بلوچ نیشنل موومنٹ امریکن چیپٹر واشنگٹن ڈی سی ئٹی وائٹ ہاوس نا مونءِ بلوچ نسل کشی نا خلاف بلوچستان ئٹی مروکا لانگ مارچ نا حمایت ئٹ احتجاجی مظاہرہ اَس کرینءِ۔ مظاہرہ ٹی چُنا و بلوچ کمیونٹی نا بازنگاءَ بندغ آک ھوار اسور ھو بلوچستان ئٹی مروکا ظلم و بندغی حق آتا خلاف ورزی نا زی آ اِیت و گپ کریر۔ھو امریکہ نا صدر جوبائیڈن اَن بلوچ نسل کشیءِ تورِنگ نا خواستءِ کریر۔
بی ایس او نا سابق چیئرمین وحید بلوچ تینا خطاب ئٹی پارے ننا مظاہرہ پاکستان نا قوضہ کروکا بلوچستان ئٹی مروکا 75 سال نا ظلم و جبر نا خلاف اڈ تننگانءِ۔نن ہمو کل بلوچ خاندان آتون ہوفتہ درد ئٹی ھوار اُون ہرافتہ بندغ آتے پاکستان جبرئٹ بیگواءَ کرینءِ ۔
بلوچ آتا بھارت تون رشتہءِ نن ہچ منیپنءَ امونہ الزامءِ کہ پاکستان ننے آ خللِنگ ئٹیءِ ھو پائیک دا الزامءِ ہچُو بنیات اَس اَف۔ اگہ حقیقت ئٹی ہندوستان نن تون کمک کروس تو حالیت آک داخس خراب متورا۔
سندھی فاؤنڈیشن نا صوفی لغاری پارے پاکستان تینا ناکامی نا الزامءِ ہندوستانءِ خللِیک ، دا ھونا اَسے متکُنو چال اَسے و ناکامءُ پروپیگنڈا اَسے۔
بی این ایم نا ممبر سمیع بلوچ پارے پاکستان نا قوضہ اَن الیس اینو اِسکان بلوچ قوم نا نسل کشی برجاءِ۔ نن جبرئٹ بیگواءَ مروکا بندغ آتون و بے وجہ کسِیفوک آ بلوچ آتون مدام سلُوک مروُن۔
داڑن بیدس ورلڈ سندھی کانگریس نا لیڈر راجہ ڈائر ، احتجاجی مظاہرہءِ اڈ تروکا سنگت کامریڈ نبی بخش بلوچ و ھانی بلوچ ھم میڈیا نا نمائندغاتَن و مظاہرین آتَن خطاب کریر۔
سخت انگاءَ موسم ، پِر ، برف باری و موسءِ ڈگری سیلسیئس درجہءِ حرارت ئٹی مطاہرین آک تینا اڈ تروکا شیڈول نا مطابق ئٹ احتجاجی مظاہرہ ٹی بشخ اَلکُور و ساڑی مسُور و بلوچ نسل کُشی نا خلاف تینا توارءِ دنیا نا مونءَ چِست کریر۔
