بلوچ نیشنل موومنٹ نا جارکش پارے کہ پاکستانی لشکر نا نیمہ آن پنچ شمبے نا دے مغربی بلوچستان ئٹی میزائل جلہو تہ ہدف بلوچ مہاجرین آک اسُر۔ دا جلہو ئٹی زالبول و چُنا تیتون اوار دہ بندغ شہید مس ہرافتیٹی بی این ایم نا مرکزی کونسل نا باسک دوستا محمود ہم تُدءِ۔ بی این ایم شہید چئیرمین دوستا و ایلو شہید آتے خیسن ءُ دروت ندر کیک۔ چئیرمین دوستا نا تحریک و پارٹی کن قربانی تے مُدامی یاد تخنگ مرو و او مُدامی بنا یاد آتیٹی زند مرو۔
بی این ایم نا جارکش پارے دوستا محمود بنیات آن دے ٹک بلوچستان نا ہند پروم ضلع پنجگور نا ہندی ئس ۔ پاکستانی لشکر نا نیمہ آن پروم نا ہنداتیٹی ہردئی لشکری کاروائی تیان تنگ برسا او خاوت تون اوار پروم آن منہ کیلو میٹر مُر ایران نا زیر انتظام دے کہیلنگ بلوچستان ئٹی شمسر( حق آباد) پنی ءُ ہند ئسے آ تینا خُڑک ئنا رشتہ دار آتا راہا ہنپیس ئس و کیہی سال آتیان تینا خاوت تون اوار ہموڈے رہینگ ئس ۔ اینو پاکستانی لشکر نا دانستہ جلہو تیٹی ”بی این ایم سینئر باسک چئیرمین دوستا” تینا تیوعہ خاوت تون اوار خلنگا۔
او پارے کہ بلوچ راج آ پاکستانی زوراکی تہ خراب انگا مثالءِ۔ پاکستان ی لشکر نا نیمہ آن شہری آبادی آ ہفت میزائل خلنگا ہرافک جتا جتا اُراتے آ تمار و بھلو کچ ئسیٹی تباہی مس۔دا جلہو تیٹی دہ بے گناہ آ بندغ آتے خلنگا ہرافک پاکستانی لشکر نا جبر ئنا سوب آن تینے رکھیفنگ کن دے کہیلنگ بلوچستان آ ہنپیسُر، کرافتیٹی زالبول و چُناک ہم تُدءُ۔ شہید مروکاتیٹی دوست محمد ولد محمود(چئیرمین دوستا)،اونا اُرائی شازیہ، اونا چُنکا چُناک :بابر دوست،ھانی دوست،چراگ دوست و پنجگور آن ہنپوکا شہید یونس بلوچ نا خاوت آن اسہ بلوچ لُمہ ئس نجمہ بلوچ، معصوم انگا چُنا فرھاد ولد محمد جان،ماھکان و ماہ زیب اوارءُ۔
بی این ایم نا جارکش پارے کہ زالبول و چُناتے شہید کرسا پاکستانی کالخواہ و پاکستانی میڈیا نا دروغ انگا دعویٰ ئے کننگءُ کہ پاکستانی لشکر”ایران نا پنجگور آ جلہو” ئنا جواب ئٹ سرمچار آتا ٹھکانہ آتے بھُس کننگانے ولے راستی آ پاکستانی لشکر شہری آبادی تے نشانہ کرینے ہراٹی زالبول و چُناک شہید مسُنو ہرانا ویڈیو فوٹیجز و عکس آتا ثبوت آک اریر۔چئیرمین دوستا ہرادے پاکستانی لشکر تینا دا جلہو با بھلا ہدف پاننگءِ او اسہ” بے گناہ ءُ سیاسی باسک ئس ہرا تینا اصلی پجار تون چاگڑدی میڈیا ٹی ئس ۔ اگہ او اسہ سلاہ بند تنظیم ئسینا باسک مسکا گُڑا تینا جند ئنا پجار تون سوشل میڈیا ٹی متوکا۔
او پارے کہ دا جلہو تینا بھلُنی نا سوب آن اولی جلہوءِ ہراٹی زالبول و چُناتا بھلو کچ ئس شہید مسُنے ولے داکان مُست بلوچ مہاجر آتے افغانستان و ایران تون اوار جہان نا ایلو ڈیہہ تیٹی پاکستانی لشکر نا کارندہ آک خلکنو۔بلوچ نیشنل موومنٹ جہانی مخلوق آن ہروخت خواست کرسا بسُنے کہ دے ٹک بلوچستان آن دے کہیلنگ ئٹی ہنپوکا بلوچ آتے جہانی سطح ئٹ ریفیوجیز نا درجہ ترسا اوفتا زندگی تہ رکھیفنگ کن گام ہرفیر۔
جارکش پارے کہ پاکستان نا دا جلہو آن خاموش مننگ نا جاگہ پاکستان نا دہشت گردانہ کاروائی نا برخلاف اودے جہان نا مونا جوابدہ کننگ مرے۔ دا ہیت ئنا پک ءُ ثبوت ارے کہ پاکستان دا جلہوئے تینٹ شہری آبادی تیا کرینے۔ ہندُن انگا بندغ آتے نشاہ کننگانے ہرافتا سلاہ بند کاریم تیتون ہچو تعلق ئس اف۔ دا جلہو ئٹی اسہ باسک ئسیتون اوار تنیا زالبول و چُناک شہید مسنو ہرافتے خلیسہ پاکستان فخر ئٹ دا قتل عام نا ذمہ واری ئے ہرفے۔
جارکش تینا درشان نا ایسر ئٹ پارے کہ پاکستان نا زوراکی نا سوب آن کیہی سیاسی باسک اتون اوار لس بلوچ آک تینے رکھیفیسا درانڈیہہ ءُ ہرافک ایرانی بندوبستی بلوچستان،افغانستان،خلیج،یورپ،امریکہ تون اوار تیوعہ جہان ئٹی تولوکءُ ولے دائسکان جہانی مخلوق بلوچ مہاجرین آتے تینا ترجیہی لسٹ ئٹی اوار کتنے۔ہندا سوب آن بلوچ مہاجر آتے مہاجر رجسٹریشن ئٹی مشکل مننگءِ و جہانی سطح آ طے مروکا مہاجر آتا حق آتیان زبہرءُ۔
