیر اَس روکاوٹ سیہن بلوچستان نا وسائل آتے ملٹی نیشنل کمپنی تیں و چین نا شراکت ئٹ دوزنگءِ۔ چین بلوچ قومی تحریکءِ ختم کننگ و سیاسی طاقت آتے قابو کننگ کِن سختءُ دباؤ شاغنگ ئٹیءِ داڑن مون مُستی بندغی حقاتا حالیت دے پہ دے خرابی نا کُنڈا اِننگ نا گمانءِ۔
پانک نا رپوٹ ئٹی توجو تِرفنگانءِ کہ مکران ڈویژن اموکہ چین و پاکستان نا اقتصادی راہداری پروجیکٹ(سی پیک) آکِن کل اَن اہمءِ پاکستانی پوج نا کاروائی کننگ نا بنیاتی نشان مسونءِ ، دادے جبرئٹ بیگواہی نا 22 کیس رپوٹ مسونءِ۔
اگست 2023, پوجی کاروائی تا حوالہ ئٹ ھم بلوچستان نا زی آ باز کُبین تمانءِ ، پانک نا رپوٹ نا وڑٹ ضلعءِ کیچ نا تحصیل تمپ نا بازنگا علاقہ آک ھیرآباد ، ھوت آباد ، بالیچہ و ناصر آباد ئٹی پاکستان نا پوج باز وخت پوج کشی کرینءِ ، بندغاتءِ گرفتار کننگ و تشدد ئن پد الہ کننگانءِ ، دا گرفتار کروکاتءَ تعداد پانک نا ماہانہ رپوٹ ئٹی تننگ تَنءِ۔
غلام فاروق ولد محمد وارثءِ 27 اکتوبر 2022 مستونگ ئن جبرئٹ بیگوا کننگاسَس ، اُونا جون 31 اگست 2023 اے کلی قمبرانی روڈ ئٹی انگور نا باغ سیئن خننگاسُس۔پانک نا رپوٹ ئٹی غلام فاروق نا النگ و کسِفنگ نا بارسِٹ تفصیل ئٹی رپوٹ ہوار کریسا پاننگانءِ النگ و کسفِنگ نا پالیسیءِ نسل کشی اَن بیدس پین پِن تننگپک انتیکہ دادے ہمو بندغاتءِ نشانہ کننگیک ہمو تینا قومی شناخت و بقاء کِن اِیت کریساءُ اننا ایِتءِ زور تِرساءُ۔دا نسل کش آ پالیسیءِ تورِنگ کِن بین الاقوامی ادارغاتءِ زور تِروئیءِ کہ اوفک پاکستان نا زی آ ہمو وخت اسکان دباؤ شاغِر ہمو وخت اِسکان پاکستان نا پوج جبرئٹ بیگواہی و النگ و کسِفنگ نا تینا پالیسی ئن دُو ارفپک۔ زلوریءِ دا کاریم تا پٹ و پُول کننگءِ و دا معاملہ آ تیکِن جہانی عدالت انصاف ئٹی پاکستان نا پوج نا خلاف انسانیت نا خلاف جرم نا الزام ئٹ مقدمہ چلایفنگءِ ، انتیکہ پاکستانی عدالت آک پوج نا خلاف ہچو معاملہ سیٹی انصاف نا اہلیت تِخپسءَ۔
پانک نا رپوٹ نا وڑئٹ ، گدرینگوکا تُوئے کیچ نا بنکی شہر تربت ئٹی لینگویج ٹیچر عبدالرؤف برکتءِ توہین رسالت نا دروغ سینا الزام ئٹی کسفِنگیک ، نصیر آباد ئٹی با اثر انگا بندغاک زمیندار امداد جویو ءِ کسفِنگیک ، پھرا (ایران شھر ) و مغربی بلوچستان ئٹی مہاجرین نا زند تدیفوکا سمیر و رخسانہ ( ھانی بلوچ) نا بیگواہی و کسِفنگ ئن پد جوناتءِ ہوشنگ نا واقع آک بلوچستان ئٹی بندغی حقاتءَ پاشءُ واقع آتیٹی بریرا ہموکہ بلوچ سماج ٹی بے حفاظتی نا احساسءِ ودیفرءَ۔داڑن بیدس بندغی حقاتءَ کارکن و بلوچاتءَ جبرئٹ بیگواہی نا زی آ توار چِست کروکا بلوچ وکیل ایمان مزاری نا گرفتاری و اُودے پاکستان نا پوج تینا پارغ اَن بدلہ النگ بلوچ حقوق نا توارءِ دبائفنگ نا کوشِست ئسے۔دا واقعغاتءَ پانک سختی ئٹ مذمتءِ کرینءِ۔
