رپورٹ ڈاؤن لوڈ :
پانک نا ماہانہ رپوٹ نا مطابق ئٹ جولائی نا تُوءِ بلوچستان ئٹی پاکستان نا فورسز آک 3 بندغ آتے بغیرس عدالت سینا پاننگ اَن کسِفینءِ و 35 بندغ آتے جبرئٹ بیگوا کننگانءِ ۔
بلوچ نیشنل موومنٹ ( بی این ایم ) نا ادارہ انسانی حقوق نا رپوٹءِ سرجمی ئٹ شنگ کرینءِ ، بی این ایم نا ادارہ پانک ہر تُوءِ بلوچستان ئٹی انسانی حقوق نا حالیتءِ انگریزی و اردو زبان آتیٹی سرجمی ئٹ شنگ کیک ، ہرا ٹی جبرئٹ بیگوا مروک آ بندغ آتا حالیت نا بارسٹ ہر گڑاءِ مونءِ اتنگ گیک۔
جولائی نا رپوٹ نا مطابق ئٹ 35 جبرئٹ بیگوا مروکا آتَن بیدس بازنگا بندغ آتے غیر قانودی وڑئٹ بندی کننگانءِ۔ کیچ اَن 8 , آواران اَن 7 , خضدار اَن 6 , مستونگ اَن 2 , شال اَن 13 , خاران اَن 5 , گوادر اَن 3 و کراچی اَن 5 بلوچ شاریتے جبرئٹ بیگوا و غیرقانودی بندی کننگانءِ ۔
بلوچستان ئٹی جبرئٹ بیگوا مروکاتہ کہول آتا احتجاج کننگ و ریاستی ادارغاتہ ہوفتے تشدد کننگ ہر دے نا اِیت ئس جوڑ مسونءِ ، پانک نا رپوٹ ئٹی دا حالیت نا زی آ افسوس کریسہ پاننگانءِ 28 جون 2024 ئٹی پولیس نا ادارہ انسداد دہشت گردی ( سی ٹی ڈی ) ظہیر بلوچءِ الِنگ اَن پد جبرئٹ بیگوا کرینءِ ہمو وجہ اَن ہونا کہول سریاب روڈ شال ئٹی احتجاج کرینءِ ۔ پرایمن آ بندغ آتا مسئلہ آتے خف تورنگ و پُورا کننگ اَن بیدس مظاہرہ کروکاتے تشدد کننگانءِ و ہوفتے بندی کننگانءِ۔
پانک داڑن بیدس تربت ئٹی جبرئٹ بیگوا مروکا بندغ آتا کہول نا باز وخت اَن دھرنا تروکاتے توجُو تریسہ پائیک کہ کہول نا بندغ آک 48 اَن الیس 45 ڈگری سیلسیئس گرمی اَن بیدس احتجاج ئٹی تُولوکءُ ولے حکومت ہچ خف تورنگ ئٹی ہف۔ ضلع خضدار نا تحصیل نال ئٹی خَلک و کوچہ غاتے چارمکُنڈ الِنگ اَن پد ہوفتے جلہو کننگانءِ ، زلبول آتے تشدد کننگانءِ ہوفتے ٹپی کننگانءِ و 6 بندغ آتے جبرئٹ بیگوا کننگانءِ ۔ہوڑن پد بندغ آک سی پیک ایم 8 لنک روڈءِ بند کریسہ دھرنا تِسونءُ حکومت اَلوکا بندغ آتا خلاسی نا وعدہءِ ہم کرینءِ ولے دا وخت اِسکان ہوڑے ہچُو عمل درآمد ئس کننگ تَنءِ۔
پانک ئنا رپوٹ ئٹی کُل دنیا نا نظرءِ بروکا بلوچ راجی مُچیءِ ریاست نا تشدد نا ہم اِیت کننگانءِ ۔ پانک نا رپوٹ نا مطابق ئٹ 28 جولائی ، 2024 اے بلوچ یکجہتی کمیٹی بلوچستان ئٹی انسانی حقوق نا خلاف ورزی ، جبرئٹ بیگواہی و بغیرس عدالت سینا حکم اَن کسِفینگ نا خلاف گوادر ئٹی بَلو جلسہ ئس اڈ تننگاءَ۔ پرایمن انگا جلسہءِ ریاست طاقت ئٹ تورنگ خواہسکہ مستونگ ، حب چوکی و تربتءِ جلسہءِ انوکا بندغ آتے تشدد کننگاءَ ۔ راجی مُچی نا جلسہءِ اِنوکا بندغ آتے تورنگ نا خلاف پُورا بلوچستان ئٹی احتجاجی مظاہرہ کننگاءَ۔ مظاہرہ کروکاتہ خلاف بے پاوان و غیر زلوری طاقت نا استعمال کننگ اَن مستونگ ئٹی 14 مظاہرین ٹپی مسور ہرافتیٹی عبدالمطیب بلوچ نا کاٹم سخت ٹپی مننگ نا وجہ اَن ہونا حالت باز خراب مسونءِ ۔ تربت ئٹی 25 مظاہرین پاکستانی فورسز نا تشدد اَن ٹپی مسور و اَسے جوان ئس اصغر بلوچ شہید مَس۔ نوشکی ٹی پرامن انگاءَ مظاہرہ کروکا بندغ آتے فائر کننگاءَ ہراڑن حمدان بلوچ شہید مَس و بازنگاءَ بلوچ آک ٹپی مسور ۔ گوادر ئٹی حالیت باز خراب مسور ہراڑے راجی مُچی ٹی ھوار مروکا مظاہرین آتے ایف سی ، سی ٹی ڈی پولیس و خفیہ ادارغاتہ اہلکارآک آنسوگیس خسسِنگ ، فائر کننگ و لٹ و کُٹ کننگ اَن و تشدد آتَن اَسے بندغ ئس شہید مَس و بازنگاک پین وڑ ٹپی مسور۔
پانک اسوار پدا خواست کریسہ پائیک جولائی نا تُوءِ بلوچستان ئٹی انسانی حقوق نا حالیت باز پین وڑ خراب مسونءِ۔ بلوچستان ئٹی پاکستانی فورسزآک نہ کہ خالی تینا آئین نا بلکِن بین الاقوامی انسانی حقوق و قانود نا ہم لگتمالیءِ کرینءُ۔ دا حالیت ئٹی بلوچ قوم نا بُنکی حقوق آتا حفاظت کننگ کِن بین الاقوامی حوالہ ئٹ دنیاءِ ھوار تمنگ و پاکستان اَن دا وڑ خلاف ورزی کننگ نا زوتس خواست کننگانءِ۔
