بلوچ نیشنل موومنٹ (بی این ایم ) نا پارغن نیدرلینڈ و امریکہ ٹی بلوچستان نا تاریخ و آجوہی نا حوالہ ٹی پمفلِٹ بشخنگا۔ نیدرلینڈنا بلا شارک ایمسٹرڈیم ، دی ہیک ، روٹرڈیم ، ایندھوون و ایلو جاگہ تیٹی پمفلٹ بشخنگا۔
دا مہم نا مسخت عالمی سطغءَ یانزدہ نا تاریخءِ پاش کروی ئس ہراتم بلوچستانءِ برطانیہ نا قوضہ اَن آجوہی رسینگا و بلوچستان حکومت تینا ریاست نا آزاد انگا حیثیت نا اعلانءِ کریسہ تینا قومی ریاست نا خاکہ مونءِ ایس۔
پمفلٹ ئٹی اننا نوشتہ کننگاسوس کہ یانزدہ اگست 1947 اے انگریزآک برصغیر اَن واپس مننگ اَن پد بلوچستانءِ اَسے آزادءُ ریاست ئس منہار۔ پدا 27 مارچ 1948 اے پاکستان جبرئٹ بلوچستان نا زیءِ قوضہ کرے ، مارچ 1948 اَن الیس اینو اِسکان پاکستان نا قوضہ نا خلاف بلوچ آک مزاحمت کننگ ئٹیءُ۔ قوضہ نا دے اَن الیس اینو اِسکان پاکستان بلوچ قومءِ خلِنگ و کسِفِنگ ئٹیءِ مخلوکءِ جبرئٹ بیگوا کننگ ، بغیرس عدالت سینا پاننگ اَن کسِفِنگ ، زالبول و چُناتے تشدد کننگ و لُٹ ماریک ھوارءُ انون ہزارآتا کچ ئٹ چیروکو بلوچ آتا جون آک ہم خَسِنگانءِ۔
دا وختءِ بلوچستان ئٹی ریاست نا بدترین ظالُمی و انسانی حقوق بے کچ خلاف ورزی مننگ ئٹیءِ دا ظالُمی آتا وجہ اَن بلوچ قوم نا زند یکجاغءَ سلیسونءِ ۔
پمفلٹ ئٹی اپیل کننگانءِ کہ دنیا نا آزاد انگا شاریک بلوچستان ئٹی پاکستان نا قوضہ گیری و بلوچ نسل کُشی نا خلاف توار چِست کیر ، دا جُہد اَن نہ خالی بلوچستان نا مخلوک نا دلجوئی مریک بلکِن دا عالمی انصاف و انسانی حقوق نا حفاظت کننگ کِن ہم جوانو کاریم اَسے ، و دنیاءِ دا اِیت اَن آگاہ کیر کہ بلوچستان ئٹی اَنت مننگ ئٹیءِ ۔
