شال : پانک نا نومبر 2023 نا بندغی حقاتا ماہانہ رپوٹ ئٹی بندغی حقاتا خلاف ورزیک بے کچ زیات مسونءِ بلوچستان ئٹی بندغی حقاتا وڑآک باز مایوسی نا کُنڈا اِننانو۔ رپوٹ نا مطابق ئٹ گدرینگوکا تُوےءِ پاکستان نا پوج بغیرس عدالت سینا پاننگ اَن 13 وختی جبرئٹ گرفتار کروکا بندغ آتے کسیفینءِ ، 62 بندغاتءِ بیگوا کننگانءِ و 22 بندغاتءِ ٹارچر سیل آتَن خلاسی ملانءِ۔
پانک نا مطابق ئٹ جبرئٹ بیگواہیک بلوچستان و سندھ اَن رپوٹ کننگانءُ ، سندھ اَن 2 , شال اَن 5 ، کیچ اَن 17 , لسبیلہ اَن 2 , آواران اَن 14 , پنجگور اَن 1 , ڈیرہ بگٹی اَن 4 , مستونگ اَن 1 , خضدار اَن 3 , خاران اَن 2 بندغ ، چاغی اَن 1 , چمن اَن 1 , سبی اَن 1 , گوادر اَن 7 و ضلع نصیر آباد اَن 1 بندغ اَس پاک پوج گرفتار کننگ اَن پد جبرئٹ بیگوا کرینءِ۔
رپوٹ ئٹی ضلع آواران نا علاقہ بزداد و پیرندرءِ مروکا المناک انگا واقع نا ہم اِیت کننگانءِ ہراڑے اِیرا بندغءِ ہورا تیٹی حملہ کننگیکءُ کسیفنگیک۔ پولیس نا کاؤنٹر ٹیررازم ڈیپارٹمنٹ ( سی ٹی ڈی ) ضلع خضدار ئٹی موست اَن جبرئٹ بیگوا انگا موسے بندغءِ اَسے دروغ سینا حملہ سیٹی کسیفِیک۔ دارن بیدس ، دروغ ئنا پولیس مقابلہ سیٹی ضلع کیچ اَن ہفت بندغءِ کسیفنگیک۔
رپوٹ ئٹی 19 نومبر 2023 اے بالگتر ضلع کیچ ئٹی پیش مروکا واقع نا تفصیلات آک ھوارءُ۔ رپوٹ نا مطابق ئٹ دا واقع بلوچستان ئٹی جبرئٹ بیگواہی نا اَسے وحشیانہءُ عمل اَس مسونءِ۔ اَسے خاندان نا موسے بندغ شاہ جہان ، نبی داد و عادل اے جبرئٹ بیگوا کننگیک ، گاڑی ٹی سوار کننگیک پدا گاڑی اے بم دھماکہ ٹی تباہ کننگیک اوفتے کسفینگیک۔ سروسوج کننگ اَن پد معلوم مریک کہ دا مروکا کاریمءِ پاکستان نا پوج ، پولیس نا کاؤنٹر ٹیررازم ڈیپارٹمنٹ ( سی ٹی ڈی ) و پاکستانی پوج نا مقامی انگا ایجنٹ خالد یعقوب نا دُو ارے۔ دا واقع ریاست نا ادارغاتہ بندغی حقاتا ساف ساف خلاف ورزیءِ ، عدالتی حکم اَن بغیرس اللنگ و کسیفِنگ و جبرئٹ بیگوا کننگ اَسے مالہ اَن جوڑ کروکءُ پالیسی اَس مسونءِ امو داسہ پاش مسونءِ۔
رپوٹ ئٹی پاننگانءِ کہ 28 نومبر 2023 اے تربت ضلع کیچ ئٹی بغیرس عدالت سینا حکم اَن بندغاتءِ اللِنگ و کسیفِنگ نا وقعغاک داسہ زیات مسونءُ دا اَسے پریشانی نا اِیت اَسے، پولیس سیف اللہ ، شکور ، عبدالودود و بالاچ نا جوناتءِ ہسپتالءِ رسیفِک اموکہ وختی اَن بیگوا کننگاسور ۔ دائنا رد عمل ئٹ سخت احتجاج کننگیک ، خاس کَر بالاچ نا خاندان نا کُنڈ اَن ، دا کاریمءِ بغیرس عدالت سینا حکم اَن ریاست نا کسیفنگ نا اَسے سنگینءُ واقع اَس پاننگیک۔ سی ٹی ڈی نا نیمہ اَن طاقت اَن غلط پائدہ ارفِنگ و دروغ نا مقابلہ آک دا ادارہءِ تشدد کننگ نا اَسے اوزار اَس جوڑ کرینءُ ، مون موستی دا ظلمءِ تورنگ کِن سی ٹی ڈی اے زوتس غیر مسلح کننگ المیءِ۔
رپوٹ ئٹی بلوچ طالب علم آتا دا حالیت نا زی آ توجُو تننگانءِ اموفتیتون دنو وڑآک مننگ ئٹیءُ جبرئٹ بیگوا مننگ و بے وجہ کسِفنگ تون اینو مون پہ مونءُ۔ تعلیمی ادارغاتءِ پوج نا دُوٹی تننگانءِ ، لسبیلہ یونیورسٹی ٹی طالب علم آتا خلاف پولیس نا بے جا طاقت کارمرز کننگ و 17 نومبر 2023 ئٹی طالب علم سمیربلوچءِ احتجاج سینا کننگ نا وختءِ گرفتار کننگیک و پداے بیگوا کننگیک۔
پانک نا رپوٹ نا مطابق ئٹ بلوچستان نا دا سنگین اِنگا حالیت نا زی آ و بندغی حقاتا ارا خلاف ورزیک مننگ ئٹیءُ بین الاقوامی ادارغاک دافتہ ذمہ وارآتے جوابدہی کننگ کِن زوتس قدم اَس چِست کیر ۔دا کُنڈا ہر وخت اوفتے توجہ تِریفنگیک داڑن باوجود ھو بلوچستان ئٹی انسانی بحرانءِ لگتمال کننگ ئٹیءُ ، داڑے بندغاتءَ زندگیءِ بچائفِنگ و حق آتا حفاظت کننگ کِن زوتس ھوار تمھیر ۔
