شال : بلوچ نیشنل موومنٹ نا ترجمان مستونگ نا واقعءِ بُلو رنج و غم سِے نا اِیت اَس پارِینءِ مستونگ ئٹی عید میلاد النبی نا جلوسءِ دھماکہ بلوچ قوم نا زی آ براہ راست حملہ پاننگیک داوڑ نا واقع آک ہچو وڑسیٹی قبول مننگ نا لائخ اَففس۔ننا اُست آک غم و افسوس اَن پُر مسُور و نن داٹی ھوار مروکا خاندان آتون دا غم ئٹی ھوار اُن۔
ترجمان پارے بلوچ و پشتون قوماک پاکستان نا ریاستی پالیستءَ شکار مسونءُ۔پاکستان تینا جوڑ مننگ اَن الیس اینو نا دے اِسکان تینا مفاداتءَ خاطر کِن مذہبءِ ہتھیار سینا وڑئٹ کارمرز کننگ ئٹیءِ دانا اینو پُورا خطہ توُن ھوار بلوچستانءِ ہم نشانہ جوڑ کننگانءِ۔اینو ہم پاکستان بلوچستان ئٹی مذھبی فرقہ واریت کِن کَسرءِ ھوار کننگ کِن بلوچ قومءِ اننا حالیت آتون مون پہ مون کننگ خوائیک ہموفتن اینو پشتون قوم مون پہ مونءِ تانکہ بلوچ قومی آجوہی نا تحریکءِ پدپشت خسینگ نا نیماغءِ دریسا کے۔
ھوپارے بلوچ قومءِ اینو مُوست اَن زیات بازنگا محاذاتءِ سنگینءُ خطرغاک پیش مسونءُ دافتُون مقابلہ کننگ کِن بلوچ قومءِ انسانی بنیادتیئٹ عالمی برادری نا مدت و کمک کننگ سخت زلوریءِ۔ریاستءِ پاکستان عالمی برادری کِن اَسے پیونو پیل اَس جوڑ مسونءِ امودے بلُون کننگ دا خطہءُ دنیا نا مفاد ئٹی اَف۔نہ کہ دا نا اہل اِنگا قوضہ گیرءِ غیر ملکی آ حکومتءِ مخلوک نا حمایت رسینگانءِ اموکہ دا حالیت آتون مون پہ مون مننگ کِن زلوریءُ۔
بی این ایم نا ترجمان پارے اَسے آزاتءُ بلوچستان اَس جوڑ مننگ اَن بیدس خطہ ٹی دہشت گردیءِ پھیلائفِنگ اَن تورِنگ ممکن مفرُوے۔ مستونگ نا واقع نا کہ بلوچستانءِ پیش مروکا خطرہ سینا کُنڈا اننگ نا اشارہ اَسے بلکہ پورا خطہ نا خاطرءَ اَسے بدُ ایِت اَسے۔
ھو پارے بلوچستان تینا جغرافیائی نا وجہ اَن بازنگا طاقت آتِیکِن پرکشش جوڑ مسونءِ و ریاست پاکستان بلوچ قومی تحریک تون مقابلہ کننگءِ ناکام مننگ اَن پد ھودے پوُسکُنا سازش آتیٹی ھوار شاغنگ خوائک۔انونکہ دہشت گردی نا برخلاف جنگءِ پورا دنیا تینا جنگ سمجھارءُ کمک کریر انون بلوچستان نا قومی تحریک آجوہیءِ کمک کیر و طاقت ایتِر دا خطہءِ و دنیاءِ خلاسی ملنگ کِن کسر اَس کَشِنگیک۔
ترجمان پارے اینو پاکستان نا قوضہ ٹی محکوم اِنگا قوماک بد ترینءُ حالیت سیتون دو چار کننگانءُ۔اَسے نیمہءِ ریاست نا جوڑ کروکا غیر ریاستی ایجنٹ آک تینا ایجنڈاءِ مخلوک نا زی آ خوشکِنگ خوارءَ ایلو نیمہءِ ریاست نا فورسزآک محکوم انگا قوماتءَ خلاف طاقت نا استعمال کننگ کِن ہچُو کسر اَس اِلیتَنءُ۔ گڑاس دے موست ماڑی جلبانی ، سکرنڈ ، سندھ نا خلک سیٹی پاکستانی فورسزآک حملہ کریر نیاڑی تون ھوار عام انگا بندغاتءِ کسفھیر۔ محکوم انگا قوماتءَ نسل کشی پاکستانی ریاست نا ہر وخت نا پالیسی جوڑ مسونءِ۔
