بلوچ نیشنل موومنٹ ( بی این ایم ) بلوچستان ئٹی جبرئٹ بیگوا مروکاتا مسئلہءِ پاش کریسا جرمنی نا بازنگا شارتیٹی احتجاجی مظاہر و آگاہی مہم کِن پروگرام اڈ تسونءِ۔ دا تقریباک کلن و کیمنتس ئٹی مسونءُ۔ دا پروگرام تیٹی بی این ایم نا کارکن آتون ھوار بلوچ ریپبلکن پاٹی ( بی آر پی ) نا کارکناک و جہی آ عہدیداراک ہم بشخ الکور و اننا مسکد کِن تینا اسیجاگہی ءِ مونا ایسور۔
مہم نا وختءَ مظاہرہ کروکاتءَ مسکد مقامی انگا بندغاتءِ بلوچستان نا سنگین انگاءَ حالیت و پاکستانی فورسسزآتا دُو اَن جبرئٹ بیگوا مروکا بلوچ آتون غیر انسانی وڑاتا بارسٹ شعور تننگ اسَکاءَ۔ بی این ایم جرمنی نا جنرل سیکریٹری جبار بلوچ ، جوائنٹ سیکریٹری شیر حسن ، یونٹ سیکریٹری ( این آر ڈبلیو ) بدل خان ، بی آر پی جرمنی نا میڈیا منیجر عبدالجلیل ، آصف بلوچ ، صادق بلوچ ، صفیہ بلوچ ، قاسم حسین و آفتاب بلوچ مُچی اَن خطاب کریسا عالمی برادری اَن بلوچستان ئٹی جبر و تشددءِ ختم کننگ کِن مدت کننگ کِن زور تِسور۔
تقریب اَن مقررین آک بلوچستان ئٹی مروکا مظالم نا بیخءِ دا خطہ ٹی پاکستان نا قوضہ پاریر ھو پاریر 1948 اَن پد ہراتم پاکستان نا پوج بلوچستانءِ جبرئٹ تینتون ھوار کرے ، بلوچ قوم بے پناہ مصیبت آتون مون پہ مون مسونءِ۔ امو وخت اَن الیس اینو اِسکان پاکستانی ریاست بلوچ قوم نا زی آ اسوڑ جبر کریساءِ ، امونا وجہ اَن بندغی حقاتا خلاف ورزیک زیات مسونءُ۔ وائس فار بلوچ مسنگ پرسنز ( وی بی ایم پی ) نا مطابق ئٹ گدرینگوکا اِرا دہائی اَن بلوچستان ئٹی 45,000 اَن زیات بندغاتءِ جبرئٹ بیگوا کننگانءِ۔
ھو مظالم نا سنگین اِنگا حالیت نا زی آ اِیت کریسا پاریر کہ ملتان نا نشتر ہسپتال یونیورسٹی ٹی 500 اَن زیات چیروکا جون آتا خننگ اِنگ دا مسئلہءِ مچءِ پین مونءِ ایس۔ دا اِیت پکاءِ کہ دا جوناک جبر ئٹ بیگوا مروکا بلوچ آتاءُ ارافتے پاکستانی فورسسزآک بازنگا وخت آتے بیگوا کرینءِ۔ بلوچستان ئٹی پوج زبردستی ہرکنڈ اَن الکونے ، خبرآتے و اطلاعاتءِ میڈیاءِ رسینگ اِنگ اَن تورنگ نا وجہ اَن دا انفارمیشن بلیک ہول اَس جوڑ مسونءُ۔ پیشن نا ملک آتا صحافی و نامہ نگاراتءِ دا خطہ ٹی بننگ نا اجازت ہچو وڑسیٹی اَف۔
بلوچستان ئٹی مروکا جہُد نا زی آ اِیت کریسا مقررین آک پاریر بلوچ نیشنل موومنٹ ( بی این ایم ) و بلوچ ریپبلکن پاٹی ( بی آر پی ) بلوچستان ئٹی مروکا بندغی حقاتا خلاف ورزی و جبرئٹ بیگواہی تیکِن توار چست کریساءُ۔ ھو یورپی یونین تون ھوار عالمی برادری اَن خواست کننگ ئٹیءُ کہ ھو نیام تمیِر و توار اَن محروم انگا بلوچ قوم نا توار جوڑ مریر۔ بلوچ تنظیماک مُچ مہذب انگا قوم آتے و بندغ آتے زور تریسا پاننگءُ کہ ھو پاکستانی پوج نا دا غیر انسانی تشدد خلاف بَش مریر و نن تون ہم توار مریر۔
